ມີຄົນຜູ້ນຶ່ງ ໃນລັດ ເທັກຊັສ ຖືກກວດພົບເປັນໄຂ້ຫວັດນົກ, ເຊິ່ງເປັນການຕິດໂຣກທີ່ຜູກມັດໃສ່ການຄົ້ນພົບໄວຣັສໃນງົວນົມ ເມື່ອບໍ່ດົນມານີ້, ອີງຕາມກ່ານກ່າວຂອງບັນດາເຈົ້າໜ້າທີ່ສາທາລະນະສຸກ ໃນວັນຈັນວານນີ້.
ຄົນໄຂ້ດັ່ງກ່າວ ແມ່ນກຳລັງຖືກປິ່ນປົວດ້ວຍຢາຕໍ່ຕ້ານໄວຣັສ ແລະ ອາການດຽວ ທີ່ເຂົາເຈົ້າໄດ້ລາຍງານ ກໍແມ່ນຕາແດງ, ບັນດາເຈົ້າໜ້າທີ່ສາທາລະນະສຸກຂອງລັດເທັກຊັສ ໄດ້ກ່າວ. ບັນດາເຈົ້າໜ້າທີ່ສາທາລະນະສຸກເວົ້າວ່າ ຄົນຜູ້ນັ້ນ ໄດ້ສຳຜັດກັບງົວທີ່ຖືກສັນນິຖານວ່າ ຕິດເຊື້ອໂຣກ, ແລະ ຄວາມສ່ຽງຕໍ່ສາທາລະນະແມ່ນຍັງຄົງຕ່ຳຢູ່.
ມັນໄດ້ເປັນຂີດໝາຍຂອງການຮັບຮູ້ຄັ້ງທຳອິດ ກ່ຽວກັບ ກໍລະນີຂອງຄົນທີ່ຕິດໄຂ້ຫວັດນົກ ຈາກສັດລ້ຽງລູກດ້ວຍນົມຢູ່ໃນໂລກ, ອີງຕາມການກ່າວຂອງບັນດາເຈົ້າໜ້າທີ່ສາທາລະນະສຸກ.
ແນວໃດກໍຕາມ, ມັນບໍ່ມີຫຼັກຖານ ກ່ຽວກັບ ການຕິດແປດຈາກຄົນຫາຄົນ ຫຼື ຄົນຜູ້ໃດທີ່ໄດ້ຕິດເຊື້ອຈາກນົມ ຫຼື ຊີ້ນ ຈາກງົວ, ອີງຕາມການກ່າວຂອງ ດຣ. ນິຣາຟ ຊາ, ຮອງຜູ້ອຳນວຍການໃຫຍ່ຂອງສູນກາງສຳລັບການຄວບຄຸມ ແລະ ປ້ອງກັນໂຣກ. ການທົດລອງດ້ານກຳມະພັນບໍ່ໄດ້ຊີ້ໃຫ້ເຫັນວ່າ ໄວຣັສດັ່ງກ່າວໄດ້ແຜ່ລາມຢ່າງງ່າຍດາຍໃນທັນທີ ຫຼືວ່າ ມັນໄດ້ກໍ່ໃຫ້ເກີດການເຈັບປ່ວຍທີ່ຮ້າຍແຮງ, ທ່ານ ຊາ ໄດ້ກ່າວ. ແລະ ຢາຕໍ່ຕ້ານໄວຣັສໃນປັດຈຸບັນ ກໍເບິ່ງຄືວ່າ ຍັງໃຊ້ໄດ້ຜົນຢູ່, ທ່ານໄດ້ກ່າວເສີມ.
ເມື່ອອາທິດທີ່ຜ່ານມາ, ງົວນົມໃນລັດ ເທັກຊັສ ແລະ ແຄນຊັສ ຖືກລາຍງານວ່າໄດ້ຕິດໄຂ້ຫວັດນົກ ແລະ ບັນດາເຈົ້າໜ້າທີ່ກະສິກຳລັດຖະບານກາງ ຕໍ່ມາໄດ້ຢືນຢັນການຕິດເຊື້ອໃນຝູງງົວນົມຢູ່ລັດ ມິຊິແກນ ທີ່ໄດ້ຮັບງົວຈາກລັດ ເທັກຊັສ ເມື່ອບໍ່ດົນມານີ້. ບໍ່ມີງົວໂຕໃດຈາກຝູງທີ່ມີຫຼາຍຮ້ອຍໂຕນັ້ນ ໄດ້ຕາຍ, ທ່ານ ຊາ ໄດ້ກ່າວ.
ນັບຕັ້ງແຕ່ປີ 2020 ເປັນຕົ້ນມາ, ໄວຣັສ ໄຂ້ຫວັດນົກ ໄດ້ແຜ່ລາມໃນສັດຊະນິດຕ່າງໆຫຼາຍຂຶ້ນ, ລວມທັງໝາ, ແມວ, ສກັ້ງ, ໝີ ແລະ ແມ່ນກະທັ້ງແມວນ້ຳ ແລະ ປາຂ່າ ຫຼື ປາໂລມາ ໃນຫຼາຍປະເທດ.
ຟໍຣັມສະແດງຄວາມຄິດເຫັນ