ສື່ມວນຊົນຂອງທາງການຈີນກ່າວວ່າ ນັກເຄື່ອນໄຫວຕາບອດທີ່ເອົາຕົວຫລົບໜີຈາກການຖືກກັກບໍລິເວນ ແລະເຂົ້າໄປຫາສະຖານທູດສະຫະລັດ ທີ່ກຸງປັກກິ່ງນັ້ນ ແມ່ນໄດ້ອອກຈາກສະຖານທູດໄປແລ້ວ ເພື່ອໄປປິ່ນປົວ ແລະເຕົ້າໂຮມກັບຄອບຄົວຂອງທ່ານ.
ເຈົ້າໜ້າທີ່ກະຊວງຕ່າງປະເທດສະຫະລັດຄົນນຶ່ງໄດ້ບອກພວກນັກຂ່າວໃນ ວັນພຸດມື້ນີ້ວ່າ ລັດຖະບານຈີນໄດ້ຕົກລົງ ທີ່ຈະຍ້າຍທ່ານ Chen Guangcheng ໄປຢູ່ບ່ອນທີ່ປອດໄພ ໃນປະເທດຈີນ. ເຈົ້າໜ້າທີ່ກ່າວວ່າ ທ່ານ Chen ບໍ່ໄດ້ຂໍລີ້ໄພການເມືອງໃນສະຫະລັດ.
ອົງການຂ່າວຊິນຫົວຂອງທາງການຈີນ ໄດ້ລາຍງານຂ່າວການອອກໄປຈາກສະຖານທູດສະຫະລັດ ຂອງທ່ານ Chen Guangcheng ເມື່ອຕອນເຊົ້າວັນພຸດມື້ນີ້. ລາຍງານເວົ້າວ່າ ທ່ານໄດ້ພັກເຊົາຢູ່ທີ່ນັ້ນຫົກມື້ ກ່ອນຈະອອກໄປດ້ວຍການຕັດສິນໃຈຂອງຜູ້ກ່ຽວເອງ. ກະຊວງຕ່າງປະເທດຈີນໄດ້ທວງໃຫ້ສະຫະລັດຂໍຂະມາໂທດ ທີ່ໄດ້ຮັບເອົາທ່ານ Chen ເຂົ້າໄປໃນສະຖານທູດ ໂດຍກ່າວວ່າ ເປັນການແຊກແຊງເຂົ້າໃນກິດຈະການພາຍໃນຂອງຈີນ ທີ່ຮັບເອົາບໍ່ໄດ້. ກະຊວງຕ່າງປະເທດຈີນຍັງເວົ້າອີກວ່າ ວໍຊິງຕັນຄວນຈະໃຫ້ການຮັບປະກັນວ່າ ຈະບໍ່ໃຫ້ພວກທີ່ບໍ່ພໍໃຈລັດຖະບານຄົນອື່ນໆ ເຂົ້າໄປຫລົບໄພອີກ.
ກ່ອນໜ້ານັ້ນ ໃນເຊົ້າວັນພຸດມື້ນີ້ ບົດບັນນາທິການບົດນຶ່ງ ໃນໜັງສືພິມ Global Times ຊຶ່ງເປັນໜັງສືພິມໃນເຄືອຂ່າຍ ຂອງພັກຄອມມີວນີສຈີນ ບໍ່ໄດ້ໃຫ້ຄວາມສໍາຄັນໃດໆຕໍ່ກໍລະນີຂອງທ່ານ Chen ໂດຍກ່າວວ່າມັນຈະບໍ່ກະທົບ ກະເທືອນຕໍ່ຄວາມສໍາພັນລະຫວ່າງຈີນແລະສະຫະລັດ ແຕ່ຢ່າງໃດ.
ລາຍງານຫລາຍສະບັບເວົ້າວ່າ ເອກອັກຄະລັດຖະທູດສະຫະລັດ ທ່ານ Gary Locke ເປັນຜູ້ພາທ່ານ Chen ໄປຍັງໂຮງໝໍແຫ່ງນຶ່ງໃນກຸງປັກກິ່ງ ເພື່ອໄປພົບພໍ້ກັບຄອບຄົວຂອງລາວ.
ກໍລະນີດັ່ງກ່າວນີ້ ໄດ້ເປັນເງົາບົດບັງການເຈລະຈາປະຈໍາປີລະດັບສູງລະຫວ່າງເຈົ້າໜ້າ ທີ່ຈີນ ແລະສະຫະລັດ ຊຶ່ງທັງສອງຝ່າຍຕ່າງກໍປະຕິເສດບໍ່ຍອມໃຫ້ຄວາມເຫັນໃດໆກ່ຽວກັບບັນຫາດັ່ງກ່າວ ກ່ອນວັນພຸດມື້ນີ້.
ການອອກໄປຈາກສະຖານທູດສະຫະລັດຂອງທ່ານ Chen ແມ່ນມີຂຶ້ນບໍ່ ເທົ່າໃດຊົ່ວໂມງ ຫລັງຈາກທ່ານນາງລັດຖະມົນຕີຕ່າງປະເທດ Hillary Clinton ເດີນທາງໄປເຖິງຈີນເພື່ອເຈລະ ຈາເລຶ່ອງຄວາມໝັ້ນຄົງແລະເສດຖະກິດເປັນເວລາສອງມື້ ທີ່ຈະເລີ່ມຂື້ນວັນພະຫັດມື້ອື່ນນີ້.
.