ປະທານາທິບໍດີ ສະຫະລັດ ທ່ານ ບາຣັກ ໂອບາມາ ພວມກຽມພ້ອມທີ່ຈະເປີດເຜີຍກົດລະບຽບໃໝ່ໃນວັນຈັນມື້ອື່ນນີ້ ໂດຍແນໃສ່ການຕັດມົນລະພິດ ທາດ ຄາບອນ ທີ່ເກີດມາຈາກໂຮງໄຟຟ້າແຫ່ງຕ່າງໆຂອງປະເທດ.
ເປົ້າໝາຍກໍແມ່ນເພື່ອຫຼຸດຜ່ອນການປ່ອຍທາດ ຄາບອນໂດຍລົງ 32 ເປີເຊັນຕ່ຳກວ່າລະດັບຂອງປີ 2005 ພາຍໃນປີ 2030. ແຕ່ລະລັດຈະໄດ້ມີຄວາມຮັບຜິດຊອບສຳລັບການຮ່າງແຜນ ການຂອງພວກເຂົາເຈົ້າ ເພືື່ອໃຫ້ບັນລຸເປົ້າໝາຍທີ່ວ່ານັ້ນ. ແຜນດັ່ງກ່າວຈະຕ້ອງມີຜົນບັງຄັບໃຊ້ພາຍໃນປີ 2022.
ທ່ານ ໂອບາມາ ໄດ້ເປີດເຜີຍກົດລະບຽບສະບັບເບື້ອງຕົ້ນໃນປີກາຍນີ້ ທີ່ຈະເລີ່ມ 2 ປີລ່ວງໜ້າ ແລະ ມີເປົ້າໝາຍທີ່ບໍ່ຮຸນແຮງເທົ້າກັບການຕັດການປ່ອຍທາດ ຄາບອນໂດຍ 30 ເປີເຊັນ.
ເຈົ້າໜ້າທີ່ທຳນຽບຂາວກ່າວວ່າ ກົດລະບຽບສະບັບໃໝ່ນີ້, ຖ້ານຳອອກປະຕິບັດ, ຈະເປັນການເພີ່ມຈໍານວນຂອງພະລັງງານໃນ ສະຫະລັດ ທີ່ຈະຜະລິດໂດຍແຫຼ່ງພະລັງງານທົດແທນເຖິງ 28 ເປີເຊັນ.
ທ່ານປະທານາທິບໍດີໄດ້ກ່າວໃນວິດີໂອ ທີ່ໄດ້ເອົາລົງໃນໜ້າເຟສບຸກ ຂອງທຳນຽບຂາວໃນຕອນເຊົ້າຂອງວັນອາທິດມື້ນີ້ວ່າ ສະພາບອາກາດແມ່ນກຳລັງປ່ຽນແປງ, ແລະ ວ່າບັນຫາ “ບໍ່ແມ່ນເລື່ອງສຳລັບຄົນຍຸກຕໍ່ໄປ.”
ທ່ານ ໂອບາມາ ໄດ້ກ່າວວ່າ “ມັນກຳລັງປ່ຽນແປງໃນທາງທີ່ເປັນໄພຂົ່ມຂູ່ຕໍ່ເສດຖະກິດ, ຄວາມໝັ້ນຄົງຂອງພວກເຮົາ ແລະ ສຸຂະພາບຂອງພວກເຮົາ.” “ນີ້ບໍ່ແມ່ນຄວາມຄິດເຫັນ, ມັນແມ່ນຂໍ້ເທັດຈິງທີ່ໜູນຫຼັງໂດຍຂໍ້ມູນທີ່ໄດ້ຖືກເກັບກຳມາ ຢ່າງລະມັດລະວັງເປັນເວລາຫຼາຍທົດສະວັດ ແລະ ຄວາມຄິດເຫັນທາງ ດ້ານວິທະຍາສາດຢ່າງຖ້ວມລົ້ນ.ແລະ ມັນກໍມີຜົນຕາມມາທີ່ຮ້າຍແຮງສຳລັບຮູບແບບການດຳລົງຊີວິດຂອງພວກເຮົາໃນປະຈຸບັນ.”
ທ່ານໄດ້ອ້າງອີງເຖິງລະດູຮ້ອນທີ່ຮ້ອນຂຶ້ນກວ່າເກົ່າ, ລະດັບນ້ຳທະເລທີ່ສູງຂຶ້ນ ແລະ ສະພາບອາກາດທີ່ຮຸນແຮງເກີດຂຶ້ນເປັນປະຈຳ, ເຊິ່ງທ່ານເອີ້ນມັນວ່າໄພພິບັດທີ່ມີລາຄາແພງ ແລະ ເປັນອັນຕະລາຍຂຶ້ນກວ່າເກົ່າ.
