ທຳນຽບຫ້າແຈກ່າວໃນວັນອັງຄານວານນີ້ວ່າ ການໂຈມຕີທາງ
ອາກາດ ຂອງສະຫະລັດ ຕໍ່ຄ້າຍຝຶກແອບ ຂອງກຸ່ມກໍ່ການຮ້າຍ
ອາລກາອີດາໃນເຢເມນ ໄດ້ສັງຫານພວກກໍ່ການຮ້າຍຫຼາຍສິບ
ຄົນ.
ທ່ານ Peter Cook ໂຄສົກຂອງທຳນຽບຫ້າແຈ ກ່າວວ່າ ການ
ໂຈມຕີທາງອາກາດໃນຄັ້ງນີ້ ໄດ້ສ້າງຄວາມເສຍຫາຍຢ່າງໜັກ
ໃຫ້ແກ່ຄວາມສາມາດຂອງກຸ່ມອາລກາອີດາຢູ່ແຫຼມອາຣາເບຍ
ຫຼື AQAP ເພື່ອນຳໃຊ້ເຢເມນເປັນຖານປະຕິ ບັດງານໃນການ
ໂຈມຕີທີ່ຂົ່ມຂູ່ຕໍ່ເຈົ້າໜ້າທີ່ສະຫະລັດ ແລະໄດ້ສະແດງໃຫ້ເຫັນ
ເຖິງຄວາມໝາຍໝັ້ນ ຂອງພວກເຮົາ ເພື່ອຈະເອົາຊະນະກຸ່ມກໍ່
ການຮ້າຍອາລກາອີດາແລະປະຕິເສດບໍ່ໃຫ້ບ່ອນຫລົບລີ້ແກ່ພວກເຂົາ.
ທ່ານ Peter Cook ກ່າວວ່າ ມີພວກກໍ່ການຮ້າຍຫລາຍກວ່າ 70 ຄົນ ກຳລັງຝຶກແອບຢູ່ທີ່
ຄ້າຍແຫ່ງນັ້ນແລະພວກນັກຊ່ຽວຊານກຳລັງຊັ່ງຊາຕີລາຄາເບິ່ງຜົນຂອງການໂຈມຕີທາງ
ອາກາດດັ່ງກ່າວ. ແຕ່ທ່ານກໍກ່າວວ່າ ຜົນໃນຂັ້ນຕົ້ນສະແດງໃຫ້ເຫັນວ່າມີສະມາຊິກກຸ່ມກໍ່
ການຮ້າຍອາລກາອີດາຫລາຍສິບຄົນໄດ້ຖືກຂ້າຕາຍ.
ເຈົ້າໜ້າທີ່ສະຫະລັດຖືວ່າ ກຸ່ມ AQAP ເປັນເຄືອຂ່າຍຂອງກຸ່ມອາລກາອີດາທີ່ເປັນອັນຕະ
ລາຍທີ່ສຸດແລະເປັນກຸ່ມທີ່ໄດ້ແຍກຕົວອອກມາ.
ກຸ່ມກໍ່ການຮ້າຍດັ່ງກ່າວນີ້ໄດ້ສວຍໂອກາດໃນລະຫວ່າງທີ່ເກີດການສູ້ລົບ ຄວາມວຸ້ນວາຍ
ແລະຄວາມສັບສົນທາງການເມືອງ ຢູ່ໃນເຢເມນ ເຂົ້າຍຶດເອົາພື້ນທີ່ແລະທຳການໂຈມຕີກໍ່
ການຮ້າຍ.