ອະດີດຜູ້ພິມເຜີຍແຜ່ໜັງສືພິມຮວບຮວມຂ່າວສານ ທ່ານເດວິດ ແພັກເກີ້ (David Pecker) ໄດ້ກັບຄືນມາເປັນພະຍານອີກຄັ້ງໃນວັນພະຫັດມື້ນີ້ ຢູ່ທີ່ການດຳເນີນຄະດີທາງອາຍາໃນນະຄອນນິວຢອກຂອງ ທ່ານດໍໂນລ ທຣໍາ. ທ່ານມາເພື່ອຕອບຄໍາຖາມເພີ້ມເຕີມກ່ຽວກັບວິທີທີ່ ລາວ ຊື້ເລື້ອງລາວຂອງນາງແບບໜັງສື Playboy ຄົນນຶ່ງ ຜູ້ທີ່ໄດ້ກ່າວອ້າງວ່າມີຄວາມສໍາພັນກັບປະທານາທິບໍດີໃນອະນາຄົດເປັນເວລາຍາວນານຫຼາຍເດືອນ ແລະຫຼັງຈາກນັ້ນກໍລຶບລ້າງມັນອອກເພື່ອປົກປ້ອງໜ້າທີ່ທາງດ້ານການເມືອງຂອງ ທ່ານທຣໍາ.
ໃນຊ່ວງພັກການພິຈາລະນາຄະດີໃນວັນອັງຄານແລ້ວນີ້, ທ່ານ ແພັກເກີ້ ໄດ້ເລີ້ມໃຫ້ການເປັນພະຍານກ່ຽວກັບການຈ່າຍເງິນ 150,000 ໂດລາ ທີ່ທ່ານໄດ້ຈ່າຍໃຫ້ກັບ ນາງຄາເຣັນ ເມັກດູໂກລ (Karen McDougal), ຜູ້ທີ່ເປັນນາງແບບປະຈໍາປີ 1998 ຂອງວາລະສານດັ່ງກ່າວ. ໄອຍະການ ຍັງບໍ່ໄດ້ຖາມທ່ານ ແພັກເກີ້ ວ່າ ຂໍ້ຕົກລົງດັ່ງກ່າວນັ້ນ ເກີດຂຶ້ນກ່ອນການເລືອກຕັ້ງປີ 2016 ຂອງ ທ່ານ ທຣໍາ ແລະບົດບາດຂອງທ່ານໃນການຕົກລົງເຫັນດີຈ່າຍເງິນນັ້ນແນວໃດ. ແຕ່ ທ່ານ ທຣໍາ ກໍໄດ້ປະຕິເສດຕໍ່ເລື້ອງດັ່ງກ່າວມານັ້ນ.
ໃນການພິຈາລະນາຄະດີອາຍາຄັ້ງທຳອິດຂອງອະດີດປະທານາທິບໍດີສະຫະລັດ, ທ່ານ ທຣໍາ ໄດ້ຖືກກ່າວຫາວ່າປອມແປງບັນທຶກທາງດ້ານທຸລະກິດ ສໍາລັບປົກປິດການຊຳລະເງິນປິດປາກອີກ 130,000 ໂດລາ ໃຫ້ກັບນັກສະແດງຮູບເງົາຜູ້ໃຫຍ່ ນາງສຕອມມີ ເດນຽລ ເພື່ອເຮັດໃຫ້ນາງມິດງຽບກ່ອນການເລືອກຕັ້ງ ກ່ຽວກັບການຮຽກຮ້ອງຂອງນາງໃນການນັດພົບກັນກັບ ທ່ານ ທຣໍາ ນຶ່ງຄືນ ໃນຊ່ວງທົດສະວັດກ່ອນໜ້ານີ້, ເຊິ່ງ ທ່ານ ທຣໍາ ຍັງໄດ້ປະຕິເສດຕໍ່ການກ່າວອ້າງຂອງນາງອີກດ້ວຍ.
ໃນຂະນະທີ່ການໃຫ້ການເປັນພະຍານຂອງ ທ່ານ ແພັກເກີ້ ຍັງຄົງດໍາເນີນຕໍ່, ທ່ານ ທຣໍາ ກໍກໍາລັງປະເຊີນກັບບັນຫາທາງດ້ານກົດຫມາຍທີ່ສໍາຄັນອີກອັນນຶ່ງໃນວັນພະຫັດມື້ນີ້, ນຶ່ງໃນທະນາຍຄວາມຂອງທ່ານ ຈະທໍາການໂຕ້ແຍ້ງຢູ່ສານສູງສຸດຂອງສະຫະລັດໃນນະຄອນຫຼວງວໍຊິງຕັນວ່າ ທ່ານ ທຣໍາ ຕ້ອງເປັນໄດ້ຮັບການຄຸ້ມກັນຈາກການດຳເນີນຄະດີທີ່ທ່ານໄດ້ກະທໍາໃນຂະນະເປັນປະທານາທິບໍດີ ເພື່ອພະຍາຍາມຕ່າວປີ້ນການສູນເສຍການເລືອກຕັ້ງປີ 2020 ໃຫ້ແກ່ປະທານາທິບໍດີ ໂຈ ໄບເດັນ.
ການກ່າວຟ້ອງທາງອາຍາຂອງ ທ່ານ ທຣໍາ ຢູ່ນະຄອນຫຼວງວໍຊິງຕັນ ທີ່ກ່າວຫາທ່ານວ່າ ວາງແຜນການແບບຜິດກົດຫມາຍທີ່ຈະຕ່າວປີ້ນຜົນການເລືອກຕັ້ງຂອງປີ 2020 ເພື່ອໃຫ້ຕົນເອງຢູ່ໃນອໍານາດຕໍ່ນັ້ນ ແມ່ນຖືກໂຈະໄວ້ ໃນຂະນະທີ່ກໍລະນີການຄຸ້ມກັນ ໄດ້ຮັບການພິຈາລະນາແລ້ວ. ໂດຍລວມແລ້ວ, ທ່ານ ທຣໍາ ກໍາລັງປະເຊີນກັບ 88 ຂໍ້ກ່າວຫາ ໃນການຮ້ອງຟ້ອງ 4 ຄະດີ, ເຊິ່ງທ່ານໄດ້ປະຕິເສດໃນຂໍ້ກ່າວຫາທັງໝົດ.
ທ່ານ ທຣໍາ ໄດ້ຂໍໃຫ້ຜູ້ພິພາກສາສານສູງສຸດຂອງນະຄອນນິວຢອກ ທ່ານຮວນ ເມີຊານ (Juan Merchan) ຍົກເລີກການພິຈາລະນາຄະດີໃນວັນພະຫັດມື້ນີ້ ເພື່ອໃຫ້ທ່ານສາມາດເຂົ້າຮ່ວມການພິຈາລະນາຄະດີຂອງສານສູງສຸດ, ແຕ່ ທ່ານ ເມີຊານ ໄດ້ປະຕິເສດຕໍ່ການຮ້ອງຂໍດັ່ງກ່າວ.
ຟໍຣັມສະແດງຄວາມຄິດເຫັນ