ສະມາຊິກພັກຣີພັບບລີກັນ 4 ຄົນໄດ້ເຂົ້າຮ່ວມກັບສະມາຊິກພັກເດໂມແຄຣັດໝົດທຸກ
ຄົນໃນສະພາຕ່ຳ ໃນຕອນແລງຂອງວັນອັງຄານວານນີ້ ເພື່ອຮັບຮອງຮ່າງຍັດຕິ ກ່າວ
ປະນາມຄຳເວົ້າ “ແບ່ງແຍກເຊື້ອຊາດຜິວພັນ” ຂອງປະທານາທິບໍດີ ດໍໂນລ ທຣຳ ກ່ຽວ
ກັບ ພວກສະມາຊິກສະພາຕ່ຳຊົນກຸ່ມນ້ອຍຂອງພັກເດໂມແຄຣັດ.
ຮ່າງຍັດຕິສະພາຕ່ຳ, ເຊິ່ງໄດ້ຮັບຜ່ານ ດ້ວຍຄະແນນສຽງ 240 ຕໍ່ 187 ນັ້ນ, ໄດ້ “ກ່າວ
ປະນາມຄຳເວົ້າທີ່ເປັນການແບ່ງແຍກເຊື້ອຊາດຜິວພັນຢ່າງແຮງຂອງທ່ານ ທຣຳ ທີ່
ໄດ້ເຮັດໃຫ້ມີຄວາມຢ້ານກົວ ແລະ ຄຽດຊັງຕໍ່ຄົນ ອາເມຣິກັນໃໝ່ ແລະ ຄົນຜິວດຳນັ້ນ.”
ປະທານສະພາຕ່ຳ ທ່ານນາງ ແນນຊີ ເພໂລຊີ ໄດ້ຮຽກຮ້ອງໃຫ້ສະພາສາມັກຄີກັນໃນ
ການ “ກ່າວປະນາມຄຳເວົ້າທີ່ແບ່ງແຍກເຊື້ອຊາດຜິວພັນຂອງທ່ານ ທຣຳ ໃນທວິດເຕີ.”
ຄຳເວົ້າຂອງທ່ານນາງ ໄດ້ກໍ່ໃຫ້ເກີດການຄັດຄ້ານຢ່າງເປັນທາງການຈາກສະມາຊິກ
ສະພາຕ່ຳ ທ່ານ ດັກ ຄອລລິນສ໌, ຜູ້ທີ່ໄດ້ໂຕ້ແຍ້ງວ່າ ຄຳເວົ້າຂອງປະທານສະພາຕ່ຳ
ໄດ້ລະເມີດ “ຈັນຍາບັນຂອງສະພາຕ່ຳ. ແນວໃດກໍຕາມ, ການລົງຄະແນນສຽງຂອງ
ສະພາຕ່ຳກໍໄດ້ປະຕິເສດການຮຽກຮ້ອງຂອງພັກຣີພັບບລີກັນ ເພື່ອຫ້າມຄຳເຫັນຂອງ
ທ່ານນາງ ເພໂລຊີ.
ສະມາຊິກສະພາຕ່ຳທ່ານ ແດນ ມິວເຊີ ໄດ້ກ່າວວ່າ “ການໃສ່ຮ້າຍທີ່ບໍ່ມີສາລະນີ້ ໄດ້
ສ້າງຄວາມເສຍຫາຍໃຫ້ປະເທດຂອງພວກເຮົາແທ້ໆ.”
ທ່ານ ທຣຳ, ຜູ້ທີ່ກຳລັງມີບັນຫານັບຕັ້ງແຕ່ທ່ານໄດ້ໃຫ້ຄຳເຫັນໃນທວິດເຕີເມື່ອວັນອາ
ທິດທີ່ຜ່ານມານັ້ນ, ແມ່ນບໍ່ໄດ້ປ່ຽນຄວາມຄິດເຫັນຂອງທ່ານ. ທ່ານໄດ້ໃຊ້ທວິດເຕີໃນ
ຕອນຄ່ຳຂອງວັນອັງຄານວານນີ້ເພື່ອຍົກຍ້ອງສະມາຊິກພັກຣີພັບບລີກັນ ຜູ້ທີ່ໄດ້ລົງ
ຄະແນນສຽງຄັດຄ້ານຕໍ່ຮ່າງຍັດຕິດັ່ງກ່າວ ແລະ ທ່ານໄດ້ສືບຕໍ່ວິຈານ ສະມາຊິກສະ
ພາຕ່ຳຍິງ ທ່ານນາງ ອິລຮານ ໂອມາ, ອາເລັກແຊນເດຣຍ ໂອຄາຊີໂອ ຄໍເທັສ, ທ່ານ
ນາງ ອາຢານາ ເພຣັສລີ ແລ ທ່ານນາງ ຣາຊີດາ ຕະໄລອິບ.
ທ່ານ ທຣຳ ໄດ້ກ່າວວ່າ “ມັນດີຫຼາຍທີ່ໄດ້ເຫັນວ່າພັກຣີພັບບລີກັນມີຄວາມສາມັກຄີກັນ
ຫຼາຍຊ່ຳໃດກັບ ການລົງຄະແນນສຽງຂອງມື້ນີ້ ກ່ຽວກັບ ຄຳເວົ້າທີ່ຂ້າພະເຈົ້າໄດ້ເວົ້າຕໍ່
ສະມາຊິກສະພາຕ່ຳຍິງ 4 ຄົນຈາກພັກເດໂມແຄຣັດນັ້ນ. ຖ້າເຈົ້າຢາກເຫັນຄຳເວົ້ານັ້ນ
ແທ້, ໃຫ້ເຈົ້າເບິ່ງສິ່ງທີ່ຊົ່ວຮ້າຍທີ່ເຂົາເຈົ້າໄດ້ເວົ້າ ກ່ຽວກັບ ປະເທດຂອງເຮົາ, ອິສຣາ
ແອລ ແລະ ຫຼາຍໆຢ່າງອີກ.”
ທ່ານ ທຣຳ, ຜູ້ທີ່ໄດ້ກ່າວວ່າ ບັນດາສະມາຊິກສະພາດັ່ງກ່າວຄວນອອກໄປຈາກ ສະ
ຫະລັດ ນັ້ນ, ໄດ້ຖືກນັກຂ່າວຖາມໃນລະຫວ່າງກອງປະຊຸມຄະນະລັດຖະມົນຕີໃນ
ຕອນເຊົ້າວັນອັງຄານວານນີ້ວ່າ ເຂົາເຈົ້າຄວນໄປໃສ?
ທ່ານປະທານາທິບໍດີໄດ້ຕອບວ່າ “ມັນຂຶ້ນກັບເຂົາເຈົ້າ, ບ່ອນໃດກໍໄດ້ທີ່ເຂົາເຈົ້າຢາກ
ໄປ ຫຼື ເຂົາເຈົ້າຈະຢູ່ກໍໄດ້. ແຕ່ເຂົາເຈົ້າຄວນຮັກປະເທດຂອງເຮົາ. ເຂົາເຈົ້າບໍ່ຄວນ
ຊັງປະເທດຂອງເຮົາ.”
