ຕຳຫຼວດໄຕ້ຫວັນ ໄດ້ຈັບກຸມຜູ້ຮັບເໝົາ ກໍ່ສ້າງຕຶກອາຄານຫໍພັກ
17 ຊັ້ນໃນເມືອງ Tainan ທີ່ພັງທະລາຍລົງ ໃນຂະນະທີ່ໄດ້
ກີດແຜ່ນດິນໄຫວຂຶ້ນໃນວັນເສົາທີ່ຜ່ານມານີ້ ຊຶ່ງເຮັດໃຫ້ມີຜູ້ເສຍ
ຊີວິດ 40 ຄົນນັ້ນ.
ທ່ານ Lin Ming-hui ໄດ້ຖືກຟ້ອງຄະດີໃນການສັງຫານຄົນ
ໂດຍບໍ່ເຈດຕະນາ ຍ້ອນຄວາມບໍ່ເອົາໃຈໃສ່ ໂດຍຈະຖືກສອບຖາມກ່ຽວກັບການກໍ່ສ້າງແລະອຸບປະກອນທີ່ນຳມາໃຊ້ໃນການ
ສ້າງຕຶກອາຄານຫໍພັກ Weigun Golden Dragon ຊຶ່ງໄດ້
ກໍ່ໃຫ້ເກີດມີຄຳຖາມ ຫລັງຈາກ ຮູບພາບກ່ຽວກັບກະປ໋ອງນ້ຳ
ໂສດາ ແລະໂຟມ ທີ່ນຳມາກໍ່ສ້າງເຂົ້າໃສ່ໃນຝາຂອງອາຄານ
ຫໍພັກນັ້ນ. ໄດ້ມີໝາຍຈັບກຸມຊາຍອີກ 2 ຄົນ ນຳ.
ໄດ້ມີຫຼາຍກວ່າ 300 ຄົນ ໄດ້ຖືກຊ່ອຍກູ້ອອກມາຈາກຊາກຫັກພັງຂອງຕຶກອາຄານດັ່ງກ່າວນີ້ ແລະຍັງມີອີກຫຼາຍກວ່າ 100 ຄົນ ທີ່ຍັງສົງໄສວ່າ ຕົກຄ້າງຢູ່ກ້ອງຊາກຫັກພັງນັ້ນ. ພວກຊ່ອຍ
ກູ້ໄພແມ່ນໄດ້ປະຕິບັດງານຢ່າງບໍ່ຢຸດຢັ້ງ ໂດຍໃຊ້ເຄື່ອງຈັກຍົກແລະເຄື່ອງດັກຟັງອີເລັກໂທຣ
ນິກຕ່າງໆ ພ້ອມທັງມືເປົ່າ ໃນຄວາມຫວັງທີ່ຈະພົບເຫັນ ພວກທີ່ອາດລອດຊີວິດມາໄດ້ໃນ
ຊາກຫັກພັງທັງຫຼາຍນີ້ ໃນຊ່ວງໄລຍະ 72 ຊົ່ວໂມງ ຂອງແຜ່ນດິນໄຫວທີ່ໄດ້ເກີດຂຶ້ນນັ້ນ ຊຶ່ງເປັນໄລຍະເວລາທີ່ຕ່ຳສຸດທີ່ນັກຊ່ຽວຊານໄດ້ໃຫ້ເວລາໄວ້ສຳຫຼັບພວກທີ່ຕົກຄ້າງຢູ່ຂ້າງໃນ
ຊາກຫັກພັງທີ່ສາມາລອດຊີວິດມາໄດ້ ໂດຍທີ່ປາດສະຈາກອາຫານ ຫຼືນ້ຳດື່ມນັ້ນ.
ໄດ້ມີການຊ່ອຍກູ້ເອົາພວກທີ່ລອດຊີວິດມາໄດ້ອີກຕື່ມ 4 ຄົນ ໃນວັນຈັນວານນີ້ ໃນຈຳນວນ
ນັ້ນ ແມ່ນມີເດັກຍິງໄວ 8 ຂວບ ທີ່ໄດ້ຕົກຄ້າງຢູ່ໃນຊາກຫັກພັງນັ້ນນານກວ່າ 60 ຊົ່ວໂມງ.