ນັກລົບເກົ່າ ຈາກໜ່ວຍກ້າຕາຍ ຂອງກອງທັບເຮືອສະຫະລັດ
ຄົນນຶ່ງ ກ່າວວ່າ ລາວແມ່ນຜູ້ໂຈມຕີ ໃນຕອນກາງຄືນ ທີ່ໄດ້ຍິງ
ສັງຫານ ທ້າວ Osama bin Laden ຜູ້ນຳກຸ່ມກໍ່ການຮ້າຍ
al-Qaida ຢູ່ທີ່ບ່ອນຫລົບລີ້ ໃນປາກິສຖານ ເມື່ອປີ 2011
ຜ່ານມາ.
ຊື່ຂອງລາວໄດ້ຖືກປິດລັບມາ ເປັນເວລາຫຼາຍກວ່າ 3 ປີແລ້ວ
ແຕ່ ທ່ານ Robert O’Neil ບອກກັບບັນດາອົງການຂ່າວຂອງ
ສະຫະລັດວ່າ ລາວເປັນຜູ້ຍິງປືນສາມລູກ ໃສ່ bin Laden ທີ່
ຖືກໜ້າຜາກ 2 ລູກ ແລະ ຕິດຕາມດ້ວຍລູກທີສາມ ໃນເວລາ
ຜູ້ກ່ຽວລົ້ມລົງໃສ່ພື້ນຕໍ່ໜ້າຕຽງນອນ ຢູ່ເຮືອນຂອງລາວ ໃນເມືອງ
Abbottabad ປະເທດປາກິສຖານ.
ທ່ານ O’Neil ກ່າວວ່າ ລາວຢູ່ໃກ້ໆຜູ້ທຳອິດ ຂອງແຖວໜ່ວຍກ້າຕາຍ Navy SEAL ທີມທີ 6 ທີ່ບຸກເຂົ້າໄປໃນບ່ອນຫລົບລີ້ ຂອງ bin Laden ແລະ ໄດ້ປະເຊີນໜ້າກັບຜູ້ວາງແຜນໂຈມຕີສະຫະລັດ ຂອງກຸ່ມກໍ່ການຮ້າຍ al-Qaida ເມື່ອປີ 2001 ທີ່ໄດ້ສັງຫານເກືອບ 3,000 ຄົນ.
ທ່ານ O’Neil ເວົ້າວ່າ ໜ່ວຍກ້າຕາຍ SEAL ຄົນທຳອິດທີ່ໄດ້ໄປເຖິງຫ້ອງຂອງ bin Laden ນັ້ນ ໄດ້ຍິງຜູ້ກ່ຽວໃນທັນທີແຕ່ປາກົດວ່າບໍ່ຖືກ ກ່ອນໜ້າລາວໄດ້ເຫັນ bin Laden ຜ່ານທາງກ້ອງ ທີ່ສາມາດແນມ ເຫັນໃນຕອນກາງຄືນ ຂອງລາວນັ້ນ.
ທ່ານ O’Neil ໄວ 38 ປີ ກ່າວຕໍ່ໄປວ່າ ຢ່າງນ້ອຍ ມີສະມາຊິກຂອງໜ່ວຍກ້າຕາຍ SEAL
ອີກສອງຄົນ ໄດ້ຍິງ bin Laden ຕື່ມອີກ ລວມທັງ Matt Bissonnette ຜູ້ທີ່ໄດ້ຂຽນປຶ້ມ
ຫົວນຶ່ງອອກມາກ່ອນໜ້ານີ້ ກ່ຽວກັບການໂຈມຕີ ທີ່ມີຊື່ວ່າ No Easy Day ຫຼື ບໍ່ມີມື້ງ່າຍດາຍ.
