ກອງປະຊຸມສະໄໝສາມັນຄັ້ງທີ
3 ຂອງສະພາແຫ່ງຊາດລາວຊຸດ
ທີ 7 ໂດຍການເປັນປະທານຂອງ
ທ່ານນາງ ປານີ ຢາທໍຕູ້ນັ້ນ ໄດ້
ມີມະຕິເລືອກຕັ້ງໃຫ້ທ່ານນາງ
ວຽງທອງ ສີພັນດອນ ເປັນປະ
ທານອົງການກວດສອບແຫ່ງລັດ
ຜູ້ໃໝ່ ແທນທ່ານບົວສີ ລໍວັນໄຊ
ປະທານຜູ້ເກົ່າ ເມື່ອອາທິດຜ່ານ
ມານີ້.
ກ່ອນໜ້ານີ້ ທ່ານນາງ ວຽງທອງ ສີພັນດອນ ຊຶ່ງເປັນລູກສາວຂອງທ່ານຄໍາໄຕ ສີພັນດອນ,
ອະດີດປະທານປະເທດແລະປະທານພັກປະຊາຊົນປະຕິວັດລາວ ກໍເຄີຍດໍາລົງຕໍາແໜ່ງເປັນ
ລັດຖະມົນຕີຊ່ວຍວ່າການກະຊວງການເງິນ ແລະການໄດ້ຮັບຕໍາແໜ່ງໃໝ່ໃນຄັ້ງຫລ້າສຸດນີ້
ກໍປາກົດວ່າ ໄດ້ຮັບສຽງສະໜັບສະໜຸນຈາກສະມາຊິກສະພາແຫ່ງຊາດລາວຈໍານວນ 106
ສຽງຈາກຈໍານວນສະມາຊິກທີ່ເຂົ້າຮ່ວມໃນກອງປະຊຸມທັງໝົດ 120 ຄົນ. ນອກນີ້ ກໍຍັງຖືວ່າ
ທ່ານນາງວຽງທອງເປັນແມ່ຍິງຜູ້ທໍາອິດ ທີ່ໄດ້ຄອງຕໍາແໜ່ງດັ່ງກ່າວອີກດ້ວຍ.
ທ.ນ. ວຽງທອງ ສີພັນດອນປະທານອົງການກວດສອບແຫ່ງລັດຜູ້ໃໝ່ ແລະທ. ບົວສີ ລໍວັນໄຊ ປະທານຜູ້ເກົ່າ
ກອງປະຊຸມສະພາແຫ່ງຊາດລາວ
ຄັ້ງນີ້ ຈະດໍາເນີນໄປຈົນເຖິງວັນທີ
13 ກໍລະກົດ. ນອກຈາກການລົງ
ມະຕິເລືອກຕັ້ງປະທານອົງການ
ກວດສອບແຫ່ງລັດດັ່ງກ່າວແລ້ວ
ກໍຍັງມີວາລະທີ່ສໍາຄັນອື່ນໆ ທີ່
ຖືກຈັດເຂົ້າໃນການປະຊຸມອີກ 9
ວາລະດ້ວຍກັນ ໂດຍສະເພາະ
ແມ່ນວາລະກ່ຽວກັບການພິຈາ
ລະນາຮ່າງກົດໝາຍທີມີເຖິງ 7
ສະບັບທີ່ເປັນກົດໝາຍໃໝ່ 2 ສະບັບ ແລະກົດໝາຍເກົ່າທີ່ດັດແກ້ໃໝ່ 5 ສະບັບ.
ສ່ວນວາລະອື່ນໆທີ່ສໍາຄັນ ກໍປະກອບດ້ວຍການພິດຈາລະນາແລະຮັບຮອງເອົາລາຍງານ
ຂອງລັດຖະບານກ່ຽວກັບການຈັດຕັ້ງປະຕິບັດແຜນການພັດທະນາເສດຖະກິດ-ສັງຄົມ,
ແຜນງົບປະມານຂອງລັດປີ 2011-2012 ແລະທິດທາງວຽກງານສົກປີ 2012-2013
ການພິຈາລະນາບົດລາຍງານຂອງປະທານອົງການກວດສອບແຫ່ງລັດ, ຫົວໜ້າອົງການ
ໄອຍະການປະຊາຊົນສູງສຸດ, ປະທານສານປະຊາຊົນສູງສຸດ ແລະລັດຖະມົນຕີກະຊວງຍຸຕິ
ທໍາ ເປັນຕົ້ນ.
ນອກຈາກນີ້ ກໍຈະມີການລາຍງານກ່ຽວກັບການຈັດຕັ້ງເຄື່ອນໄຫວວຽກງານຂອງສະພາ
ແຫ່ງຊາດທີ່ໄດ້ຈັດຕັ້ງປະຕິບັດໃນຮອບ 1 ປີທີ່ຜ່ານມາ ລວມໄປເຖິງຮັບຟັງການປະກອບ
ຄວາມເຫັນຂອງຜູ້ຕາງໜ້າອົງການຈັດຕັ້ງຂອງພັກ-ລັດ ກໍຄື ແນວລາວສ້າງຊາດ ສະຫະພັນ
ກໍາມະບານລາວ, ສະຫະພັນແມ່ຍິງລາວ, ສູນກາງຊາວໜຸ່ມປະຕິວັດລາວແລະອົງການອື່ນໆ
ອີກ ຈໍານວນນຶ່ງ.
ທ່ານ ຄໍາເຜີຍ ປານມະໄລທອງ ສະມາຊິກສະພາແຫ່ງຊາດລາວ ຈາກເຂດນະຄອນຫຼວງວຽງຈັນ
ແຕ່ຢ່າງໃດກໍຕາມ ກອງປະຊຸມສະພາແຫ່ງຊາດລາວຄັ້ງນີ້
ກໍດໍາເນີນໄປໃນທ່າມກາງກະແສຂ່າວ ທີ່ຊ່າລືກັນອອກມາ
ຢ່າງຕໍ່ເນື່ອງວ່າ ທ່ານຄໍາເຜີຍ ປານມາໄລທອງ ສະມາຊິກ
ສະພາແຫ່ງຊາດລາວ ຈາກເຂດນະຄອນວຽງຈັນໄດ້ຖືກປົດ
ອອກຈາກຕໍາແໜ່ງກໍາມະການສູນກາງພັກ ແລະປະທານ
ສະຖາບັນວິທະຍາສາດສັງຄົມແຫ່ງຊາດ ໂດຍຍັງຄົງເຫຼືອ
ແຕ່ພຽງຕໍາແໜ່ງໃນສະພາແຫ່ງຊາດລາວເທົ່ານັ້ນ.
ຫາກແຕ່ວ່າຈົນເຖິງເວລານີ້ ກໍຍັງບໍ່ມີຖະແຫຼງການຈາກສູນ
ກາງພັກ ກ່ຽວກັບກະແສຂ່າວທີ່ຊ່າລືດັ່ງກ່າວນີ້ ໃນຂະນະ
ທີ່ກະແສສັງຄົມພາຍໃນລາວ ທີ່ເຊື່ອວ່າກະແສຂ່າວດັ່ງກ່າວ
ເປັນຄວາມຈິງນັ້ນ ກໍເຊື່ອວ່າ ເປັນຍ້ອນທ່ານຄໍາເຜີຍ ໄດ້ວິພາກວິຈານການນໍາພາທີ່ຜິດພາດ
ທາງດ້ານການສຶກສາດັ່ງທີ່ທ່ານໄດ້ປະກອບຄວາມເຫັນຕໍ່ກອງປະຊຸມສະພາແຫ່ງຊາດລາວ
ຄັ້ງກ່ອນ ໃນຕອນນຶ່ງວ່າ:
“ເຮົາເຮັດສຶກສາໃຫ້ຄົນນີ້ວ່າຄ່ານິຍົມມັນບໍ່ຖືກ ຄັນວ່າບໍ່ເອົາຄວາມຈົ່ງຮັກພັກດີຕໍ່ຜູ້ນັ້ນ
ຜູ້ນີ້ ຈົ່ງຮັກພັກດີຕໍ່ລັດທິນັ້ນລັດທິນີ້ ແມ່ນການເມືອງໜັກແໜ້ນ ແຕ່ວ່າລັດທິອັນນັ້ນ
ແມ່ນອີສັງຫວາ ຕົວຢ່າງແມ່ນລັດທິມາກສ໌ ເລນິນ ວ່າຊັ້ນ ກໍແມ່ນແນວຄິດຂອງທ່ານ
ມາກສ໌ ທ່ານເລນີນ ເພີ່ນສ້າງສັງຄົມນິຍົມຢູ່ເອີຣົບພຸ້ນນະ ໃນສັດຕະວັດທີ່ 19 ຢູ່ຣັດເຊຍ
ສັດຕະວັດທີ 20 ເຮົາສ້າງສັງຄົມນິຍົມສ້າງຢູ່ບ້ານເຮົາ ຄົນລາວ ສັງຄົມລາວ ເປັນຫຍັງ
ຈະຕ້ອງເອົາແນວທາງການເມືອງຂອງຜູ້ອື່ນນັ້ນ ມາເປັນພື້ນຖານໃຫ້ແນວທາງການເມືອງ
ຂອງພວກເຮົາ.”
ແຕ່ຢ່າງໃດກໍຕາມ ທ່ານຄໍາເຜີຍກໍຍັງເຂົ້າຮ່ວມກອງປະຊຸມສະໄໝສາມັນຄັ້ງທີ່ 3 ຂອງສະພາ
ແຫ່ງຊາດລາວ ທີ່ກໍາລັງດໍາເນີນກອງປະຊຸມຢູ່ໃນເວລານີ້ຕາມປົກກະຕິ ແລະທ້າຍເດືອນມີນາ
ຜ່ານມາປີນີ້ ທ່ານກໍຍັງໄດ້ເປັນຫົວໜ້າຄະນະຜູ້ແທນສູນກາງພັກ ໃນການເດີນທາງໄປຢ້ຽມ
ຢາມຈີນ ຕາມການເຊື້ອເຊີນຂອງສູນກາງພັກຄອມມີວນີສຈີນ ຢ່າງເປັນທາງການອີກດ້ວຍ.