ຫົວໜ້າຂອງຫ້ອງການສັນຕິບານກາງສະຫະລັດ ຫຼື FBI ກ່າວວ່າ
ພວກມືປືນ 2 ຄົນ ທີ່ພົວກັນ ກັບການໂຈມຕີສັງຫານໝູ່ ໃນລັດ
California ເມື່ອສັບປະດາແລ້ວນີ້ ແມ່ນເປັນພວກຫົວຮຸນແຮງ
ແລ້ວກ່ອນທີ່ພວກເຂົາເຈົ້າຈະຄົບຫາກັນທາງອິນເຕີແນັດຫຼື
online ແລະໂອ້ລົມກັນ ກ່ຽວກັບເລື້ອງສົງຄາມສັກສິດແລະ
ວີລະຊົນທາງສາສະໜາ ມາໄດ້ປະມານສອງປີກ່ອນ.
ຜູ້ອຳນວຍການຂອງອົງການ FBI ທ່ານ James Comey ໄດ້ບອກກັບຄະນະກຳມະການຍຸຕິທຳຂອງລັດຖະສະພາ ໃນວັນພຸດວານນີ້ ວ່າ ທ້າວ Syed Rizwan Farook ແລະພັນລະຍາຂອງລາວ ນາງ Tashfeen Malik ນັ້ນໄດ້ກາຍເປັນພວກຫົວຮຸນແຮງຈັດ “ມາໄດ້ດົນນານພໍສົມຄວນແລ້ວ” ກ່ອນທີ່ຈະທຳການໂຈມຕີ ໃນເມືອງ San Bernadino ລັດ California. ທັງສອງໄດ້ແຕ່ງງານກັນ ໃນປີກາຍນີ້.
ໃນຂະນະດຽວກັນນີ້ ອົງການຂ່າວຫລາຍໆອົງການ ໄດ້ລາຍງານໃນວັນພຸດວານນີ້ວ່າ ເຈົ້າໜ້າທີ່ປະຕິບັດກົດໝາຍ ໄດ້ກ່າວວ່າ ເພື່ອນຄົນນຶ່ງຂອງທ້າວ Farook ໄດ້ ບອກກັບພວກນັກສືບສວນ ສອບສວນວ່າ ໄດ້ມີການວາງແຜນເພື່ອທຳການໂຈມຕີໃນສະຫະລັດ
ເມື່ອ 2012 ແຕ່ຕໍ່ມາໄດ້ຖືກຍົກເລີກໄປ.
ທ້າວ Enrique Marquez ຜູ້ຊຶ່ງຄັ້ງນຶ່ງເຄີຍເປັນເພື່ອນບ້ານຂອງທ້າວ Farook ເປັນຜູ້ຊື້ປືນທີ່ໃຊ້ໃນການໂຈມຕີ ເມື່ອສັບປະດາແລ້ວນີ້. ອິງຕາມຄຳເວົ້າຂອງເຈົ້າໜ້າທີ່ ຜູ້ບໍ່ປະສົງອອກນາມ ກ່າວວ່າ ທ້າວ Marquez ໄດ້ກ່າວວ່າ ລາວແລະທ້າວ Farook ໄດ້ວາງແຜນ ການໂຈມຕີ ທີ່ລັດ California ເມື່ອ 3 ປີກ່ອນ ແຕ່ຕໍ່ມາໄດ້ຍົກເລີກຄວາມຄິດດັ່ງກ່າວນີ້.
