ໃນອັນທີ່ເບິ່ງກັນວ່າ ເປັນສິ່ງທ້າທາຍທີ່ສຳຄັນທີ່ສຸດຕໍ່ເຂດຈຳກັດ ໃນການອ້າງເອົາກຳມະສິດຂອງ ປັກກິ່ງ ຢູ່ອ້ອມຮອບເກາະດອນທີ່ສ້າງຂຶ້ນມາຂອງພວກເຂົາເຈົ້ານັ້ນ, ເຮືອພິຄາດ ລູກສອນໄຟນຳວິຖີຂອງ ສະຫະລັດລຳນຶ່ງ ໃນວັນອັງຄານມື້ ນີ້ໄດ້ແລ່ນເຂົ້າໄປພາຍໃນໄລຍະ 22 ກິໂລແມັດ ຫ່າງຈາກເກາະ ທີ່ມີບັນຫານັ້ນ.
ເຮືອຮົບ USS Lassen ຂອງ ສະຫະລັດ ຊຶ່ງມີລາຍງານວ່າໄດ້ຕິດ ຕາມໂດຍເຮືອບິນສອດແນມ P-8A ຂອງກອງທັບເຮືອ ສະຫະ ລັດ ແລະ ມີຄວາມເປັນໄປໄດ້ວ່າ ເຮືອບິນສອດແນມ P-3 ໄດ້ເຂົ້າໄປໃກ້ກັບເກາະຫີນ Subi ທີ່ໄດ້ຄອບຄອງໂດຍ ຈີນ ແລະ ກໍຍັງໄດ້ຖືກອ້າງເອົາກຳມະສິດໂດຍ ໄຕ້ຫວັນ, ຫວຽດນາມ ແລະ ຟີລິບ ປິນ ອີກດ້ວຍ.
ໂຄສົກກະຊວງການຕາງປະເທດຂອງ ຈີນ ທ່ານ Lu Kang ໄດ້ກ່າວຕໍ່ບັນດານັກຂ່າວໃນກອງປະຊຸມຖະແຫຼງຂ່າວວ່າ ປັກກິ່ງ ໄດ້ເຕືອນ ເຮືອພິຄາດລູກສອນໄຟນຳວິຖີຂອງກອງທັບ ສະຫະລັດ ທີ່ໄດ້ແລ່ນເຂົ້າໃກ້ ເກາະທຽມຂອງ ຈີນ ໃນທະເລ ຈີນ ໃຕ້, ໃນນະຄອນຫຼວງ ປັກກິ່ງ, 27 ຕຸລາ 2015.
ເຮືອຮົບ Lassen ທີ່ຈອດປະຈຳຢູ່ຖານທັບເຮືອເມືອງທ່າ Yokosuka ໃນປະເທດ ຍີ່ປຸ່ນ, ໄດ້ຖືກສັງເກດການ, ຕິດຕາມ ແລະ ໄດ້ຖືກເຕືອນຫຼັງຈາກ “ໄດ້ແລ່ນເຂົ້າໄປຢ່າງຜິດກົດ ໝາຍ” ໃນເຂດນ່ານນ້ຳຂອງຈີນ, ອີງຕາມກະຊວງການຕ່າງປະເທດຈີນ ທີ່ປັກກິ່ງ.
ໂຄສົກກະຊວງການຕ່າງປະເທດທ່ານ Lu Kang ໄດ້ກ່າວໃນຖະແຫຼງ ການສະບັບນຶ່ງວ່າ ການເຄື່ອນໄຫວດັ່ງກ່າວ ໄດ້ເປັນ “ໄພຂົ່ມຂູ່ຕໍ່ອຳ ນາດອະທິປະໄຕຂອງ ຈີນ,”
ໃນບົດຄວາມຄິດເຫັນໜຶ່ງ ທີ່ພິມເຜີຍແຜ່ໂດຍອົງການຂ່າວ ຊິນຫົວ ໄດ້ກ່າວວ່າ “ປັກກິ່ງ ບໍ່ມີ “ການອ້າງເອົາກຳມະສິດ ທີ່ຫຼາຍເກີນຂອບເຂດ” ກ່ຽວກັບອຳນາດອະທິປະໄຕໃນທະເລ ຈີນ ໃຕ້. ສິດທິຂອງພວກເຂົາເຈົ້າຕໍ່ໝູ່ເກາະໃນທະເລຈີນ ໃຕ້ ແລະເກາະຫີນຕ່າງໆແມ່ນໄດ້ຖືກຂຽນໄວ້ໃນເອກະສານເປັນຢ່າງດີ ແລະ ມີຄວາມຖືກຕ້ອງ ຕາມກົດໝາຍໃນປະຫວັດສາດ. ບັນດາເຈົ້າໜ້າທີ່ສະຫະລັດທີ່ໄດ້ໂຕ້ແຍ້ງນັ້ນວ່າ ພວກເຂົາເຈົ້າຕ້ອງໄດ້ຈັດຫ້ອງຮຽນສຳລັບວິຊາປະຫວັດສາດທີ່ໄດ້ຂາດໄປ ຫຼື ບໍ່ກໍເລືອກທີ່ຈະບໍ່ຮັບຮູ້ຂໍ້ເທັດຈິງຂອງປະຫວັດສາດ.”
ພາລະກິດຂອງວັນອັງຄານມື້ນີ້ ໄດ້ສຳເລັດລົງໂດຍບໍ່ມີເຫດການໃດໆເກີດຂຶ້ນ, ອີງຕາມແຫຼ່ງ ຂ່າວຂອງທະຫານສະຫະລັດ.
Your browser doesn’t support HTML5
US Sends Ship Near Chinese Artificial Islands