ເຮືອບິນລົບຂອງອອສເຕຣເລຍ ສະຫະລັດ ແລະອິນໂດເນເຊຍ ໄດ້ເຂົ້າຮ່ວມກັບເຮືອບິນ
ອື່ນໆຈາກ ສິງຄະໂປ ໄທ ແລະນີວຊີແລນດ໌ ໃນການຊ້ອມລົບ ຢູ່ເໜືອລັດດິນແດນພາກ
ເໜືອ ຫລື Northern Territory ຂອງອອສເຕຣເລຍ ໃນນີ້.
ຈາກາຕ້າແມ່ນໄດ້ສົ່ງເຮືອບິນລົບໄອພົ່ນ Sukhoi ທັນສະໄໝທີ່ສຸດຂອງຕົນ ໄປຮ່ວມ
ຊ້ອມລົບໃນຄັ້ງນີ້ນໍາ ຊຶ່ງບັນດານັກວິເຄາະກ່າວວ່າການເຄຶ່ອນໄຫວ ດັ່ງກ່າວນີ້ ເປັນການ
ໄຂສັກກະຫລາດໃໝ່ ຂອງການຮ່ວມມືກັນລະຫວ່າງສອງປະເທດເພື່ອນບ້ານ ໃນຂົງເຂດ
ເອເຊຍ-ປາຊິຟິກນັ້ນ.
Roy Medcalf ເປັນຜູ້ອໍານວຍການ ໂຄງການຄວາມໝັ້ນຄົງນານາຊາດ ປະຈໍາສະຖາບັນ
Lowy ຊຶ່ງເປັນກຸ່ມຄົ້ນຄ້ວາທີ່ມີສໍານັກງານຢູ່ນະຄອນຊິດນີ ປະເທດອອສເຕຣເລຍ.
ທ່ານ ເມັດແຄຟ ກ່າວວ່າ: “ແຕ່ໃດໆມາແລ້ວ ນີ້ແມ່ນການຊ້ອມລົບທີ່ພົວ ພັນກັບບັນດາ
ປະເທດ ທີ່ມີຄວາມສໍາພັນດ້ານການປ້ອງກັນປະເທດທີ່ໃກ້ຊິດກັບອອສເຕຣເລຍ. ສະນັ້ນ
ຈຶ່ງນັບວ່າເປັນຄວາມໄວ້ວາງໃຈກັນໃນລະດັບ ສູງພໍສົມຄວນເວລາເຮົານໍາເອົາເຮືອບິນລົບ
ທີ່ວ່າດີທີ່ສຸດຂອງເຮົາ ເຂົ້າມາຮ່ວມທໍາງານຢ່າງໃກ້ຊິດ ກັບອີກປະເທດນຶ່ງ. ດັ່ງນັ້ນ ການ
ທີ່ອິນໂດເນເຊຍ ເຕັມໃຈນໍາເອົາເຮືອບິນລົບຂອງຕົນ ມາຍັງອອສເຕຣເລຍເພື່ອຮ່ວມຊ້ອມ
ລົບກັນຄັ້ງນີ້ ຈຶ່ງເປັນສັນຍານເຖິງຄວາມໄວ້ວາງໃຈກັນທີ່ດີຂຶ້ນຫຼາຍ ໃນເລື່ອງຄວາມສໍາ
ພັນດ້ານປ້ອງກັນປະເທດນັ້ນ.”
ສາຍສໍາພັນທາງກອງທັບຂອງອອສເຕຣເລຍ ກັບອິນໂດເນເຊຍນັ້ນ ແມ່ນຢູ່ໃນສະພາບເຄັ່ງ
ຕຶງ ໃນໄລຍະຫຼາຍສິບປີບໍ່ດົນຜ່ານມານີ້. ຄວາມສໍາພັນດັ່ງ ກ່າວ ໄດ້ຮັບການທົດສອບຢ່າງ
ໜັກໃນປີ 1999 ເວລາທະຫານອອສເຕຣເລຍ ຖືກສົ່ງໄປຍັງປະເທດ ຕີມໍ ຕາເວັນອອກ ຫຼື
Timor Leste ເພື່ອປາບປາມການກໍ່ຮຸນແຮງຂອງກຸ່ມທະຫານບ້ານ ທີ່ຄັດຄ້ານການແບ່ງ
ແຍກດິນແດນ ອອກຈາກອິນໂດເນເຊຍນັ້ນ.
ໃນບໍ່ເທົ່າໃດປີຜ່ານມານີ້ ຄວາມສໍາພັນໄດ້ດີຂຶ້ນ ສ່ວນໃຫຍ່ແມ່ນເປັນຍ້ອນ ການຮັບມືກັບ
ການໂຈມຕີຂອງພວກກໍ່ການຮ້າຍ ໂຮມທັງເຫດການວາງລະເບີດສອງບັ້ນພ້ອມກັນ ທີ່ໄດ້
ສັງຫານ 202 ຄົນ ທີ່ເກາະຕາກອາກາດບາຫຼີ ເມື່ອປີ 2002 ແລະໄພພິບັດທໍາມະຊາດຕ່າງໆ
ໃນອິນໂດເນເຊຍ.
ທ່ານ ເມັດແຄຟ ກ່າວອີກວ່າ ການເຂົ້າພົວພັນໃນການຊ້ອມລົບກັບກໍາລັງທະຫານອອສເຕຣ
ເລຍ ແລະສະຫະລັດໃນຄັ້ງນີ້ ແມ່ນເປັນການໃຫ້ກໍາລັງໃຈເພີ່ມຂຶ້ນແກ່ສະຫະລັດ ວ່າ ອິນໂດ
ເນເຊຍຈະບໍ່ຄັດຄ້ານຕໍ່ແຜນການຂອງຕົນ ທີ່ຈະເຂົ້າໄປພົວພັນທາງທະຫານຫລາຍກວ່າເກົ່າ
ໃນຂົງເຂດເອເຊຍນັ້ນ
ທ່ານ ເມັດ ແຄຟ ກ່າວວ່າ: “ມີປະຊາຊົນຢູ່ໃນອາເມຣິກາ ທີ່ຢາກເຫັນອິນໂດເນເຊຍ ໃນລັກ
ສະນະເປັນປະເທດອິນເດຍໃໝ່. ນັ້ນຄື ເປັນພາຄີຍຸດທະສາດ ທີ່ມີຖານະຍັງບໍ່ເຖິງຂັ້ນເປັນ
ພັນທະມິດ ແຕ່ກໍເຫັນພ້ອມນໍາຢ່າງ ກວ້າງຂວາງ ກັບການມີໜ້າຂອງກອງທັບສະຫະລັດຢູ່
ໃນຂົງເຂດເອເຊຍ ເປັນປະເທດທີ່ມີມຸມມອງດ້ານປະຊາທິປະໄຕສູງ ປະເທດທີ່ສະໜັບສະໜຸນ
ລະບົບການຄ້າເສລີ ແລະການສື່ສານທາງທະເລ ພິທັກປົກປ້ອງເສລີພາບໃນການເດີນເຮືອ
ທີ່ຊາວອາເມຣິກັນຕ້ອງຫຼາຍທີ່ສຸດນັ້ນ. ດັ່ງນັ້ນ ຂ້າພະເຈົ້າ ຄິດວ່າ ອາເມຣິກາຢາກຈະເຫັນ
ອິນໂດເນເຊຍ ເປັນພາກສ່ວນນຶ່ງຂອງຍຸດທະສາດແຫ່ງພາກພື້ນເອເຊຍຂອງພວກເຂົາເຈົ້າ
ນັ້ນນໍາ.”
ການຊ້ອມລົບທີ່ໃຫ້ຊື່ວ່າ Pitch Black ນີ້ ຈະເລີ່ມຈາກວັນທີ 27 ກໍລະກົດນີ້ ໄປຈົນເຖິງ
ວັນທີ່ 17 ເດືອນສິງຫາ. ການຊ້ອມລົບແບບມີຫຼາຍຝ່າຍດັ່ງກ່າວນີ້ ມີຂຶ້ນທຸກໆສອງປີ
ຕະຫລອດໄລຍະຊາວປີຜ່ານມາ ແຕ່ການຊ້ອມລົບປະຈໍາປີນີ້ ແມ່ນຈະຍິ່ງໃຫຍ່ກວ່າຄັ້ງ
ໃດໆຜ່ານມາ.
ໂຄສົກກອງທັບອອສເຕຣເລຍຄົນນຶ່ງກ່າວວ່າ ຈະມີເຮືອບິນ 85 ລໍາ ແລະທະຫານຫຼາຍ
ກວ່າ 2000 ຄົນ ເຂົ້າປະກອບສ່ວນໃນການຊ້ອມລົບຄັ້ງນີ້.
