ກຸ່ມປະກອບອາວຸດທີ່ມີອໍານາດຂອງຊົນເຜົ່າກຸ່ມນ້ອຍ ທີ່ກໍາລັງທໍາການຕໍ່ສູ້ກັບກອງທັບຂອງມຽນມາຢູ່ໃນພາກຕາເວັນຕົກຂອງປະເທດ ໃນວັນຈັນວານນີ້ ໄດ້ອ້າງວ່າ ໄດ້ຈັບໂຕທະຫານລັດຖະບານຫຼາຍຮ້ອຍຄົນ ເປັນນັກໂທດ ໃນເວລາທີ່ພວກເຂົາເຂົ້າຍຶດເອົາຄ້າຍບັນຊາການໃຫຍ່, ອີງຕາມລາຍງານຂອງອົງການຂ່າວ AP.
ກອງທັບອາຣາຄານ (Arakan), ເຊິ່ງເປັນກອງກໍາລັງເສີມທີ່ໄດ້ຮັບການຝຶກອົບຮົມ ແລະໄດ້ຮັບການປະກອບອາວຸດເປັນຢ່າງດີຂອງຂະບວນການຊົນເຜົ່າກຸ່ມນ້ອຍຣາໄຄ່ນ໌ (Rakhine), ໄດ້ທຳການບຸກໂຈມຕີຕໍ່ບັນດາຄ້າຍທະຫານດ້ານໜ້າໃນລັດຣາໄຄ່ນ໌ ທີ່ຕັ້ງຢູ່ທາງທິດຕາເວັນຕົກຂອງປະເທດ, ເຊິ່ງເປັນດິນແດນບ້ານເກີດຂອງພວກເຂົານັ້ນ ມາເປັນເວລາເປັນເວລາປະມານ 6 ເດືອນແລ້ວ.
ກຸ່ມດັ່ງກ່າວ ກ່າວຖະແຫຼງການທາງວີດີໂອ ທີ່ໄດ້ໂພສລົງໃນແອັບສົ່ງຂໍ້ຄວາມ Telegram ວ່າ ບັນດາທະຫານທີ່ຂຶ້ນກັບກອງບັນຊາການປະຕິບັດການເລກທີ 15 ຂອງລັດຖະບານທະຫານ ໃນຂົງເຂດເມືອງບູທິດວງ (Buthidaung) ຂອງລັດຣາໄຄ່ນ໌ (Rakhine) ໄດ້ອອກມາຍອມຈຳນົນ ລຸນຫຼັງການຖືກປິດລ້ອມ.
ເມືອງບູທິດວງ ຕັ້ງຢູ່ປະມານ 385 ກິໂລແມັດ ໄປທາງທິດຕາເວັນຕົກສຽງໃຕ້ຂອງມັນດາເລ, ເຊິ່ງເປັນເມືອງໃຫຍ່ອັນດັບສອງຂອງມຽນມາ.
ຍັງບໍ່ມີການຢືນຢັນຢ່າງເປັນເອກະລາດ ກ່ຽວກັບການຍຶດຖານທັບດັ່ງກ່າວ. ລັດຖະບານທະຫານຂອງມຽນມາ ຍັງບໍ່ໄດ້ອອກມາສະແດງຄວາມເຫັນໃດໆໃນທັນທີ, ແລະໂຄສົກຂອງກອງທັບອາຣາຄານ ກໍບໍ່ໄດ້ຕອບຄຳຖາມຕ່າງໆທີ່ ອົງການຂ່າວ AP ສົ່ງໄປຫາ.
ການສູ້ລົບກັນຢູ່ໃນລັດຣາໄຄ່ນ໌ ເປັນສ່ວນນຶ່ງຂອງຄວາມຂັດແຍ້ງກັນໃນທົ່ວມຽນມາ ທີ່ເລີ້ມຂຶ້ນລຸນຫຼັງກອງທັບໄດ້ຂັບໄລ່ລັດຖະບານທີ່ຖືກເລືອກຕັ້ງ ທ່ານນາງອອງ ຊານ ຊູ ຈີ ໃນເດືອນກຸມພາ ປີ 2021 ແລະໄດ້ປາບປາມການປະທ້ວງແບບບໍ່ໃຊ້ຄວາມຮຸນແຮງທີ່ແຜ່ລາມອອກໄປ ເພື່ອໃຫ້ມີການປົກຄອງແບບປະຊາທິປະໄຕອີກຄັ້ງ.
ເຖິງແມ່ນຕົນຈະໄດ້ປຽບທາງດ້ານອາວຸດ ແລະກຳລັງຄົນກໍ່ຕາມ, ແຕ່ກອງທັບມຽນມາ ກໍຍັງຄົງຢູ່ໃນທ່າຮັບ ນັບແຕ່ເດືອນຕຸລາເປັນຕົ້ນມາ, ເມື່ອພັນທະມິດຂອງກຸ່ມກະບົດ 3 ຊົນເຜົ່າ ໄດ້ເປີດການບຸກໂຈມຕີຢູ່ພາກຕາເວັນອອກສຽງເໜືອຂອງປະເທດ.
ຟໍຣັມສະແດງຄວາມຄິດເຫັນ