ທ່ານທັກສິນ ຊິນນະວັດ ອະດີດນາຍົກລັດຖະມົນຕີຜູ້ມີອິດທິພົນຂອງໄທ ໄດ້ທໍາການພົບປະກັບບັນດາບຸກຄົນສຳຄັນ ໃນການຕໍ່ຕ້ານລັດຖະບານທະຫານມຽນມາ ໂດຍມີເປົ້າໝາຍເພື່ອເປັນຄົນກາງໃນການໄກ່ເກ່ຍແກ້ໄຂຂໍ້ຂັດແຍ້ງດ້ວຍອາວຸດທີ່ຮຸນແຮງຢູ່ໃນມຽນມາ ເປັນເວລາຫຼາຍກວ່າ 3 ປີ.
ແຫຼ່ງຂ່າວທີ່ບໍ່ປະສົງເປີດເຜີຍຊື່ ເນື່ອງຈາກກັງວົນກ່ຽວກັບຄວາມປອດໄພຂອງຕົນ ກ່າວຕໍ່ VOA ພາກພາສາມຽນມາວ່າ ທ່ານ ທັກສິນ ໄດ້ຈັດການພົບປະແບບບໍ່ເປັນທາງການກັບບັນດາຜູ້ນໍາລັດຖະບານເງົາຂອງມຽນມາ, ເຊິ່ງເປັນລັດຖະບານສາມັກຄີແຫ່ງຊາດ ຫຼື NUG ໃນລະຫວ່າງການຢ້ຽມຢາມຊຽງໃໝ່ທາງພາກເຫນືອຂອງປະເທດໄທ ໃນລະຫວ່າງເດືອນມີນາ ແລະ ເດືອນເມສາ.
ແຫຼ່ງຂ່າວກ່າວວ່າ ທ່ານ ທັກສິນ, ຜູ້ທີ່ປັດຈຸບັນນີ້ ພັກການເມືອງຂອງທ່ານເປັນຫົວໜ້າລັດຖະບານປະສົມຂອງໄທ, ໄດ້ທໍາການພົບປະແຍກກັນ ກັບບັນດາຜູ້ຕາງໜ້າຂອງກຸ່ມປະກອບອາວຸດຊົນເຜົ່າຕ່າງໆຈາກມຽນມາ ລວມມີ ສະຫະພັນກຳມະບານແຫ່ງຊາດກາຫຼ່ຽງ (Karen) ຫຼື KNU, ພັກກ້າວໜ້າແຫ່ງຊາດຊາວກະຫຼ່ຽງ (Karenni) ແລະອົງການແຫ່ງຊາດກາຊິ່ນ (Kachin).
ໃນລະຫວ່າງການພົບປະກັນຄັ້ງນຶ່ງນັ້ນ, ທ່ານ ທັກສິນ ໄດ້ພົບປະກັບນາຍພົນ ຢາດ ເສີກ (Yawd Serk) ຂອງສະພາຟື້ນຟູລັດສານ ແລະ ກອງທັບລັດ ສານ ຫຼື RCSS/SSA, ອີງຕາມແຫຼ່ງຂ່າວອື່ນໆທີ່ໃກ້ຊິດກັບກຸ່ມປະກອບອາວຸດ. ເມື່ອບໍ່ດົນມານີ້, ທ່ານ ເສີກ ມີສ່ວນພົວພັນກັບການປະຕິບັດງານທີ່ເຄັ່ງຕຶງໂດຍອົງການຕ້ານຢາເສບຕິດຂອງສະຫະລັດ ທີ່ກ່ຽວຂ້ອງກັບອາວຸດສຳລັບວັດຖຸອຸປະກອນດ້ານນິວເຄລຍ, ດັ່ງທີ່ VOA ໄດ້ລາຍງານໃນເດືອນມີນາທີ່ຜ່ານມາ.
ຕາມແຫຼ່ງຂ່າວທີ່ບໍ່ປະສົງອອກນາມ, ທ່ານ ທັກສິນ ສະແດງຄວາມປະສົງຂອງຕົນທີ່ຈະໄກ່ເກ່ຍລະຫວ່າງລັດຖະບານທະຫານມຽນມາ ແລະ ອົງການຕໍ່ຕ້ານຂອງຊົນເຜົ່າກຸ່ມນ້ອຍ ຫຼື EROs, ເຊິ່ງໄດ້ທໍາການຕໍ່ສູ້ກັບລັດຖະບານທະຫານນັບຕັ້ງແຕ່ມີການຍຶດອຳນາດຈາກລັດຖະບານທີ່ຖືກເລືອກຕັ້ງເມື່ອເດືອນກຸມພາ ປີ 2021.
ຟໍຣັມສະແດງຄວາມຄິດເຫັນ