ອີຈິບກ່າວວ່າ ການເລືອກຕັ້ງປະທານາທິບໍດີຂອງຕົນຄັ້ງທໍາອິດ ນັບແຕ່ການລຸກຮືຂຶ້ນຂອງປະຊາຊົນໄດ້ປົດທ່ານໂຮສນີ ມູບາຣັກ ຜູ້ນໍາຜະເດັດການອອກຈາກອໍານາດໄປເມື່ອນຶ່ງປີຜ່ານມານັ້ນ ຈະມີຂຶ້ນໃນວັນທີ 23 ແລະ 24 ເດືອນພຶດສະພາໜ້ານີ້.
ຫົວໜ້າຄະນະກໍາມະການ ກໍາກັບການເລືອກຕັ້ງຂອງອີຈິບ ທ່ານ Farouk Sultan ກ່າວໃນວັນພຸດວານນີ້ວ່າ ຖ້າບໍ່ມີຜູ້ສະມັກຄົນໃດໄດ້ ຮັບຄະແນນສຽງຫລາຍກວ່າ 50 ເປີເຊັນຂຶ້ນໄປ ການເລືອກຕັ້ງຮອບຊີ້ຂາດຈະມີຂຶ້ນໃນວັນທີ 16 ແລະ 17 ເດືອນມິຖຸນາປີນີ້.
ທ່ານ Farouk Sultan ກ່າວຕື່ມວ່າ ຜົນຂອງການເລືອກຕັ້ງຂັ້ນສຸດທ້າຍຈະຖືກປະກາດໃຫ້ປະຊາຊົນຮູ້ໃນວັນທີ 21 ເດືອນມິຖຸນາ. ພວກທະຫານອີຈິບທີ່ເຂົ້າກຳອໍານາດຕໍ່ຈາກທ່ານມູບາຣັກ ໄດ້ໃຫ້ຄໍາໜັ້ນສັນຍາທີ່ຈະໂອນອໍານາດໃຫ້ຜູ້ນໍາພົນລະເຮືອນພາຍໃນທ້າຍເດືອນມິຖຸນາ.
ທ່ານ Sultan ກ່າວຕື່ມວ່າ ພວກຜູ້ສະມັກຮັບເລືອກຕັ້ງປະທານາທິບໍດີ ຈະໄດ້ຮັບການອະນຸມັດໃຫ້ທໍາການໂຄສະນາຫາສຽງເລືອກຕັ້ງຂອງເຂົາເຈົ້າໄດ້ ໃນວັນທີ 30 ເມສານີ້ ແລະທ່ານກ່າວຕື່ມວ່າ ພວກອົບພະຍົບອີຈິບໃນຕ່າງປະເທດ ຈະມີສິດໃນການປ່ອນບັດເລືອກຕັ້ງຄັ້ງນີ້.
ບັນດານັກເຄື່ອນໄຫວຝ່າຍຄ້ານ ຊຶ່ງເປັນພວກນໍາພາໃນການລຸກຮືຂຶ້ນຕໍ່ຕ້ານລັດຖະບານໃນປີແລ້ວນີ້ ມັກຕໍາໜິຕິຕຽນສະພາປົກຄອງທະຫານເລື້ອຍໆໃນການຮັບມືຂອງພວກເຂົາເຈົ້າ ໃນໄລຍະຂ້າມຜ່ານຫລັງຈາກທ່ານມູບາຣັກນັ້ນ ຊຶ່ງພວກເຂົາເຈົ້າກ່າວຫາພວກນາຍພົນໃນກອງທັບວ່າພາກັນໃຊ້ຍຸດທະວິທີການປາບປາມໃນຍຸກສະໄໝຂອງທ່ານມູບາຣັກ ຕໍ່ພວກປະທ້ວງທີ່ພາກັນທວງໃຫ້ ກັບຄືນໄປສູ່ການປົກຄອງຂອງພວກພົນລະເຮືອນຢ່າງໄວນັ້ນ. ປະຊາຊົນຈຳນວນນຶ່ງໄດ້ເສຍຊີວິດໃນການປະທ້ວງຕໍ່ຕ້ານພວກທະຫານແລະໄດ້ເກີດຄວາມວຸ້ນວາຍຕ່າງໆຂຶ້ນໃນທົ່ວປະເທດອີຈິບໃນປີຜ່ານມານີ້.