ຜູ້ບັນຊາການກອງທັບເຮືອມຽນມາ ທີ່ມີຊື່ສຽງວ່າ ເປັນຜູ້ນິຍົມການເມືອງແນວທາງປານກາງ ໄດ້ສາບານຕົວເຂົ້າຮັບຕໍາແໜ່ງເປັນຮອງປະທານາທິບໍດີອີກຄົນນຶ່ງຂອງມຽນມາ ໃນການເຄຶ່ອນໄຫວທີ່ມອງກັນວ່າ ເປັນການມອບອໍານາດໃຫ້ແກ່ພວກປະຕິຮູບຫຼາຍຂຶ້ນໃນວົງການລັດຖະບານທີ່ ຄອບງໍາໂດຍຝ່າຍທະຫານນັ້ນ.
ພົນເຮືອເອກ Nyan Tun ໄດ້ເຂົ້າມາຮັບຕໍາແໜ່ງແທນ ຜູ້ທີ່ນິຍົມແນວ ທາງແຂງກະດ້າງຄົນນຶ່ງຂອງລັດຖະບານ ທີ່ໄດ້ລາອອກເມື່ອເດືອນຜ່ານ ມານີ້ ທີ່ໄດ້ພາໃຫ້ເກີດມີຂ່າວລືກ່ຽວກັບການຍາດແຍ່ງອໍານາດກັນ. ຄືທ່ານ Tin Aung Myint Oo ໄດ້ລາອອກຢ່າງເປັນທາງການໂດຍອ້າງວ່າຍ້ອນສຸຂະພາບບໍ່ດີ ຊຶ່ງຫຼາຍຄົນເວົ້າວ່າເປັນຍ້ອນຜູ້ກ່ຽວບໍ່ເຫັນພ້ອມກັບການປະຕິ ຮູບເສດຖະກິດແລະການເມືອງເມື່ອບໍ່ດົນມານີ້ ຂອງມຽນມານັ້ນ ຫຼາຍກວ່າ.
ພົນເຮືອເອກ Nyan Tun ເຂົ້າຮັບໜ້າທີ່ ຊຶ່ງສ່ວນໃຫຍ່ແລ້ວແມ່ນຕຳ ແໜ່ງທາງພິທີການເທົ່ານັ້ນ ຫຼັງຈາກຖືກສະເໜີຊື່ໂດຍສະມາຊິກສະພາຝ່າຍທະຫານຂອງມຽນມາ ຊຶ່ງປະກອບໃນສັດສ່ວນນຶ່ງສ່ວນສີ່ຂອງທີ່ນັ່ງທັງໝົດໃນສະພາ ແລະມີສິດທີ່ຈະເລືອກເອົານຶ່ງ ໃນສອງຕໍາແໜ່ງຮອງປະທານາທິບໍດີ. ຜູ້ສະໜັກເຂົ້າຮັບຕໍາແໜ່ງຄົນທໍາອິດຂອງກອງທັບ ຄືທ່ານ Myint Swe ອະດີດຫົວໜ້າໜ່ວຍສືບລັບທະຫານນັ້ນ ບໍ່ໄດ້ຮັບການອະນຸມັດ.
ນັບຕັ້ງແຕ່ເຂົ້າມາບໍລິຫານປະເທດເມື່ອປີຜ່ານມານີ້ ທ່ານ ທຽນ ເຊນ ປະທານາທິບໍດີ ມຽນມາ ໄດ້ປ່ອຍນັກໂທດການເມືອງຫຼາຍຮ້ອຍຄົນອອກຈາກຄຸກ ໂຍະຍານຂໍ້ຈໍາກັດຮັດແຄບດ້ານການຂ່າວ ແລະພ້ອມກັບອະນຸຍາດໃຫ້ ທ່ານນາງອອງຊານ ຊູຈີ ຜູ້ນໍາປະຊາທິປະໄຕ ໄດ້ຖືກເລືອກຕັ້ງເປັນສະມາຊິກສະພາໄດ້ຢ່າງສໍາເລັດຜົນ.
