ບັນດາເຈົ້າໜ້າທີ່ໃນເຢເມນກ່າວວ່າ ຍົນທີ່ສົງໃສວ່າເປັນຍົນບໍ່ມີຄົນຂັບ ຫລືໂດຣນ ຂອງສະຫະລັດນັ້ນ ໄດ້ສັງຫານພວກກົວຕໍ່ສູ້ຂອງກຸ່ມອາລ ຄາອີດາ ຢ່າງໜ້ອຍ 11 ຄົນຢູ່ໃນເຂດພາກໃຕ້ຂອງເຢເມນ.
ບັນດາເຈົ້າໜ້າທີ່ທ້ອງຖິ່ນຂອງເຢເມນ ກ່າວວ່າ ພວກຫົວຮຸນແຮງ ຢ່າງໜ້ອຍນຶ່ງຄົນໃນຈໍານວນດັ່ງກ່າວ ທີ່ຖືກສັງຫານຢູ່ໃກ້ເຂດຊາຍແດນແຂວງ Marib ແລະ ແຂວງ Shabwa ນັ້ນ ແມ່ນເປັນຄົນສັນຊາດອີຈິບ.
ວໍຊິງຕັນຍັງບໍ່ຮັບຮູ້ວ່າ ສະຫະລັດເປັນຜູ້ຢູ່ເບື້ອງຫລັງການໂຈມຕີເມື່ອວັນ ເສົານັ້ນຫລືບໍ່.
ການໂຈມຕີໂດຍຍົນບໍ່ມີຄົນຂັບຫລືໂດຣນ ໄດ້ມີເພີ່ມຂື້ນຢູ່ ໃນເຂດພາກໃຕ້ຂອງເຢເມນ ນັບຕັ້ງແຕ່ທ່ານ Abed Rabbo Mansour Hadi ປະທາ ນາທິບໍດີຄົນໃໝ່ຂອງເຢເມນເຂົ້າມາຮັບຕໍາແໜ່ງໃນເດືອນກຸມພາຜ່ານມານີ້.
ສາຂາຂອງກຸ່ມອາລຄາອີດາໃນປະເທດເຢເມນ ທີ່ເອີ້ນວ່າ ອາລຄາອີດາໃນເຂດແຫລມອາຣັບ ແມ່ນຮູ້ກັນວ່າ ເປັນກຸ່ມນຶ່ງທີ່ອັນຕະລາຍທີ່ສຸດ.
ການໂຈມຕີໃນມື້ວານນີ້ ແມ່ນມີຂຶ້ນນຶ່ງອາທິດຫລັງຈາກບັນດາເຈົ້າໜ້າທີ່ກ່າວວ່າ ການໂຈມຕີທາງອາກາດບັ້ນນຶ່ງຂອງສະຫະລັດ ໄດ້ສັງຫານນາຍ Fahd al-Quso ຜູ້ນໍາອາວຸໂສຂອງກຸ່ມອາລຄາອີດາ ໃນແຂວງ Shabwa ນັ້ນ.
ສະຖານທູດເຢເມນທີ່ນະຄອນຫລວງວໍຊິງຕັນ ກ່າວວ່າ ນາຍ ຄູໂຊ ເປັນຜູ້ນຶ່ງໃນບັນດາພວກກໍ່ການຮ້າຍທີ່ຕ້ອງການຕົວຫລາຍທີ່ສຸດ ໃນເຢເມນ.