ຜູ້ຊາຍອາຍຸ 23 ປີໄດ້ຖືກຕຳຫລວດຈັບໄວ້ໃນວັນພະຫັດມື້ນີ້
ຫລັງຈາກລາວໄດ້ປີນຮົ້ວເຂົ້າໄປໃນເດີ່ນທຳນຽບຂາວ ຊຶ່ງພາ
ໃຫ້ມີການປິດ ຫ້າມເຂົ້າອອກຢູ່ບໍລິເວນ ທຳນຽບປະທານາທິ
ບໍດີສະຫະລັດ ເປັນຄັ້ງທີສອງ ທີ່ເກີດການຜິດພາດ ໃນການ
ຮັກສາຄວາມປອດໄພ ນັບແຕ່ເດືອນກັນຍາ ເປັນຕົ້ນມາ.
ໂຄສົກຕຳຫລວດລັບອາລັກຂາປະທານາທິບໍດີຄົນນຶ່ງ ກ່າວ
ວ່າ ທ້າວ Dominic Adesanya ທີ່ມາຈາກ ລັດແມຣິແລນ
ໃກ້ກັບນະຄອນຫລວງສະຫະລັດ ໄດ້ຖືກຈັບ ຫລັງຈາກເຈົ້າ
ໜ້າທີ່ແລະໝາໄລ່ທັນຜູ້ກ່ຽວ ປະມານ 7 ໂມງແລງຕາມເວລາ
ທ້ອງຖິ່ນ.
ອີງຕາມໂຄສົກແລ້ວ ຜູ້ລຸກລໍ້າຄົນນີ້ມີລາຍງານວ່າ ໄດ້ເຕະໝາ ແລະໝາສອງໂຕໄດ້ຖືກ
ນຳໄປຫາໝໍປົວສັດ ເພື່ອປິ່ນປົວບາດເຈັບທີ່ໄດ້ຮັບ ໃນລະຫວ່າງເກີດເຫດການດັ່ງກ່າວ.
ພໍ່ຂອງ ທ້າວ Adesanya ກ່າວຕໍ່ໂທລະພາບທ້ອງຖິ່ນວ່າ ລູກຊາຍຂອງລາວ ເປັນໂຣກ
ຈິດລະແວງສົງໄສ ແລະເຊື່ອວ່າ ຕົນພວມຢູ່ພາຍໃຕ້ການຖືກຕິດຕາມສິ້ງຊອມເບິ່ງ.
ຍັງບໍ່ທັນມີການປະກາດ ກ່ຽວກັບການຕັ້ງຂໍ້ຫາເທື່ອ ໃນຄະດີນີ້.
ເຫດການໃນທຳນອງດຽວກັນເມື່ອເດືອນແລ້ວນີ້ ກໍຄືທ້າວ Omar Gonzalez ອາຍຸ 42
ປີ ນັກລົບເກົ່າທີ່ມີມີດເປັນອາວຸດ ໄດ້ແລ່ນຂ້າມເດີ່ນຫຍ້າ ແລະເຂົ້າໄປໃນທຳນຽບຂາວ
ກ່ອນທີ່ລາວຖືກຈັບໄດ້.
ລາວຍັງມີລູກປືນຫລາຍກວ່າ 800 ລູກ ຂວັນສອງອັນ ແລະມີດຍາວອັນນຶ່ງ ຢູ່ໃນລົດຂອງ
ລາວ. ທ້າວ Gonzalez ປະເຊີນໜ້າກັບການຖືກກ່າວຫາວ່າ “ທໍາຮ້າຍ ຂັດຂືນ ຫລືຕ້ານ
ຢັນ” ບັນດາເຈົ້າໜ້າທີ່ຕຳຫລວດລັບສະຫະລັດ.
ການຂາດຕົກບົກຜ່ອງ ໃນການຮັກສາຄວາມປອດໄພ ແບບທີ່ບໍ່ເຄີຍມີມາກ່ອນ ໄດ້ນຳພາ
ໄປສູ່ ການຮັບຟັງຄຳໃຫ້ການ ຂອງຄະນະກຳມະການລັດຖະສະພາ ແລະການລາອອກ
ຂອງທ່ານນາງ Julia Pierson ຈາກຫົວໜ້າຕຳຫລວດລັບ.
ວີດີໂອພາສາລາວ ກ່ຽວກັບການລ່ວງລ້ຳ ເຂົ້າໄປໃນທຳນຽບຂາວ ເມື່ອເດືອນກັນຍາ:
