ສານສູງສຸດເຄນຢາ ຕັດສິນໃຫ້ທ່ານ Kenyatta ຊະນະການເລືອກຕັ້ງ

NAIROBI —  ສານ​ສູງ​ສຸດ​ຂອງ​ປະ​ເທດ​ເຄນ​ຢາ ​ໄດ້​ຕັດສິນ​ຢ່າງ​ເປັນ​ເອກ​ກະສັນໃຫ້ການ​ເລືອກຕັ້ງ​ທົ່ວ​ປະ​ເທດ​ຂອງ​ເຄນ​ຢາ​ ເມື່ອ​ວັນ​ທີ່ 4 ​ເດືອນ​ມີນາ​ຜ່ານ​ມາ​ນີ້ ຖືກຕ້ອງ ຊຶ່ງ​ເປັນ​ການ​ຢືນຢັນ​ໄຊຊະນະຂອງ ທ່ານ Uhuru Kenyatta ໃນ​ການຖືກເລືອກ​ຕັ້ງ​ເປັນປະທານາທິບໍດີ.

ສານ​ສູງ​ສຸດ​ໄດ້​ຕັດສິນ​ ເມື່ອ​ວັນ​ເສົາ​ວານ​ນີ້ ວ່າ ທ່ານ Kenyatta ​ແລະ​ຜູ້​ຮອງ​ຂອງ​ທ່ານ ຄື ທ່ານ William Ruto ໄດ້ຖືກ​ເລືອກ​ຕັ້ງ​ຢ່າງ​ຖືກຕ້ອງ​ຕາມ​ກົດໝາຍ.

ຜູ້​ໄດ້​ຮັບ​ຄະ​ແນນ​ສຽງ​ຮອງ​ມາ ​ຄື ທ່ານ Raila Odinga ທີ່​ໄດ້​ທ້າ​ທາຍ ຕໍ່ຜົນການ​ເລືອກ​ຕັ້ງນັ້ນ ​ໄດ້​ໃຫ້​ຄໍາ​ໝັ້ນ​ສັນ​ຍາ​ວ່າຈະ​ເຄົາລົບ​ຄໍາ​ຕັດສິນ​ຂອງ​ສານ ​ແລະ​ກໍ​ໄດ້​ສົ່ງ​ຄວາມ​ປາດ​ຖະໜາ​ດີໄປ​ເຖິງ​ທ່ານ Kenyatta.

​ເມື່ອ​ວັນເສົາ​ວານ​ນີ້ ທ່ານ ບາຣັກ ​ໂອ​ບາ​ມາ ປະ​ທາ​ນາ​ທິບໍດີ​ສະຫະລັດ ​ໄດ້ກ່າວ​ໃນ​ຖະ​ແຫຼງການ​ສະບັບ​ນຶ່ງ​ ​ສະ​ແດງ​ຄວາມ​ຍິນ​ດີນໍາ​ການ​ເລືອກ​ຕັ້ງ ຂອງ​ທ່ານ Kenyatta. ນອກ​ນີ້ທ່ານ ​ໂອ​ບາ​ມາ ຍັງ​ໄດ້​ສະ​ແດງ​ຄວາມ​ຍິນ​ດີ​ຕໍ່​ທ່ານ Odinga ​ເຊັ່ນ​ກັນ ​ແລະຕໍ່​ປະຊາ​ຊົນ​ເຄນ​ຢາ ທີ່​ຮັບ​ເອົາການ​ຕັດ ສິນ​ຂອງ​ສານ​ ກ່ຽວ​ກັບ​ຜົນການ​ເລືອກ​ຕັ້ງ​ຄັ້ງ​ນີ້ຢ່າງ​ສັນຕິ.

ສ່ວນ ທ່ານ ພັນ ຄີ​ມູນ ​ເລຂາທິການ​ໃຫຍ່​ອົງການ​ສະຫະ​ປະຊາ​ຊາດ ​ກໍ​ໄດ້ສະ​ແດງ​ຄວາມ​ຍິນ​ດີ ​ຕໍ່​ບຸລຸດ​ທັງ​ສອງ​ທາງ​ໂທລະສັບ ແລະ​ຊົມ​ເຊີຍ ພວກ​ເຂົາ​ເຈົ້າ ​ແລະ​ປະເທດ​ຊາດ​ ທີ່​ໄດ້​ຈັດ​ການ​ເລືອກ​ຕັ້ງ​ຢ່າງ​ສັນຕິ​ແລະ​ໜ້າ​ເຊື່ອ​ຖື​ນັ້ນ.

​ແຕ່ຢູ່​ນອກ​ບໍລິ​ເວນ​ສານ​ສູງ​ສຸດ​ທີ່​ນະຄອນຫຼວງ​ໄນ​ໂຮບີ ຕໍາຫຼວດ​ໄດ້​ຍິງ​ລະ​ເບີດນໍ້າຕາ​ໃສ່​ ກຸ່ມ​ສະ​ໜັບສະ​ໜຸນ​ທ່ານ​ໂອ​ດິງກາ ທີ່​ໂກດ​ແຄ້ນ ​ແລະ​ໂຮມ​ຊຸມນຸມ ​ຕໍ່ຕ້ານ​ການ​ຕັດສິນ​ຂອງ​ສານ. ນອກ​ນີ້​ແລ້ວ​ ກໍ​ຍັງ​ມີການ​ເດີນ​ຂະ​ບວນປະ​ທ້ວງ ​ທີ່​ເມືອງ Kisumu ​ໃນພາກ​ຕາ​ເວັນ​ຕົກ​ຂອງ​ປະ​ເທດ ຊຶ່ງ​ເປັນ​ເມືອງບ້ານ​ເກີດ​ຂອງ​ທ່ານ​ໂອ​ດິງກາ​ນັ້ນ. ຜູ້​ສື່​ຂ່າວ​ວີ​ໂອ​ເອຄົນ​ນຶ່ງ ​ເຫັນ​ຜູ້ປະ​ທ້ວງ​ສີ່​ຄົນ​ໄດ້​ຮັບ​ບາດ​ເຈັບ​ ໃນ​ການ​ປະ​ທະ​ກັບ​ຕໍາຫຼວດ.