ໃນການຟ້ອງຮ້ອງຕໍ່ຄວາມເສຍຫາຍທີ່ຮ້າຍແຮງ ກ່ຽວກັບ ການຮັກສາຄວາມປອດໄພ ແລະ ຄວາມໂປ່ງໃສຂອງບໍລິສັດ ໄມໂຄຣຊັອຟ, ຄະນະກຳມະການເພຶ່ອການທົບທວນຄືນ ທີ່ຖືກແຕ່ງຕັ້ງໂດຍລັດຖະບານທ່ານ ໄບເດັນ ໄດ້ອອກລາຍງານສະບັບນຶ່ງ ເມື່ອວັນອັງຄານຜ່ານມາ ທີ່ເວົ້າວ່າ “ຄວາມຜິດພາດຢ່າງຫຼວງຫຼາຍ” ໂດຍບໍລິສັດຍັກໃຫຍ່ດ້ານເທັກໂນໂລຈີນັ້ນ ໄດ້ເຮັດໃຫ້ພວກປະຕິບັດການທາງໄຊເບີຂອງຈີນ ທີ່ໄດ້ຮັບການໜູນຫຼັງໂດຍລັດຖະບານ ລັກເຈາະເຂົ້າໄປໃນບັນຊີຕ່າງໆຂອງບັນດາເຈົ້າໜ້າທີ່ອາວຸໂສ ສະຫະລັດ ລວມທັງລັດຖະມົນຕີກະຊວງການຄ້າ ທ່ານນາງ ຈີນາ ຣາຍມອນໂດ.
ຄະນະກຳມະການທົບທວນຄືນດ້ານຄວາມປອດໄພທາງຄອມພິວເຕີ, ທີ່ຖືກຕັ້ງຂຶ້ນໃນປີ 2021 ໂດຍດຳລັດປະທານາທິບໍດີ, ໄດ້ອະທິບາຍການປະຕິບັດການຮັກສາຄວາມປອດໄພທາງຄອມພິວເຕີ ນັ້ນ ແມ່ນມີຄຸນນະພາບບໍ່ດີ, ບັນທັດຖານທີ່ບໍ່ແໜ້ນໜາຂອງບໍລິສັດ ແລະ ການຂາດຄວາມຈິງໃຈ ກ່ຽວກັບ ຄວາມຮູ້ຂອງບໍລິສັດ ກ່ຽວກັບການລະເມີດທີ່ຖືກແນເປົ້າໃສ່, ເຊິ່ງໄດ້ສົ່ງຜົນກະທົບຕໍ່ຫຼາຍອົງການຂອງ ສະຫະລັດ ທີ່ພົວພັນກັບ ຈີນ.
ເຂົາເຈົ້າໄດ້ສະຫຼຸບວ່າ “ວິທີການຮັກສາຄວາມປອດໄພຂອງບໍລິສັດໄມໂຄຣຊັອຟ ແມ່ນບໍ່ພຽງພໍ ແລະ ຕ້ອງໄດ້ມີການປັບປຸງໃໝ່” ຍ້ອນການມີຢູ່ທົ່ວໄປ ແລະ ບົດບາດທີ່ສຳຄັນຂອງບໍລິສັດດັ່ງກ່າວ ໃນລະບົບນິເວດເທັກໂນໂລຈີຂອງໂລກ. ຜະລິດຕະພັນຂອງ ໄມໂຄຣຊັອຟ “ໄດ້ຮອງຮັບການບໍລິການທີ່ສຳຄັນຕ່າງໆທີ່ສະໜັບສະໜູນຄວາມໝັ້ນຄົງແຫ່ງຊາດ, ພື້ນຖານຂອງເສດຖະກິດຂອງພວກເຮົາ ແລະ ສາທາລະນະສຸກ ແລະ ຄວາມປອດໄພ.”
ຄະນະກຳມະການນັ້ນໄດ້ກ່າວວ່າ ການລ່ວງລ້ຳ, ທີ່ຖືກຄົ້ນພົບໃນເດືອນມິຖຸນາປີກາຍນີ້ ໂດຍກະຊວງການຕ່າງປະເທດ ແລະ ຢ້ອນກັບຄືນໄປຫາເດືອນພຶດສະພານັ້ນ, “ແມ່ນສາມາດປ້ອງກັນໄດ້ ແລະ ບໍ່ຄວນທີ່ຈະເກີດຂຶ້ນເລີຍ,” ແລະ ເຂົາເຈົ້າໄດ້ຖິ້ມໂທດໃນຄວາມສຳເລັດຂອງພວກເຂົາໃສ່ “ຄວາມຜິດພາດຢ່າງຫຼວງຫຼາຍທີ່ສາມາດຫຼີກລ່ຽງໄດ້.” ຄະນະກຳມະການໄດ້ເວົ້າວ່າ, ຍິ່ງໄປກວ່ານັ້ນ, ໄມໂຄຣຊັອຟ ຍັງບໍ່ຮູ້ວ່າ ພວກນັກເຈາະຂໍ້ມູນເຂົ້າໄປໄດ້ແນວໃດ.
ຄະນະກຳມະການໄດ້ໃຫ້ຄຳແນະນຳຕ່າງໆຢ່າງເດັດຂາດ, ລວມທັງຮຽກຮ້ອງໃຫ້ ໄມໂຄຣຊັອຟ ຢຸດການເພີ່ມ ຄຸນສົມບັດຕ່າງໆເຂົ້າໃສ່ການບໍລິການທາງຄອມພິວເຕີຂອງເຂົາເຈົ້າ ຈົນກວ່າ “ຈະມີການປັບປຸງຢ່າງເປັນຮູບປະທຳ.”
ເຂົາເຈົ້າໄດ້ກ່າວວ່າ ຜູ້ບໍລິຫານໃຫຍ່ຂອງ ໄມໂຄຣຊັອຟ ແລະ ຄະນະກຳມະການ ຄວນທຳ “ການປ່ຽນແປງບັດທັດຖານຢ່າງວ່ອງໄວ,” ລວມທັງການແລກປ່ຽນ “ແຜນການຢ່າງເປີດເຜີຍພ້ອມກັບເສັ້ນເວລາທີ່ສະເພາະເຈາະຈົງ ເພື່ອທຳການປະຕິຮູບພື້ນຖານ, ທີ່ເພັ່ງເລັງໃສ່ການຮັກສາຄວາມປອດໄພທົ່ວບໍລິສັດ ແລະ ຜະລິດຕະພັນຄົບຊຸດຂອງເຂົາເຈົ້າ.”
ຟໍຣັມສະແດງຄວາມຄິດເຫັນ