ແມ່ຍິງ ກຳປູເຈຍ ຄົນນຶ່ງເວົ້າວ່າ “ລາວໄດ້ໃຊ້ຄວາມຮຸນແຮງຕໍ່ຂ້ອຍຢ່າງໂຫດຮ້າຍ. ລາວຕີຂ້ອຍ. ລາວບີບຄໍຂ້ອຍ. ຂ້ອຍບໍ່ສະບາຍໃຈຫຼາຍ ເວລາທີ່ຂ້ອຍຢູ່ກັບລາວ, ແລະ ສຸຂະພາບຈິດຂອງຂ້ອຍແມ່ນບໍ່ຄົງທີ່ຫຼາຍ.
“ນ້ຳຕາຂອງຂ້ອຍເກືອບຍ້ອຍ,” ເວລາທີ່ນາງ ແທັດ ຈັນທີ, ແມ່ຍິງອາຍຸ 35 ປີຈາກແຂວງ ກຳປົງ ຈາມ ທາງພາກຕາເວັນອອກສຽງໃຕ້ຂອງ ກຳປູເຈຍ ເລົ່າກ່ຽວກັບການໃຊ້ຊີວິດກັບອະດີດສາມີຂອງລາວ.
ນາງ ຈັນທີ, ຜູ້ທີ່ເຮັດວຽກເປັນກຳມະກອນຕັດຫຍິບ, ຕອນນີ້ກຳລັງດີ້ນຮົນທີ່ຈະລ້ຽງລູກສອງຄົນ ຫຼັງຈາກຊີວິດແຕ່ງງານທີ່ນາງອະທິບາຍດັ່ງກັບ ຖືກທາສີດ້ວຍຄວາມລະເລີຍ ແລະ ຄວາມຮຸນແຮງ.
ການຫຼົບໜີຈາກຄວາມຮຸນແຮງໄດ້ເຮັດໃຫ້ລາວໂດດດ່ຽວໃນສັງຄົມ ທີ່ສືບຕໍ່ວິຈານແມ່ຍິງທີ່ຢ່າຮ້າງວ່າ ລົ້ມແຫຼວໃນບົດບາດຕົ້ນຕໍທາງສັງຄົມຂອງການເປັນພັນລະຍາ ແລະ ແມ່ຂອງເຂົາເຈົ້າ. ນາງ ຈັນທີ ໄດ້ຮັບການປອບໃຈໃນການສະໜັບສະໜູນຂອງຄອບຄົວຂອງລາວ. ນາງກ່າວວ່າ “ຂ້ອຍຮູ້ສຶກເສຍໃຈສຳລັບລູກຊາຍສອງຄົນຂອງຂ້ອຍ ຫຼັງຈາກຂ້ອຍໄດ້ຢ່າຮ້າງກັບຜົວຂອງຂ້ອຍ, ຫຼາຍຄົນໄດ້ວິຈານຂ້ອຍ ສຳລັບການຢ່າຮ້າງ, ແຕ່ໂຊກດີທີ່ພໍ່ແມ່ ແລະ ເອື້ອຍຂອງຂ້ອຍ ໄດ້ໃຫ້ການສະໜັບສະໜູນຂ້ອຍ.”
ໃນລາຍງານຄັ້ງຫຼ້າສຸດ ຊື່ວ່າ “ແຍກທາງ,” ທີ່ຖືກເປິດເຜີຍເມື່ອທ້າຍປີ 2023 ໂດຍອົງການບໍ່ຫວັງຜົນກຳໄລຂະໜາດນ້ອຍ ຊື່ວ່າ Klahaan, ໄດ້ເຮັດໃຫ້ມີຄວາມເຂົ້າໃຈງ່າຍຂຶ້ນ ກ່ຽວກັບ ການດີ້ນຮົນທີ່ແມ່ຮ້າງຊາວກຳປູເຈຍ ໄດ້ປະເຊີນ. ນອກຈາກທົນກັບຄວາມອັບອາຍຂາຍໜ້າໃນສັງຄົມຢ່າງຫຼວງຫຼາຍ ແລະ ການວິຈານແລ້ວ, ລາຍງານເວົ້າວ່າ ແມ່ຍິງທີ່ຢ່າຮ້າງທັງຫຼາຍແມ່ນມີຄວາມເປັນໄປໄດ້ສູງກວ່າ ທີ່ຈະປະເຊີນກັບບັນຫາດ້ານການເງິນ ແລະ ທາງຈິດ ທຽບໃສ່ອະດີດສາມີຂອງເຂົາເຈົ້າ.
ລາຍງານຍັງໄດ້ພົບວ່າ ມີການປ່ຽນແປງພຽງໜ້ອຍດຽວ ນັບຕັ້ງແຕ່ການສຶກສາເມື່ອເດືອນພະຈິກ 2015 ໂດຍກະຊວງສະຖິຕິຂອງກຳປູເຈຍ ຮ່ວມກັບອົງການຂອງສະຫະປະຊາຊາດ ທີ່ພົບວ່າ ປະມານ 20 ເປີເຊັນຂອງແມ່ຍິງ ກຳປູເຈຍ ໄດ້ປະເຊີນກັບຄວາມຮຸນແຮງຕໍ່ຮ່າງກາຍ ແລະ ຫຼື ເພດຈາກຄູ່ຮັກຂອງເຂົາເຈົ້າໃນລະຫວ່າງການຄົບຫາກັນ ລວມທັງຊີວິດແຕ່ງງານ. ລາຍງານຍັງຄົ້ນພົບການລະເມີດທາງຈິດໃຈ ໄດ້ກະທົບຕໍ່ແມ່ຍິງຈຳນວນນຶ່ງສ່ວນສາມ, ຄວາມຮຸນແຮງມັກເກີດຂຶ້ນຢູ່ຕໍ່ໜ້າລູກ, ແລະ ມີຜູ້ເຄາະຮ້າຍໜ້ອຍຄົນຫຼາຍ ທີ່ໄດ້ພະຍາຍາມຫາການຊ່ວຍເຫຼືອ.
ຟໍຣັມສະແດງຄວາມຄິດເຫັນ