ຍີ່ປຸ່ນ ໄດ້ກ່າວໃນວັນອາທິດວານນີ້ວ່າ ບັນດານັກຊ່ຽວຊານຂອງເຂົາເຈົ້າໄດ້ຈັດການເຈລະຈາກັບຄູ່ຮ່ວມ ຈີນ ເພື່ອພະຍາຍາມທີ່ຈະບັນເທົາຄວາມເປັນຫ່ວງຂອງ ປັກກິ່ງ ກ່ຽວກັບການປ່ອຍນ້ຳທີ່ປົນດ້ວຍສານກຳມັນຕະພາບລັງສີ ທີ່ໄດ້ຖືກບຳບັດແລ້ວນັ້ນ ອອກຈາກໂຮງງານໄຟຟ້າພະລັງງານນິວເຄລຍ ຟູກູຊິມະ ໄດອິຊິ ລົງສູ່ທະເລ.
ການປ່ອຍນ້ຳເສຍດັ່ງກ່າວ ແມ່ນຖືກຄັດຄ້ານໂດຍກຸ່ມນັກຫາປາ ແລະ ປະເທດທີ່ຢູ່ໃກ້ຄຽງໂດຍສະເພາະແມ່ນ ຈີນ, ເຊິ່ງໄດ້ຫ້າມການນຳເຂົ້າອາຫານທະເລທຸກຊະນິດຈາກ ຍີ່ປຸ່ນ. ການເຄື່ອນໄຫວຂອງ ຈີນ ໄດ້ສົ່ງຜົນກະທົບສ່ວນໃຫຍ່ຕໍ່ບັນດາຜູ້ລ້ຽງຫອຍ ສກາລລັອບ ຫຼື ຫອຍແຄງ ແລະ ຜູ້ສົ່ງອອກໄປ ຈີນ.
ໃນລະຫວ່າງການເຈລະຈາທີ່ຖືກຈັດຂຶ້ນເມື່ອວັນເສົາທີ່ຜ່ານມາ ໃນເມືອງ ດາຫຼຽນ ທາງພາກຕາເວັນອອກສຽງເໜືອຂອງ ຈີນ ນັ້ນ, ບັນດາເຈົ້າໜ້າທີ່ ຍີ່ປຸ່ນ ໄດ້ໃຫ້ການອະທິບາຍ “ທີ່ອີງໃສ່ວິທະຍາສາດ” ກ່ຽວກັບ ວິທີການປ່ອຍນັ້ນຖືກປະຕິບັດຢ່າງປອດໄພດັ່ງທີ່ໄດ້ວາງແຜນໄວ້, ອີງຕາມກະຊວງການຕ່າງປະເທດ ຍີ່ປຸ່ນ.
ເຫດການແຜ່ນດິນໄຫວໃນປີ 2011 ແລະ ຄື້ນຊຸນາມິ ໄດ້ສ້າງຄວາມເສຍຫາຍຕໍ່ການສະໜອງໄຟຟ້າຂອງໂຮງງານ ຟູກູຊິມະ ແລະ ຂະບວນການເຮັດໃຫ້ເຕົາປະຕິກອນເຢັນ, ຈົນກໍ່ໃຫ້ເກີດການເປື່ອຍລົງຂອງເຕົາປະຕິກອນສາມໜ່ວຍ ແລະ ກໍ່ໃຫ້ເກີດການສະສົມນ້ຳເສຍສານກຳມັນຕະພາບລັງສີຈຳນວນຫຼາຍ. ຫຼັງຈາກດົນກວ່ານຶ່ງທົດສະວັດຂອງການເກັບໄວ້ໃນຖັງທີ່ກິນພື້ນທີ່ສ່ວນຫຼາຍຂອງສະຖານທີ່ນັ້ນ, ໂຮງງານດັ່ງກ່າວໄດ້ເລີ່ມທີ່ຈະປ່ອຍນ້ຳອອກຫຼັງຈາກໄດ້ບຳບັດມັນຢ່າງໜ້ອຍຄັ້ງນຶ່ງ ແລະ ເຮັດໃຫ້ມັນຈາງລົງດ້ວຍນ້ຳທະເລເມື່ອວັນທີ 24 ສິງຫາ, ທີ່ໄດ້ເລີ່ມຂັ້ນຕອນທີ່ຄາດວ່າ ຈະໃຊ້ເວລາຫຼາຍທົດສະວັດ.
ນາຍົກລັດຖະມົນຕີ ຍີ່ປຸ່ນ ທ່ານ ຟູມິໂອະ ຄິຊິດະ ແລະ ປະທານປະເທດ ຈີນ ທ່ານ ສີ ຈິ່ນຜິງ ຢູ່ກອງປະຊຸມສຸດຍອດຂອງພວກເພິ່ນເມື່ອເດືອນພະຈິກປີກາຍນີ້, ໄດ້ຕົກລົງທີ່ຈະຈັດການເຈລະຈາດ້ານວິທະຍາສາດໂດຍບັນດານັກຊ່ຽວຊານ, ແລະ ສອງປະເທດດັ່ງກ່າວ ກໍໄດ້ຈັດກອງປະຊຸມທີ່ບໍ່ເປັນທາງການຫຼາຍຄັ້ງ. ຖະແຫຼງການຂອງວັນອາທິດວານນີ້ຈາກກະຊວງການຕ່າງປະເທດຂອງ ຍີ່ປຸ່ນ ແມ່ນການຮັບຮູ້ຢ່າງເປີດເຜີຍເປັນຄັ້ງທຳອິດຂອງເຂົາເຈົ້າ ກ່ຽວກັບ ການເຈລະຈານັ້ນ.
ຟໍຣັມສະແດງຄວາມຄິດເຫັນ