ມະຫາວິທະຍາໄລ ໂຄລຳເບຍ ໃນວັນຈັນວານນີ້ ໄດ້ເລີ່ມສັ່ງໃຫ້ພວກນັກເຄື່ອນໄຫວສະໜັບສະໜູນ ປາແລັສໄຕນ໌ ພັກຮຽນ, ຜູ້ທີ່ໄດ້ປະຕິເສດທີ່ຈະຮື້ຄ້າຍຕູບຜ້າຢູ່ບໍລິເວນມະຫາວິທະຍາໄລ ໃນນະຄອນ ນິວຢອກ ຂອງເຂົາເຈົ້າອອກໄປ ຫຼັງຈາກໂຮງຮຽນທີ່ເປັນທີ່ຮູ້ຈັກດີ ສຳລັບການສຶກສາທີ່ດີເລີດນັ້ນ ໄດ້ປະກາດ ການເຈລະຈາທີ່ບໍ່ໄປບໍ່ມາ ເພື່ອພະຍາຍາມສິ້ນສຸດການປະທ້ວງຕໍ່ຕ້ານນັ້ນ.
ປະທານມະຫາວິທະຍາໄລ ທ່ານນາງ ນີແມັດ ມິນູສ໌ ຊາຟິກ ໄດ້ກ່າວໃນຖະແຫຼງການສະບັບນຶ່ງວ່າ ການເຈລະຈາຫຼາຍວັນລະຫວ່າງພວກຜູ້ຈັດການປະທ້ວງນັກສຶສກາ ແລະ ບັນດາຜູ້ນຳການສຶກສາ ໄດ້ປະສົບຄວາມລົ້ມແຫຼວທີ່ຈະຊັກຊວນໃຫ້ພວກຜູ້ປະທ້ວງຖອນເຕັ້ນຫຼາຍສິບອັນທີ່ຖືກຕັ້ງຂຶ້ນ ເພື່ອສະແດງການຄັດຄ້ານຕໍ່ສົງຄາມຂອງ ອິສຣາແອລ ໃນ ກາຊາ.
ການປາບປາມຢູ່ມະຫາວິທະຍາໄລ ໂຄລຳເບຍ, ເຊິ່ງເປັນຈຸດໃຈກາງຂອງການປະທ້ວງທີ່ກ່ຽວຂ້ອງກັບ ກາຊາ ທີ່ໄດ້ລົບກວນມະຫາວິທະຍາໄລຕ່າງໆທົ່ວ ສະຫະລັດ ນັ້ນ, ໄດ້ເກີດຂຶ້ນໃນຂະນະທີ່ຕຳຫຼວດຢູ່ມະຫາວິທະຍາໄລແຫ່ງ ເທັກຊັສ ໃນນະຄອນ ອອສຕິນ ໄດ້ຈັບນັກສຶກສາຫຼາຍສິບຄົນ ຜູ້ທີ່ເຂົາເຈົ້າໄດ້ສີດສະເປພິກໄທໃສ່ຢູ່ການຊຸມນຸມສະໜັບສະໜູນ ປາແລັສໄຕນ໌.
ມະຫາວິທະຍາໄລ ໂຄລຳເບຍ ໄດ້ສົ່ງຈົດໝາຍອອກມາເຕືອນໃນຕອນເຊົ້າວັນຈັນວານນີ້ວ່າ ນັກສຶກສາຜູ້ທີ່ບໍ່ໄດ້ອອກຈາກສະຖານທີ່ຕັ້ງຄ້າຍພາຍໃນບ່າຍ 2 ໂມງຕາມເວລາຂອງຊາຍຝັ່ງຕາເວັນອອກ ແລະ ບໍ່ເຊັນເອກະສານທີ່ສັນຍາຈະປະຕິບັດຕາມນະໂຍບາຍຂອງມະຫາວິທະຍາໄລນັ້ນ ກໍຈະປະເຊີນກັບການຖືກສັ່ງພັກຮຽນ ແລະ ບໍ່ສາມາດທີ່ຈະສຳເລັດການສຶກສາດ້ວຍຄະແນນທີ່ດີໃນພາກຮຽນນັ້ນ.
ທ່ານ ເບັນ ແຊງ, ໂຄສົກຂອງມະຫາວິທະຍາໄລ, ໄດ້ກ່າວໃນກອງປະຊຸມລາຍງານເມື່ອແລງວັນຈັນວານນີ້ວ່າ “ພວກເຮົາໄດ້ເລີ່ມສັ່ງພວກນັກສຶກສາພັກຮຽນດັ່ງກັບພາກສ່ວນນຶ່ງຂອງຂັ້ນຕອນຕໍ່ໄປຂອງຄວາມພະຍາຍາມຂອງພວກເຮົາ ເພື່ອຮັບປະກັນຄວາມປອດໄພຢູ່ບໍລິເວນມະຫາວິທະຍາໄລຂອງພວກເຮົາ.”
ທ່ານ ແຊງ ໄດ້ກ່າວວ່າ “ສະຖານທີ່ຕັ້ງຄ້າຍດັ່ງກ່າວໄດ້ສ້າງສິ່ງແວດລ້ອມທີ່ບໍ່ໜ້າຍິນດີສຳລັບນັກສຶກສາຊາວຢິວຂອງພວກເຮົາຫຼາຍຄົນ ແລະ ຄະນະວິຊາ ແລະ ສຽງວົນແຊວທີ່ລົບກວນການສອນ, ການຮຽນ ແລະ ການກະກຽມສຳລັບການສອບເສັງປາຍພາກຮຽນ.”
ຟໍຣັມສະແດງຄວາມຄິດເຫັນ