ລິ້ງ ສຳຫລັບເຂົ້າຫາ

​ທ່ານ​ນາງ​ ອອງຊານ ຊູ​ຈີ ກ່າວວ່າ ຊາວ​ມຸສລິ​ມ ​ຈະ​ຕ້ອງ​ສາມາດ​ມີ​ຄວາມ​ຮູ້ສຶກ​ທີ່ໝັ້ນຄົງ​ປອດ​ໄພ ໃນມຽນມາ ​


ທ່ານນາງ Aung San Suu Kyi ທີ່ມະຫາວິທະຍາໄລ Tokyo University
ທ່ານ​ນາງ​ອອງຊານ ຊູ​ຈີ ຜູ້​ນໍາ​ຝ່າຍ​ຄ້ານ​ຂອງ​ມຽນມາ ​ເວົ້າ​ວ່າຊາວ​ມຸສລິ​ມ ທີ່​ເປັນຊົນ​ກຸ່ມນ້ອຍ​ຢູ່​ໃນ​ປະ​ເທດ​ຂອງ​ທ່ານ​ນາງ ​ຈະ​ຕ້ອງ​ສາມາດ​ມີ​ຄວາມ​ຮູ້ສຶກ​ທີ່ໝັ້ນຄົງ​ປອດ​ໄພ ​ແລະ​ເອີ້ນ​ສະຖານະ​ການ​ຂອງ​ພວກ​ເຂົາ​ເຈົ້າວ່າ ​ເປັນ​ສະພາບ​ການ​ທີ່​ໜ້າ​ເສົ້າ​ໃຈຫຼາຍ.

​ໃນ​ການ​ຖະ​ແຫຼງຕໍ່​ນັກ​ຂ່າວ​ເມື່ອ​ວັນ​ພຸດ​ວານ​ນີ້ ​ໃນ​ລະຫວ່າງ​ການ​ຢ້ຽມຍີ່ປຸ່ນ ນັ້ນ ທ່ານ​ນາງອອງຊານ ຊູ​ຈີ ​ເວົ້າ​ວ່າ ບັນດາ​ຊາວ​ພຸດທັງຫຼາຍ​ໃນ​ມຽນມາ ຈະ​ຕ້ອງ​ຮຽນ​ຮູ້​ ທີ່​ຈະຮັບ​ເອົາ​ແລະ​ອະນຸ​ໂລມ​ຜ່ອນຜັນ ​ໃຫ້​ແກ່​ພວກ​ປະຊາ ຊົນ ທີ່​ມີ​ທັດສະນະ​ທີ່​ແຕກ​ຕ່າງ​ໄປ.

​ເມື່ອ​ບໍ່​ດົນ​ມາ​ນີ້ ທ່ານ​ນາງ​ອອງຊາ​ນ ຊູ​ຈີ ຜູ້​ໄດ້​ຮັບ​ລາງວັນ​ໂນເເບ​ລ ຂະ​ແໜງສັນຕິພາບ ​ໄດ້​ພົບ​ປະກັບ​ບັນດາ​ຜູ້​ນໍາ​ມຸສລິ​ມຂອງ​ມຽນມາ ຈໍານວນ​ນຶ່ງ ຊຶ່ງ​ທ່ານ​ນາ​ງເວົ້າ​ວ່າ ພວກ​ເຂົາ​ເຈົ້າຖືກ​ປະຕິບັດ​ຕໍ່ແບບທີ່​ເຮັດ​ໃຫ້​ພວກ​ເຂົາ​ເຈົ້າຮູ້ສຶກວ່າ ພວກ​ເຂົາ​ເຈົ້າບໍ່ເປັນ​ຄົນ​ຂອງ​ມຽນມາ ຫຼືຂອງປະ​ເທດອື່ນ ໃດ.

ທ່ານ​ນາງ​ອອງຊາ​ນ ຊູ​ຈີ ​ໄດ້​ຖືກ​ຕ້ອງ​ຕິຢ່າງໃຫຍ່ ທີ່ບໍ່ໄດ້ປາກເວົ້າ​ອອກ​ມາ​ຕໍ່ຕ້ານ​ການ​ປະ​ຫັດ​ປະຫານ​ຂອງ​ບັນດາ​ຊົນເຜົ່າ ​ແລະ​ຊົນ​ສາສະໜາ​ສ່ວນ​ນ້ອຍ ໃນ​ລະ​ຫວ່າງ​ເກີດ​ເຫດການ​ຄວາມ​ຮຸນ​ແຮງ​ ທີ່​ຍັງ​ຜົນໃຫ້​ປະຊາຊົນ ຫຼາຍກວ່ານຶ່ງ​ແສນ​ຄົນ ​ຕ້ອງ​ພັດ​ພາກ​ຖິ່ນ​ຢູ່​ອາໄສ.

ຢ່າງ​ໜ້ອຍ ມີ​ຜູ້​ເສຍ​ຊີວິດ 43 ຄົນ ​ໃນ​ເຫດການ​ຄວາມ​ບໍ່​ສະຫງົບ​ລະຫວ່າງ ຊາດ​ພຸດ​ແລະ​ຊາວ​ມຸສລິ​ມ ທີ່ເກີດ​ຂຶ້ນ​ເມື່ອ​ເດືອນ​ຜ່ານ​ມາ ໃນ ເມືອງ Meikhtila ​ ທາງ​ພາກ​ກາງຂອງ​ປະ​ເທດ ​ຊຶ່ງ​ເຫດການ​ຄວາມ​ຮຸນ​ແຮງ​ດັ່ງກ່າວ​ໄດ້ແຜ່ລາມ​ ອອກ​ໄປ​ຍັງ​ຫົວ​ເມືອງ​ອື່ນໆ​ໃນ​ເວລາ​ຕໍ່​ມາ.

ພາບກ່ຽວກັບຄວາມຮຸນແຮງໃນມຽນມາ ເມື່ອເດືອນແລ້ວນີ້:

XS
SM
MD
LG