ເກົາຫລີເໜືອກ່າວວ່າ ຕົນໄດ້ຮັບສານສະບັບນຶ່ງຈາກປະທານາທິບໍດີ Dmitry Medvedev
ແຫ່ງຣັດເຊຍ ທີ່ແຈ້ງວ່າ ທ່ານຢາກໄດ້ຄວາມຮ່ວມໄມ້ຮ່ວມມືກ່ຽວກັບການສ້າງທໍ່ລໍາລຽງແກສ
ທໍາມະຊາດຈາກຣັດເຊຍ ຜ່ານເກົາຫລີເໜືອ ໄປຍັງເກົາຫລີໃຕ້.
ອົງການຂ່າວ KCNA ຂອງທາງການເກົາຫລີເໜືອກ່າວໃນວັນຈັນມື້ນີ້ວ່າ ສານສະບັບນີ້
ຍັງໄດ້ສະເໜີໃຫ້ສ້າງທາງລົດໄຟເຊື່ອມຕໍ່ ແລະວາງສາຍໄຟຟ້າຜ່ານ 3 ປະເທດເຊ່ນກັນ.
ອົງການຂ່າວຍັງເວົ້າຕື່ມວ່າ ສານສະບັບນີ້ແມ່ນສົ່ງມາເພື່ອເປັນຂີດໝາຍວັນຄົບຮອບປີ
ແຫ່ງການຍຸດຕິລົງຂອງການປົກຄອງແບບຫົວເມືອງຂຶ້ນຂອງຍີ່ປຸ່ນ ທີ່ແຫລມເກົາຫລີນັ້ນ.
ໄດ້ມີການອ້າງຄໍາເວົ້າຂອງລັດຖະມົນຕີຕ່າງປະເທດຣັດເຊຍ ທ່ານ Sergei Lavros
ໃນສັບປະດາແລ້ວນີ້ວ່າ ບັນດາເຈົ້າໜ້າທີ່ເກົາຫລີ ເໜືອໄດ້ຕອບສະໜອງໃນທາງບວກ
ໃນລະຫວ່າງການໂອ້ລົມສົນທະນາກັນຂັ້ນຕົ້ນ ກ່ຽວກັບໂຄງການສ້າງທໍ່ລໍາລຽງແກສນີ້.
ເກົາຫລີໃຕ້ ໄດ້ເຮັດສັນຍາຊື້ແກສທໍາມະຊາດໃນປະລິມານຫລວງຫລາຍຈາກຣັດເຊຍ
ໃນທ້າຍທົດສະວັດນີ້ ແລະການສ້າງທໍ່ລໍາລຽງຜ່ານເກົາຫລີເໜືອ ແມ່ນຈະລົດຜ່ອນຄ່າ
ຂົນສົ່ງລົງຢ່າງຫລວງຫລາຍ.
ສໍາລັບເກົາຫລີເໜືອນັ້ນ ຂໍ້ຕົກລົງດັ່ງກ່າວຈະເປັນໂອກາດອັນນຶ່ງທີ່ຈະອໍານວຍໃຫ້ເກົາ
ຫລີເໜືອໄດ້ຮັບເງິນຕາຕ່າງປະເທດທີ່ຕົນຕ້ອງການຢ່າງຍິ່ງນັ້ນ ຈາກຄ່າສົ່ງແກສຜ່ານ
ດິນແດນຂອງຕົນ. ແຕ່ວ່າ ທີ່ຜ່ານມາ ເກົາຫລີໃຕ້ບໍ່ມີຄວາມເຕັມໃຈຫລາຍປານໃດ ທີ່
ຈະເຂົ້າຮ່ວມໃນການຕົກລົງສ້າງທໍ່ລໍາລຽງແກສຜ່ານເກົາຫລີເໜືອນັ້ນ ຍ້ອນຄວາມສໍາ
ພັນທີ່ເປັນປໍລະປັກກັນກັບກຸງພຽງຢ້າງ ຊຶ່ງລະບົບເຊ່ນນີ້ສາມາດຖືກຂັດຂວາງໄດ້ ໃນ
ລະຫວ່າງເກີດບັນຫາຂັດແຍ້ງກັນ ໃນອະນາຄົດນັ້ນ.
