ອົງການສະຫະປະຊາຊາດ ກ່າວວ່າ ພວກຮູບພາບທີ່ຖ່າຍຈາກ
ດາວທຽມຢືນຢັນວ່າ ກຸ່ມລັດອິສລາມ ໄດ້ທຳລາຍອີກວັດນຶ່ງ
ທີ່ເມືອງໂບຮານທາງປະຫວັດສາດ Palmyria ໃນ Syria.
ພະແນກການນຶ່ງຂອງອົງການສະຫະປະຊາຊາດ ໄດ້ນຳອອກ
ເຜີຍແຜ່ຮູບຂອງວັດ Temple of Bel ເມື່ອວັນທີ 27 ສິງຫາ
ຜ່ານມານີ້ ແລະຮູບຂອງສະຖານທີ່ດຽວກັນທີ່ຖ່າຍໃນວັນຈັນ
ວານນີ້ ນຶ່ງມື້ ຫຼັງຈາກທີ່ພວກສັງເກດການໄດ້ກ່າວວ່າ ວັດທີ່
ກ່າວມານີ້ ໄດ້ຖືກທຳລາຍແລ້ວ.
ແຕ່ຜູ້ອຳນວຍການອົງການຄຸ້ມຄອງວັດຖຸໂບຮານຊີເຣຍ ທ່ານ Maamoun Abdulkarim ໄດ້ກ່າວວ່າ ທ່ານເຊື່ອ ຢ່າງນ້ອຍສ່ວນນຶ່ງຂອງວັດດັ່ງກ່າວ ຍັງເຫຼືອຢູ່. ທ່ານໄດ້ກ່າວໃນວັນຈັນວານນີ້ ວ່າ ມັນໄດ້ມີການລະເບີດຢ່າງໃຫຍ່ ຢູ່ໃນສະຖານທີ່ນັ້ນ ແຕ່ວ່າ ຍັງບໍ່ມີຜູ້ໃດສາມາດເຂົ້າໄປໃກ້ສະຖານທີ່ດັ່ງກ່າວ ເພື່ອໃຫ້ການຢືນຢັນໄດ້ເທື່ອວ່າ ວັດນັ້ນຍັງເຫຼືອຢູ່ ຫລາຍປານໃດ.
ວັດTemple of Bel ແມ່ນມີອາຍຸມາໄດ້ເກືອບ 2000 ປີ ແລະທາງການຊິເຣຍ ຈັດໃຫ້ເປັນສະຖານສຳຄັນສຸດທາງສາສະໜາຂອງປະເທດ.
ໃນສັບປະດາແລ້ວ ທາງກຸ່ມລັດອິສລາມ ໄດ້ນຳຮູບພາບ ອອກມາເຜີຍແຜ່ທາງສື່ສັງຄົມ
on-line ທີ່ສະແດງໃຫ້ເຫັນວ່າພວກຫົວຮຸນແຮງໄດ້ທຳລາຍອີກວັດນຶ່ງຂອງ Palmyria
ກໍຄືວັດ Baal Shamin. ອົງການສະຫະປະຊາຊາດເອີ້ນການກະທຳດັ່ງກ່າວ ວ່າ ເປັນການກໍ່ອາຊະຍາກຳສົງຄາມ.
ກຸ່ມສິ້ງຊອມສິດທິມະນຸດໃນຊິເຣຍ ທີ່ມີສຳນັກງານຢູ່ ໄດ້ກ່າວວ່າ 2 ສັບປະດາທີ່ຜ່ານມາ ກຸ່ມລັດອິສລາມໄດ້ຕັດຫົວຂອງອະດີດຜູ້ອຳນວຍການອົງການຄຸ້ມຄອງວັດຖຸ ໂບຮານທ່ານ Khaled Assad ແລະໄດ້ວາງສະແດງສົບຂອງທ່ານຕໍ່ສາທາລະນະ.
ກຸ່ມ ລັດອິສລາມໄດ້ເຂົ້າຍຶດເອົາເມືອງ Palmyria ໃນເດືອນພຶດສະພາຜ່ານມານີ້ ແລະພວກ ນັກປະຫວັດສາດ ໄດ້ສົ່ງຄຳເຕືອນຕໍ່ທົ່ວໂລກ. ກຸ່ມຫົວຮຸນແຮງ ເອີ້ນໂບຮານສະຖານ ແລະຮູບປັ້ນທັງຫຼາຍນີ້ວ່າ ໝິ່ນປະໝາດຕໍ່ສາສະໜາອິສລາມ. ພວກເຂົາຍັງໄດ້ທຳລາຍສະຖານທີ່ປະຫວັດສາດອື່ນໆໃນອິຣັກ ນຳ.
ແຕ່ ກຸ່ມສິ້ງຊອມສິດທິມະນຸດ ກ່າວວ່າ ກຸ່ມລັດອິສລາມໄດ້ຂາຍຊິ້ນສ່ວນວັດຖຸໂບຮານນີ້ ເພື່ອຫາເງິນ. ກຸ່ມດັ່ງກ່າວຍັງກ່າວອີກວ່າ ພວກເຂົາ ຍັງໄດ້ທຳລາຍ ແມ່ນກະທັງຮູບປັ້ນຈຳລອງ ແລະຖ່າຍທຳວີດີໂອ ເຮັດຕົວະ ຄືກັນກັບວ່າພວກເຂົາທຳລາຍຂອງຈິງ.