ລິ້ງ ສຳຫລັບເຂົ້າຫາ

ວັນຈັນ, ໑໐ ກຸມພາ ໒໐໒໕

ສະຫະລັດ ແລະ ຟີລິບປິນ ລາດຕະເວນ ທາງອາກາດຮ່ວມກັນ ເໜືອຂົງເຂດທະເລຈີນໃຕ້ ເຮັດໃຫ້ ຈີນ ບໍ່ພໍໃຈ


ແຟ້ມຮູບ-ໃນຮູບທີ່ຕັດຈາກວີດີໂອ ເຊິ່ງສະໜອງມຫ້ໂດຍໜ່ວຍຍາມຝັ່ງຂອງຟີລິບປິນ ສະແດງໃຫ້ເຫັນປັ່ນສອງລໍາຂອງຈີນ ທີ່ສີດນໍ້າໄປໃສ່ເຮືອສໍານັກງານປະມົງ ແລະຊັບພະຍາກອນນໍ້າຂອງຟີລິບປິນ, ກາງ, ໃນຂະນະທີ່ພວກເຂົາກໍາລັງແລ່ນເຂົ້າໄປ ຫາດຊາຍ ສກາຣ໌ໂບໂຣ ທີ່ມີຂໍ້ພິພາດກັນ ໃນຂົງເຂດທະເລຈີນໃຕ້, ວັນທີ 9 ທັນວາ 2023.
ແຟ້ມຮູບ-ໃນຮູບທີ່ຕັດຈາກວີດີໂອ ເຊິ່ງສະໜອງມຫ້ໂດຍໜ່ວຍຍາມຝັ່ງຂອງຟີລິບປິນ ສະແດງໃຫ້ເຫັນປັ່ນສອງລໍາຂອງຈີນ ທີ່ສີດນໍ້າໄປໃສ່ເຮືອສໍານັກງານປະມົງ ແລະຊັບພະຍາກອນນໍ້າຂອງຟີລິບປິນ, ກາງ, ໃນຂະນະທີ່ພວກເຂົາກໍາລັງແລ່ນເຂົ້າໄປ ຫາດຊາຍ ສກາຣ໌ໂບໂຣ ທີ່ມີຂໍ້ພິພາດກັນ ໃນຂົງເຂດທະເລຈີນໃຕ້, ວັນທີ 9 ທັນວາ 2023.

ກອງທັບອາກາດຂອງ ຟີລິບປິນ ແລະ ສະຫະລັດ ໄດ້ທຳການລາດຕະເວນ ຮ່ວມກັນຢູ່ບໍລິເວນທະເລຈີນໃຕ້ ໃນວັນອັງຄານມື້ນີ້, ເຊິ່ງເປັນການເຄື່ອນໄຫວ ທີ່ເຮັດໃຫ້ ຈີນ ບໍ່ພໍໃຈ, ແລະຍັງໄດ້ດຳເນີນ “ການລາດຕະເວນເປັນປົກກະຕິ” ຢູ່ເໜືອຫາດຊາຍທີ່ມີຂໍ້ພິພາດກັນນັ້ນ.

ຟີ​ລິບ​ປິນ ​ແລະ ສະຫະລັດ ໄດ້​ເພີ້ມ​ທະວີມາດຕະ​ການ​ຮັກສາ​ຄວາມ​ປອດ​ໄພ​ພາຍ​ໃຕ້​ການ​ນໍາຂອງ​ປະທານາທິບໍດີຟີລິບປິນ ທ່ານ ເຟີດີນານ ມາໂກສ ຈູເນ່ຍ (Ferdinand Marcos Jr.) ​ທ່າມກາງຄວາມເຄັ່ງຕຶງທີ່ເພີ້ມຫຼາຍຂຶ້ນລະຫວ່າງ ມະນິລາ ແລະ ປັກກິ່ງ ເຊິ່ງ​ມີສາເຫດ​ມາ​ຈາກ​ຄວາມຂັດແຍ້ງກ່ຽວກັບ​ການອ້າງ ສິດໃນເສັ້ນທາງ​ນ້ຳ​ທີ່​ມີການນໍາໃຊ້ຫຼາຍທີ່ສຸດ.

ໂຄສົກຂອງ​ກອງທັບ​ອາກາດ​ຟີ​ລິບ​ປິນ ທ່ານນາງ ມາເຣຍ ຄອນຊູແອລໂລ ຄາສທີລໂລ (Maria Consuelo Castillo) ກ່າວ​ວ່າ ການ​ຊ້ອມ​ລົບ​ເປັນ​ເວລາ​ນຶ່ງມື້​ຂອງພັນທະ​ມິດຕາມ​ສົນທິສັນຍາ ​ໄດ້​ປະຕິບັດການ​ຢູ່ຂົງ​ເຂດ​ທະ​ເລ​ຟີ​ລິບ​ປີນ​ຕາ​ເວັນ​ຕົກ, ​ໂດຍ​ໃຊ້​ຄຳ​ສັບ​ຂອງ​ມະ​ນີ​ລາ ສຳລັບຮ້ອງນ່ານ​ນ້ຳ​ຢູ່​ໃນທະ​ເລ​ຈີນ​ໃຕ້ ທີ່ຕັ້ງຢູ່ໃນເຂດເສດຖະກິດພິເສດຂອງປະເທດ.

ທ່ານນາງ ຄາສທີລໂລ ກ່າວ​ໃນ​ຖະ​ແຫຼງການ​ສະບັບ​ນຶ່ງ​ວ່າ “ການ​ຊ້ອມ​ລົບ ມີເປົ້າໝາຍເພື່ອ​ແນ​ໃສ່​ເພີ້ມ​ທະວີ​ການ​ປະສານ​ງານ​ດ້ານປະຕິບັດການ, ປັບປຸງ​ການ​ຮັບ​ຮູ້​ຂອບ​ເຂດທາງ​ອາກາດ, ​ແລະ​ເສີມ​ຂະຫຍາຍ​ຄວາມ​ສາມາດ ​ໃນ​ການປະຕິບັດການ​ສູ້​ລົບ​ທີ່​ວ່ອງ​ໄວ​ລະຫວ່າງ​ກອງທັບ​ອາກາດຂອງທັງ​ສອງ​ປະ​ເທດ.”

ທ່ານນາງ ຄາສທີລໂລ ກ່າວວ່າ ເຮືອບິນສູ້ລົບ FA-50 ຂອງຟີລິບປິນ 3 ລຳ, ແລະເຮືອບິນຖິ້ມລະເບີດ B1-B ຂອງສະຫະລັດ 2 ລຳ, ກໍໄດ້ເຂົ້າຮ່ວມການ ຊ້ອມລົບດັ່ງກ່າວ, ເຊິ່ງລວມມີການບິນຢູ່ເໜືອ ຫາດຊາຍ ສກາຣ໌ໂບໂຣ (Scarborough Shoal), ເຊິ່ງເປັນບໍລິເວນທີ່ກອງທັບອາກາດຂອງ ຈີນ ໄດ້ປະຕິບັດການໃນສິ່ງທີ່ຮ້ອງວ່າ ການລາດຕະເວນທີ່ເປັນປົກກະຕິ ອີກດ້ວຍ.

ໃນ​ຖະ​ແຫຼ​ງການ​ສະບັບ​ນຶ່ງ​ຂອງ​ວັນ​ອັງຄານ​ມື້​ນີ້, ກອງທັບ​ຈີນ ​ໄດ້ອອກມາ​ກ່າວ​ຫາ ​ຟີ​ລິບ​ປິນ ວ່າ​ໄດ້​ເຂົ້າ​ຮ່ວມ​ການ​ລາດຕະ​ເວນ​ທີ່​ຕົນລະບຸ​ວ່າ ຈັດ​ຂຶ້ນ​ໂດຍ​ຕ່າງປະ​ເທດ​ເພື່ອ “ທຳລາຍ​ສັນຕິພາບ​ ແລະ​ສະຖຽນ​ລະ​ພາບ​ຢູ່ຂົງເຂດ​ທະ​ເລ​ຈີນ​ໃຕ້.”

ກອງ​ບັນຊາ​ການ​ກອງທັບ​ອາກາດ​ຈີນ ​ຈະຍັງຄົງ “​ເຝົ້າລະວັງຢູ່ໃນລະດັບ​ສູງ, ​ເພື່ອການ​ປົກ​ປັກ​ຮັກສາ​ອະທິປະ​ໄຕ​ ພ້ອມທັງສິດທິ ​ແລະຜົນ​ປະ​ໂຫຍ​ດທາງ​ທະ​ເລ​ຂອງ ​ຈີນ, ​ພ້ອມກັນນັ້ນ ກໍ​ຄວບ​ຄຸມ​ກິດຈະກໍາທາງທະຫານຕ່າງໆ​ທີ່​ເປັນຂໍ້ພິ ພາກດຢູ່ບໍລິເວນ​ທະ​ເລ​ຈີນ​ໃຕ້.

ຈີນ ​ອ້າງ​ເອົາສິດເໜືອ​ເສັ້ນ​ທາງທີ່ເປັນ​ຍຸດ​ທະ​ສາດ​ເກືອບ​ທັງ​ໝົດ, ເຊິ່ງເປັນເສັ້ນ ທາງການຄ້າທາງ​ນ້ຳ​ທີ່​ມີ​ມູນ​ຄ່າ 3 ພັນ​ຕື້​ໂດ​ລາ​ຕໍ່ປີ, ເຖິງ​ແມ່ນ​ຈະມີການອ້າງ ສິດເໜືອຂົງເຂດຂອງ ​ອິນ​ໂດ​ເນ​ເຊຍ, ມາ​ເລ​ເຊຍ, ຟີ​ລິບ​ປິນ ​ແລະ​ຫວຽດ​ນາມ​ ທີ່ທັບ​ຊ້ອນ​ກັນກໍຕາມ.

ອ່ານຂ່າວນີ້ເປັນພາສາອັງກິດ

ຟໍຣັມສະແດງຄວາມຄິດເຫັນ

XS
SM
MD
LG