ພຽງຢາງ ລົງໂທດ ຊາວເກົາຫຼີໃຕ້ ສອງຄົນ ຖານສອດແນມ ໃຫ້ໂຊລ

ເກົາຫຼີ​ເໜືອ ​ໄດ້ຕັດສິນລົງ​ໂທດ​ ໃຫ້​ຈຳ​ຄຸກ​ຕະຫລອດ​ຊີວິດ
ພ້ອມ​ດ້ວຍ​ອອກ​ແຮງ​ງານໜັກ ​ແກ່​ຜູ້​ຊາຍ​ ຊາວ​ເກົາຫຼີ​ໃຕ້
ສອງ​ຄົນ ທີ່​ທາງ​ການໄດ້​ກ່າວ​ຫາ​ວ່າ ສອດ​ແນມ​ໃຫ້​ໂຊ​ລ.

ໂທລະພາບ​ຂອງ​ທາງ​ການ​ເກົາຫຼີ​ເໜືອ ກ່າວໃນວັນ​ອັງຄານ
​ວານ​ນີ້ ວ່າ ທ້າວ Kim Kuk Gi ​ແລະ ທ້າວ Choe Chun Gil
​ໄດ້​ຖືກ​ພົບ​ເຫັນ​ວ່າ ມີຄວາມ​ຜິດ ​ໃນ​ຖານ​ຫາທາງ​ໂຄ່ນ​ລົ້ມ
ລັດຖະບານ ຢູ່​ທີ່​ການ​ດຳ​ເນີນຄະດີ​ ໃນ​ນະຄອນຫຼວງພຽງ​ຢາງ.

ທ້າວ Choe ຜູ້​ທີ່​ຄ້າຍຄື​ກັນ​ກັບ​ທ້າວ Kim ​ໄດ້​ຖືກ​ຈັບ​ກຸມ ​ເມື່ອ
ທ້າຍ​ປີ​ກາຍ​ນີ້ ​ໄດ້ກົ້ມ​ຫົວ​ສະແດງຄວາມເຄົາລົບ​ຢ່າງ​ເລິກ​ເຊິ່ງ ​ແລະ ປາກົດ​ວ່າ​ຮ້ອງໄຫ້ ​ໃນ​ຂະ​ນະ​ທີ່​ຜູ້​ພິພາກສາ ອ່ານ​ຄຳ​ຕັດສິນ​ລົງ​ໂທດ ອິງຕາມ​ລາຍງານຂ່າວຂອງໂທ​ລະ​ພາບ​ ທາງ​ການ​ເກົາຫຼີ​ເໜືອ.

ຜູ້​ພິພາກສາ ທີ່ບໍ່ໄດ້ບອກຊື່ ອ່ານ​ຄຳ​ຕັດສິນ ວ່າ “ການ​ຕັດສິນ​ລົງ​ໂທດ​ນີ້ ເປັນ​ຂັ້ນສຸດ​ທ້າຍ ​ແລະ ບໍ່​ສາມາດ​ອຸທອນ​ໄດ້.”

​ເມື່ອ​ເດືອນ​ແລ້ວ​ນີ້ ຜູ້​ຖືກ​ກັກ​ຂັງ ​ໄດ້​ຮັບ​ອະນຸຍາດ ​ໃຫ້​ລົມ​ກັບ ອົງການ ​ຂ່າວ CNN. ທັງສອງ​ ຄົນ ກ່າວ​ຕໍ່ເຄື​ອ​ຂ່າ​ຍ​ໂທລະພາບ​ດັ່ງກ່າວ ວ່າ ພວກ​ເຂົາ​ເຈົ້າ ​ໄດ້​ທຳ​ການ​ສອດ​ແນມ​ໃຫ້​ແກ່​ເກົາຫຼີ​ໃຕ້.

ລັດຖະບານ​ເກົາຫຼີ​ໃ​ຕ້ ​ໄດ້​ປະຕິ​ເສດຕໍ່ ຂໍ້​ກ່າວ​ຫາ​ດັ່ງກ່າວ ​ແລະ ​ໄດ້​ຮຽກຮ້ອງ​ໃຫ້​ປ່ອຍ​ໂຕ
​ຊາວ​ເກົາຫຼີ​ໃຕ້​ທັງ​ໝົດ ທີ່​ຖືກ​ກັກ​ຂັງຢູ່​ໃນ​ເກົາຫຼີ​ເໜືອ ​ໂດຍ​ທັນທີ.

​ເກົາ​ຫຼີ​ເໜືອ ​ໄດ້​ຈັບ​ກຸຸມຊາວ​ຕ່າງ​ຊາດ ຊ້ຳ​ແລ້ວ​ຊ້ຳອີກ​. ພວກ​ເຂົາ​ເຈົ້າ​ໂດຍ​ສ່ວນ​ໃຫຍ່ ຖືກ
​ບັງຄັບ​ໃຫ້​ສາລະພາບຄວາມ​ຜິດ ຕໍ່​ຂໍ້​ກ່າວ​ຫາ ​ຕໍ່ຕ້ານ​ລັດຖະບານ​ຕ່າງໆ​ນາໆ ລວມທັງ
ການ​ຈາລະກຳ.