ປະທານາທິບໍດີ ບາຣັກ ໂອບາມາ ມີແຜນການ ທີ່ຈະໄປຢ້ຽມຢາມ ນະຄອນ Hiroshima ປະເທດຍີ່ປຸ່ນໃນວັນທີ 27 ພຶດສະພາທ້າຍເດືອນນີ້ ຊຶ່ງຈະກາຍເປັນປະທານາທິບໍດີທີ່ຍັງ ຢູ່ໃນຕຳແໜ່ງຄົນທຳອິດເດີນທາງໄປຢ້ຽມຢາມນະຄອນດັ່ງກ່າວ ທີ່ເຮືອບິນສະຫະລັດໄດ້ ຖິ້ມລະເບີດປະລະມານູລູກທຳອິດຂອງໂລກລົງໃສ່ ໃນປີ 1945 ລະຫວ່າງສົງຄາມໂລກ ຄັ້ງທີສອງ.
ນັບເປັນເວລາ 7 ທົດສະວັດຜ່ານມາແລ້ວ ຍັງບໍ່ມີ ປະທານາທິບໍດີສະຫະລັດຄົນໃດ ໄດ້ ເດີນທາງໄປຢ້ຽມຢາມນະຄອນ Hiroshima ແລະ Nagasagi ບ່ອນທີ່ໄດ້ມີການຖິ້ມລະ ເບີດປະລະມານູລູກທີສອງລົງໃສ່ ໃນເວລາສາມມື້ຕໍ່ມາ.
ທຳນຽບຂາວ ກ່າວວ່າ ປະທານາທິບໍດີໂອບາມາ ຈະໄປຢ້ຽມຢາມນະຄອນ Hiroshima ກັບຍານົກລັດຖະມົນຕີຍີ່ປຸ່ນ ທ່ານ Shinzo Abe ໃນຕອນທ້າຍຂອງການຢ້ຽມຢາມປະເທດຫວຽດນາມແລະຍີ່ປຸ່ນ ແຕ່ວັນທີ 21 ຫາ 28 ພຶດສະພາ.
ທ່ານ Ben Rhodes ທີ່ປຶກສາ ຂອງປະທານາທິບໍດີໂອບາມາ ໄດ້ປະຕິເສດ ເຖິງຄວາມເປັນໄປໄດ້ທີ່ວ່າ ປະທານາທິບໍດີໂອບາມາຈະທຳການຂໍຂະມາໂທດທີ່ໄດ້ຖິ້ມລະເບີດປະ ລະມານູລົງໃສ່ນະຄອນ Hiroshima ແລະ Nagasagi. ທ່ານ Rhodes ເວົ້າວ່າປະທາ ນາທິບໍດີຈະບໍ່ພິຈາລະນາຄືນໃໝ່ ກ່ຽວກັບການຕັດສິນໃຈທີ່ໄດ້ນຳໃຊ້ລະເບີດປະລະມາ ນູເພື່ອຍຸຕິສົງຄາມໂລກຄັ້ງທີສອງ. ແຕ່ທ່ານຈະສະເໜີໃຫ້ວິໄສທັດໄປໜ້າທີ່ເພັ່ງເລັງໃສ່ອະນາຄົດ ທີ່ມີຮ່ວມກັນຂອງພວກເຮົາກັບຍີປຸ່ນ.
ໃນການຖະແຫຼງຂ່າວທີ່ທຳນຽບຂາວ ໃນວັນອັງຄານວານນີ້ ໄດ້ມີການຖາມໂຄສົກຂອງປະທານາທິບໍດີ ທ່ານ Josh Earnest ວ່າ ເປັນຫຍັງປະທານາທິບໍດີ ຈຶ່ງປະຕິເສດເຖິງ ຄວາເປັນໄປໄດ້ ໃນການທີ່ຈະ ຂໍຂະມາໂທດ. ທ່ານ Earnest ຕອບວ່າ ການເດີນທາງ ໄປຢ້ຽມຢາມຂອງປະທານາທິບໍດີ ແມ່ນເນັ້ນໜັກໃສ່ອະນາຄົດຕໍ່ໜ້າຫຼາຍກວ່າ.