ປະທານາທິບໍດີ ຊີເຣຍ ທ່ານ Bashar al-Assad ປະຕິເສດ
ຕໍ່ຂໍ້ກ່າວຫາ ໃໝ່ໆ ທີ່ວ່າ ກອງກຳລັງຂອງທ່ານ ໄດ້ໃຊ້ອາວຸດ
ເຄມີຕ່າງໆ ລວມທັງສານ chlorine ຕໍ່ພົນລະເຮືອນ ແລະ
ຄົນອື່ນ ໃນສົງຄາມການເມືອງຂອງປະເທດ.
ກຸ່ມປົກປ້ອງສິດທິມະນຸດ Human Rights Watch ຫຼື HRW
ໃນອາທິດນີ້ກ່າວວ່າ ຕົນມີຫລັກຖານທີ່ “ສະເໜີແນະ ຢ່າງ
ໜັກແໜ້ນ” ວ່າ Damascus ໄດ້ໃຊ້ເຄມີທີ່ເປັນພິດຕ່າງໆ
ໃນການໂຈມຕີຫຼາຍໆບັ້ນ ດ້ວຍລະເບີດຖັງ ທີ່ຮ້າຍແຮງເຖິງ
ແກ່ຊີວິດ ຢູ່ໃນແຂວງ Idlib ເມື່ອເດືອນແລ້ວນີ້.
ບັນດາກຸ່ມປົກປ້ອງສິດທິມະນຸດ ແລະ ລັດຖະບານ ຂອງປະເທດຕາເວັນຕົກ ໄດ້ກ່າວຫາ
ລັດຖະບານ Assad ວ່າ ນຳໃຊ້ອາວຸດເຄມີຕ່າງໆ ຕໍ່ພົນລະເຮືອນ ຢູ່ເລື້ອຍໆ ຊຶ່ງເປັນ
ການກ່າວຫາ ທີ່ໄດ້ຖືກປະຕິເສດໂດຍ Damascus.
ຢູ່ໃນການສຳພາດ ທີ່ໄດ້ນຳອອກເຜີຍແຜ່ໃຫ້ຊາບ ໃນວັນສຸກມື້ນີ້ ປະທານາທິບໍດີ Assad
ບໍ່ສົນໃຈນຳ ການກ່າວຫາຕ່າງໆເຊັ່ນນັ້ນ ຊຶ່ງເປັນການ “ໂຄສະນາຊວນເຊື່ອ ຕໍ່ຕ້ານ
ຊີເຣຍ” ໂດຍທ່ານກ່າວວ່າ ມັນໄດ້ອອກແບບມາ ເພື່ອເຮັດໃຫ້ລັດຖະບານຂອງທ່ານ
ເປັນຄືກັບ “ມານຮ້າຍ.”
ທ່ານ Assad ກ່າວຕໍ່ ໂທລະພາບ Expressen ທີ່ມີຫ້ອງການຕັ້ງຢູ່ໃນປະເທດ Sweden
ວ່າ “ການໂຄສະນາຊວນເຊື່ອ ທາງສື່ມວນຊົນອັນນີ້ ບໍ່ໄດ້ສະທ້ອນໃຫ້ເຫັນ ເຖິງ
ສະພາບການໂຕຈິງ ຢູ່ໃນຂົງເຂດ ຂອງພວກເຮົາ ພວກເຂົາເຈົ້າ ບໍ່ມີຫລັກຖານ
ແມ່ນແຕ່ອັນດຽວ ກ່ຽວກັບເລື້ອງນີ້ເລີຍ.”
ກຸ່ມ HRW ກ່າວວ່າ ຕົນໄດ້ດຳເນີນການ ກວດສອບ ໃນການໂຈມຕີ 6 ບັ້ນ ຢູ່ໃນແຂວງ
Idlib ຊຶ່ງເປັນ ທີ່ສົງໄສກັນວ່າ ພວກເຮລິຄອບເຕີ້ ຂອງລັດຖະບານຊີເຣຍ ໄດ້ຖິ້ມລະເບີດ
ຖັງ ທີ່ບັນຈຸສານຄລໍຣີນນັ້ນ.
ອົງການຫ້າມໃຊ້ອາວຸດເຄມີ ຫຼື Organization for the Prohibition of Chemical
Weapons ກໍໄດ້ດຳເນີນການຄົ້ນຫາຄວາມຈິງເຊັ່ນ ດຽວກັນ ໃນເລື້ອງການໂຈມຕີ
ດັ່ງກ່າວ ແລະ ອື່ນໆອີກເຫຼົ່ານັ້ນ ແຕ່ກໍບໍ່ມີໜ້າທີ່ ທີ່ຈະຖິ້ມໂທດໃສ່ ຝ່າຍໃດຝ່າຍນຶ່ງ.