ອິງຕາມລາຍຊື່ປະຈໍາປີທີ່ລຽບລຽງໂດຍວາລະສານການເງິນ Forbes ໃນສະຫະລັດກໍແມ່ນວ່າ ທ່ານ Robin Li ຜູ້ກໍ່ຕັ້ງກົນໄກ ຊອກຫາຂ່າວຂໍ້ມູນທາງອິນເຕີແນັທ ຄືບໍລິສັດ Baidu Internet ທີ່ຜູ້ຄົນນິຍົມໃຊ້ກັນຫລາຍໃນຈີນ ເປັນຄົນຮັ່ງມີທີ່ສຸດຂອງຈີນ ຊຶ່ງມີຊັບສິນມູນຄ່າ 9 ພັນລ້ານໂດລາສະຫະລັດ. ເວົ້າລວມແລ້ວ ທ່ານຫລີ ແມ່ນຕິດອັນດັບທີ 95 ຢູ່ໃນບັນຊີລາຍຊື່ຜູ້ຄົນຮັ່ງມີທີ່ສຸດຂອງໂລກ ອີງຕາມວາລະສານ Forbes ນັ້ນ. ສ່ວນທ່ານ Liang Wengen ນັກອຸດສາຫະກໍາ ຊຶ່ງເປັນມະຫາເສດຖີພັນລ້ານທີ່ຮັ່ງອັນດັບ 2 ຂອງຈີນນັ້ນ ຕິດອັນດັບທີ 114 ຂອງໂລກ.
ບັນຊີຂອງວາລະສານ Forbes ສະແດງວ່າ ມີພວກມະຫາເສດຖີເງິນພັນລ້ານທັງໝົດ 1210 ຄົນໃນທົ່ວໂລກ. ໃນນັ້ນ 199 ຄົນແມ່ນໄດ້ຂຶ້ນມາຕິດອັນດັບມະຫາເສດຖີພັນລ້ານ ເປັນເທື່ອທໍາອິດ. ໃນບັນດາ ພວກມະຫາເສດຖີໃໝ່ເຫລົ່ານີ້ ຫລາຍກວ່າເຄິ່ງນຶ່ງແມ່ນມາຈາກພວກປະເທດ ທີ່ເອີ້ນວ່າກຸ່ມ BRIC ອັນມີ ບຣາຊິລ, ຣັດເຊຍ ອິນເດຍ ແລະຈີນ (ຫຍໍ້ມາຈາກ Brazil, Russia, India, China). ຣັດເຊຍມີມະຫາເສດຖີເງິນພັນລ້ານ 101 ຄົນຢູ່ໃນບັນຊີ ຊຶ່ງໃນນັ້ນ 79 ຄົນແມ່ນອາໄສຢູ່ໃນກຸງມອສກູ ເຮັດໃຫ້ນະຄອນດັ່ງ ກ່າວເປັນນະຄອນຫລວງຂອງມະຫາເສດຖີເງິນພັນລ້ານຂອງໂລກ.
ວາລະສານ Forbes ກ່າວວ່າ ຈໍານວນມະຫາເສດຖີເງິນພັນລ້ານໃນພາກພື້ນເອເຊຍປາຊີຟິກທັງໝົດ ໃນປັດຈຸບັນນີ້ ແມ່ນມີຢູ 332 ຄົນ ສົມທຽບໃສ່ 234 ຄົນເມື່ອນຶ່ງປີຜ່ານມາ. ສ່ວນຢູ່ໃນສະຫະລັດນັ້ນ ແມ່ນມີມະຫາເສດຖີເງິນພັນລ້ານຢູ່ 413 ຄົນ ແລະໃນຢູໂຣບ 300 ຄົນ.
ທ່ານ Carlos Slim ເຈົ້າຂອງບໍລິສັດໂທລະຄົມມະນາຄົມຍັກໃຫຍ່ ຂອງເມັກຊິໂກ ແມ່ນມະຫາເສດຖີພັນລ້ານອັນດັບນຶ່ງຂອງໂລກ ເປັນປີທີສອງລຽນຕິດ ຊຶ່ງມີຊັບສິນເປັນມູນຄ່າປະມານ 74 ພັນລ້ານໂດລາສະຫະລັດ. ທ່ານ Bill Gates ຜູ້ກໍ່ຕັ້ງບໍລິ ສັດ Microsoft ຂອງສະຫະ ລັດ ທີ່ເຄີຍຄອງຕໍ່ແໜ່ງນີ້ມາກ່ອນນັ້ນ ບັດນີ້ແມ່ນຢູ່ໃນອັນດັບ 2 ໂດຍມີຊັບສິນເປັນມູນຄ່າທັງໝົດ 56 ພັນລ້ານໂດລາ.
