ພະພຸດທະຮູບເກົ່າແກ່ຫຼາຍຮ້ອຍອົງ ທີ່ຖືກລັກຈາກວັດຕ່າງໆ
ໃນລາວຍັງບໍ່ສາມາດ ຕິດຕາມນຳກັບຄືນມາໄດ້ ໂດຍເຊື່ອວ່າ
ພະພຸດທະຮູບສ່ວນໃຫຍ່ຂອງລາວ ຖືກນຳໄປຂາຍໃນ
ປະເທດໄທ.
ເຈົ້າໜ້າທີ່ຂັ້ນສູງໃນກະຊວງຖະແຫລງຂ່າວ ວັດທະນະທຳ ແລະທ່ອງທ່ຽວ ໄດ້ໃຫ້ການ
ຍອມຮັບວ່າ ການລັກຂະໂມຍພະພຸດທະຮູບເກົ່າແກ່ໃນລາວ ໄດ້ກາຍເປັນບັນຫາ ທີ່ຮຸນ
ແຮງຫຼາຍຂຶ້ນນັບມື້ ໂດຍສະເພາະແມ່ນໃນລະຍະ 10 ປີມານີ້ ກໍປາກົດວ່າ ມີພະພຸດທະຮູບ
ເກົ່າແກ່ຈຳນວນຫຼາຍຮ້ອຍອົງ ໄດ້ຖືກລັກຂະໂມຍໄປຈາກວັດຕ່າງໆ ໃນທົ່ວປະເທດ ແລະ
ຍັງບໍ່ສາມາດຕິດຕາມ ເພື່ອນຳກັບຄືນມາໄດ້ເລີຍ ຈົນເຖິງທຸກມື້ນີ້.
ເຈົ້າໜ້າທີ່ຂັ້ນສູງຂອງລາວ ບອກດ້ວຍວ່າ ບັນດາວັດວາອາຮາມ ທີ່ຕົກເປັນເປົ້າໝາຍຂອງ
ການລັກຂະໂມຍ ພະພຸດທະຮູບຫຼາຍທີ່ສຸດ ກໍຄືວັດທີ່ຕັ້ງຢູ່ໃນເຂດ ແຂວງຫລວງພະບາງ
ສະຫວັນນະເຂດ ຈຳປາສັກ ບໍ່ແກ້ວ ນະຄອນຫລວງວຽງຈັນ ຊຽງຂວາງ ຄຳມ່ວນ ແລະ
ແຂວງວຽງຈັນ ເນື່ອງຈາກວ່າ ເປັນເຂດທີ່ມີວັດວາອາຮາມ ແລະ ພະພຸດທະຮູບເກົ່າແກ່
ຫຼາຍກວ່າເຂດອື່ນໆ.
ໂດຍຈາກການກວດກາສະເພາະຢູ່ໃນແຂວງຫລວງພະບາງ
ໃນຊ່ວງປີ 2012-2014 ທີ່ຜ່ານມານີ້ ພົບວ່າ ມີພະພຸດທະຮູບ
ຈຳນວນຫຼາຍກວ່າ 1,300 ອົງ ທີ່ປະດິດສະຖານຢູ່ໃນວັດ 35
ແຫ່ງ ແລະ ໃນນີ້ຍັງລວມເຖິງ ພະພຸດທະຮູບ ຈຳນວນຫຼາຍ
ກວ່າ 100 ອົງ ທີ່ຖືກລັກຂະໂມຍໄປ ແລະ ຍັງບໍ່ສາມາດຕິດ
ຕາມ ເພື່ອນຳກັບຄືນມາໄດ້ ຈົນເຖິງປັດຈຸບັນນີ້.
ຊຶ່ງກໍເຊັ່ນດຽວກັນກັບ ໃນແຂວງສະຫວັນນະເຂດ ແລະ ແຂວງ
ຈຳປາສັກ ທີ່ພະພຸດທະຮູບ ຈຳນວນລວມກັນຫຼາຍກວ່າ 300
ອົງ ຖືກລັກຂະໂມຍໄປ ແລະ ຍັງບໍ່ສາມາດຕິດຕາມນຳກັບຄືນ
ມາໄດ້ເລີຍ ໂດຍເຈົ້າໜ້າທີ່ ຂັ້ນສູງຂອງລາວ ເຊື່ອວ່າ ພະພຸດທະຮູບຂອງລາວ ທີ່ຖືກລັກຂະໂມຍໄປນັ້ນ ສ່ວນໃຫຍ່ຖືກລັກລອບ ຂົນສົ່ງໄປຂາຍໃຫ້ກັບບັນດານັກຄ້າວັດຖຸໂບຮານໃນໄທ ທີ່ມີສູນກາງການຄ້າ ຢູ່ໃນບາງກອກ ແລະ ຈັງຫວັດນົນທະບູລີ ໃນພາກກາງຂອງໄທ.
ທາງດ້ານທ່ານຣາມ ວັດຊະຣະປຣະດິດ ນັກວິຊາການດ້ານໂບຮານນະຄະດີຂອງໄທ ກໍໄດ້
ໃຫ້ການຢືນຢັນວ່າ ປະເທດໄທໄດ້ຖືກຂະບວນການຄ້າ ວັດຖຸໂບຮານ ໃຊ້ເປັນສູນກາງການ
ຊື້ຂາຍ ພະພຸດທະຮູບເກົ່າແກ່ ທີ່ຖືກລັກຂະໂມຍຈາກວັດວາອາຮາມຕ່າງໆ ທັງທີ່ຢູ່ໃນໄທ
ແລະ ຈາກປະເທດເພື່ອນບ້ານ ໂດຍສະເພາະ ແມ່ນພະພຸດທະຮູບເກົ່າແກ່ ທັງຈາກລາວ
ກຳປູເຈຍ ແລະ ມຽນມານັ້ນ ຖືເປັນວັດຖຸໂບຮານ ທີ່ເປັນທີ່ຕ້ອງການຂອງບັນດານັກສະສົມ
ຫຼາຍທີ່ສຸດ ດັ່ງທີ່ທ່ານໄດ້ໃຫ້ການຢືນຢັນວ່າ:
“ພຸດທະສິນລະປະແຕ່ລະສະໄໝຫັ້ນ ຝີມືຊ່າງນັ້ນ
ໂດດເດັ່ນ ແລ້ວກໍແຕ່ລະຍຸກ ແຕ່ລະສະໄໝຫັ້ນ ເປັນ
ທີ່ຕ້ອງການ ຂອງນັກສະສົມ ເປັນພວກ Collector
ຕ່າງໆນັ້ນ ກໍຈະສະສົມທັງໃນຕ່າງປະເທດ ແລະ ທັງ
ໃນໄທ ເພາະສະນັ້ນ ກໍຈະມີການສະສົມໃນແງ່ຂອງ
ວັດຖຸໂບຮານ.”
ຍິ່ງໄປກວ່ານັ້ນ ການທີ່ພະພຸດທະຮູບເກົ່າແກ່ ໄດ້ຖືກສ້າງຂຶ້ນ
ດ້ວຍໂລຫະມີຄ່າ ເຊັ່ນຄຳ ແລະ ທອງ ດ້ວຍແລ້ວ ກໍຍັງເປັນ
ອີກສາເຫດໜຶ່ງ ທີ່ເຮັດໃຫ້ບັນດາອາຊະຍາກອນທັງຫຼາຍ ໄດ້ພາກັນລັກຂະໂມຍຕັດເອົາສຽນພະພຸດທະຮູບອີກດ້ວຍ ດັ່ງທີ່ ທ່ານຣາມ ໄດ້ໃຫ້ການ
ອະທິບາຍວ່າ:
“ເນື່ອງຈາກຕອນເທ ເຂົາເທຫລອມນັ້ນ ເຂົາເອົາສຽນພະປີ້ນຫົວລົງ ແລ້ວກໍຖອກ
ນ້ຳທອງ ທີນີ້ທອງຫັ້ນເປັນໂລຫະທີ່ໜັກທີ່ສຸດ ພໍປະສົມລວມກັບມວດສານອື່ນໆ
ຫັ້ນ ກໍຈະໄຫລໄປລວມກັນ ທີ່ພະສຽນ ເພາະສະນັ້ນ ພະສຽນນັ້ນ ຈະມີທອງຄຳ
ລວມຢູ່ຫຼາຍທີ່ສຸດ ຂະໂມຍມັນເລີຍຈະຕັດ ແຕ່ຫົວພະໄປ ແລ້ວກໍໄປຫລອມ ກໍຈະ
ໄດ້ທອງຄຳແທ້ໆຫັ້ນ ຈຳນວນໜຶ່ງ ກໍຈະເອົາໄປຂາຍໄດ້.”
ສຳຫລັບພະພຸດທະຮູບເກົ່າແກ່ທີ່ສຸດ ທີ່ຖືກລັກຂະໂມຍໄປ ຈາກລາວນັ້ນ ກໍປະກອບດ້ວຍ
ພະພຸດທະຮູບ ທີ່ສ້າງດ້ວຍຄຳ ແລະ ທອງຈຳນວນ 16 ອົງ ທີ່ຖືກລັກໄປຈາກວັດຊຽງທອງ
ສ່ວນອີກຫຼາຍກວ່າ 100 ອົງ ກໍຖືກລັກຂະໂມຍໄປ ຈາກວັດທາດຫລວງ ແລະ ວັດ
ສີພຸດທະບາດ ໃນແຂວງຫລວງພະບາງ.
ແຕ່ຢ່າງໃດກໍຕາມ ເຈົ້າໜ້າທີ່ຂັ້ນສູງ ໃນແຂວງຫລວງພະບາງ ກໍເຊື່ອວ່າ ໃນຄວາມເປັນ
ຈິງນັ້ນ ມີພະພຸດທະຮູບເກົ່າແກ່ ຈຳນວນຫຼາຍກວ່ານີ້ ທີ່ຖືກລັກຂະໂມຍໄປ ຈາກແຂວງ
ຫລວງພະບາງ ເພາະການສຳຫລວດ ເພື່ອຂຶ້ນທະບຽນພະພຸດທະຮູບ ແລະ ວັດຖຸໂບຮານ
ໃນແຂວງຫລວງພະບາງນີ້ ໄດ້ເລີ້ມລົງມືນັບແຕ່ປີ 2001 ເປັນຕົ້ນມາ ຈຶ່ງເຊື່ອວ່າ ໄດ້ມີການ
ລັກຂະໂມຍ ພະພຸດທະຮູບເກົ່າແກ່ ຈຳນວນບໍ່ນ້ອຍໄປຈາກ ແຂວງຫລວງພະບາງ ກ່ອນ
ໜ້າ ທີ່ຈະມີການສຳຫລວດດັ່ງກ່າວ ແລ້ວນັ້ນເອງ.