ພວກທະຫານບ້ານມຸສລິມ ນິກາຍ Shi’ite ແລະທະຫານລັດຖະບານ ອີຣັກ ໄດ້ເປີດການໂຈມຕີໂຕ້ຕອບ ພວກກະບົດລັດອິດສະລາມ ໃນວັນເສົາວານນີ້ ຢູ່ທາງພາກຕາເວັນອອກຂອງເມືອງ Ramadi ໃນການດຳເນີນພະຍາຍາມຄັ້ງທຳອິດ ເພື່ອຍຶດເອົາຕົວເມືອງຄືນ ຕັ້ງແຕ່ມັນໄດ້ຕົກຢູ່ໃນກຳມື ຂອງພວກກຸ່ມຫົວຮຸນແຮງ ເມື່ຶອໜຶ່ງສັບປະດາທີ່ຜ່ານມາ.
ການເສຍເມືອງ Ramadi ຂອງແຂວງ Anbar ໄປ ໃນວັນທີ 17 ພຶດສະພາ ໄດ້ສ້າງຄວາມເສຍຫາຍ ທີ່ອາດເຖິງຂັ້ນໜັກໜ່ວງທີ່ສຸດ ໃຫ້ແກ່ລັດຖະບານກາງຂອງ Baghdad.
ປະຈຸບັນນີ້ ກຸ່ມຫົວຮຸນແຮງ ມຸສລິມ ຊຸນນີ ລັດອິດສະລາມນັ້ນ ແມ່ນ ຄວບຄຸມພາກສ່ວນ ໃຫຍ່ ຂອງແຂວງ Anbar ທີ່ກ້ວາງໃຫຍ່ ຢູ່ໃນພາກ ຕາເວັນຕົກຂອງ ອີຣັກ ເຊິ່ງມີຊາຍແດນຕິດກັບ
ປະເທດ Syria, Jordan ແລະ Saudi Arabia. ພວກນັກ ວິເຄາະເວົ້າວ່າ ຖ້າຫາກບໍ່ຖືກຍັບຍັ້ງໄວ້ແລ້ວ ພວກນັກຕໍ່ສູ້ສົງຄາມສັກສິດທາງສາສະໜາ ກໍອາດຂົ່ມຂູ່ເສັ້ນ ທາງເຂົ້າສູ່ນະຄອນຫຼວງ Baghdad ທາງກ້ຳຕາເວັນຕົກໄດ້.
ພວກເຫັນເຫດການບອກກັບອົງການຂ່າວ Reuters ໃນວັນເສົາທີ່ຜ່ານມາວ່າ ພວກ ນັກລົບ ມຸສລິມ Shi’ite ໄດ້ເຄື່ອນຍ້າຍເຂົ້າໄປສູ່ສາມເມືອງ ໃກ້ກັບເມືອງ Ramadi, ໜຶ່ງໃນນັ້ນແມ່ນ
ເມືອງ Husaiba al-Sharqiya ເຊິ່ງຄວບຄຸມໂດຍພວກ IS ຕັ້ງຢູ່ຫ່າງຈາກ Ramadi ໄປທາງ ກ້ຳຕາເວັນອອກ 7 ກິໂລແມັດ. ພ້ອມກັນນັ້ນ ຜູ້ເຫັນເຫດການຍັງໄດ້ລາຍງານວ່າ ມີການຍິງກັນ ແຕ່ບໍ່ໄດ້ບອກກ່ຽວກັບຜູ້ບາດເຈັບ ແລະ ເສຍຊີວິດ.
