ໃນວັນພຸດມື້ອື່ນນີ້ ປະທານາທິບໍດີ Barack Obama ຈະເປັນ
ເຈົ້າພາບ ກອງປະຊຸມສຸດຍອດບັ້ນໜຶ່ງທີ່ຈະນຳເອົາ ຕຳຫລວດ
ຜູ້ນຳດ້ານສາສະໜາແລະຄົນອື່ນໆອີກ ມາສົນທະນາຫາລືກັນ
ກ່ຽວກັບວ່າ ຈະຮັບມືກັນແນວໃດ ກັບລັດທິຫົວຮຸນແຮງຈັດຢູ່ໃນ
ບັນດາຄຸ້ມໃນຫົວເມືອງຕ່າງໆຂອງອາເມຣິການັ້ນ. ກອງປະຊຸມ
ທີ່ຊື່ວ່າ Summit on Countering Violent Extremism
ແມ່ນແນໃສ່ເພື່ອພິຈາລະນາເບິ່ງການດຳເນີນຄວາມພະຍາຍາມ
ຢູ່ພາຍໃນປະເທດແລະຕ່າງປະເທດ ເພື່ອຫາທາງປ້ອງກັນບໍ່ໃຫ້
ພວກນິຍົມລັດທິຫົວຮຸນແຮງຈັດ ຊອກເກນເອົາຊາວໜຸ່ມຢູ່ໃນອາ
ເມຣິກາແລະແຫ່ງອື່ນໆ ໄປເຂົ້າຮ່ວມກັບພວກເຂົາ. ຜູ້ສື່ຂ່າວວີໂອ
ເອ ປະຈຳທຳນຽບຂາວ Luis Ramirez ມີລາຍລະອຽດ ຊຶ່ງດາຣາ
ຈະນຳມາສະເໜີທ່ານ.
ການໂຈມຕີຂອງພວກກໍ່ການຮ້າຍ ທີ່ນະຄອນຫລວງປາຣີ ຂອງປະເທດຝຣັ່ງ ເມື່ອເດືອນ
ມັງກອນຜ່ານມາ ໄດ້ສ້າງຄວາມກັງວົນໃຫ້ທ່ານໂອບາມາ ຫລາຍພໍສົມຄວນ ຈົນທ່ານຕ້ອງ
ໄດ້ຮຽກກອງປະຊຸມ ທີ່ໄດ້ຖືກເລື່ອນເວລາ ມາດົນນານແລ້ວນັ້ນຂຶ້ນ. ຈຸດປະສົງກໍແມ່ນເພື່ອ
ຊອກຫາສາເຫດຕົ້ນຕໍ່ຂອງລັດທິຫົວຮຸນແຮງຈັດ ແລະຫາວິທີທາງຢຸດພວກຊາວໜຸ່ມ ຢູ່ໃນ
ອາເມຣິກາແລະແຫ່ງອື່ນໆ ບໍ່ໃຫ້ເຂົ້າຮ່ວມກັບພວກກຸ່ມກໍ່ການຮ້າຍ ເຊັ່ນກຸ່ມລັດອິສລາມ Islamic State ຫລື IS.
ໃນຄຳຖະແຫລງປະນາມລັດທິຫົວຮຸນແຮງຈັດ ຫລາຍໆຄັ້ງເມື່ອໄວໆມານີ້ ທ່ານໂອບາມາ
ໄດ້ລະມັດລະວັງ ທີ່ຈະບໍ່ເອີ່ຍຊື່ສາສະໜາອິສລາມອອກມາ ແຕ່ໄດ້ເອີ່ຍເຖິງການບໍ່ຍອມຮັບ
ຊຶ່ງກັນແລະກັນໃນດ້ານສາສະໜາໂດຍທົ່ວໄປ ວ່າເປັນໂຕການ ຫລືສາເຫດ.
ປະທານາທິບໍດີ ໂອບາມາ ກ່າວວ່າ “ໜຶ່ງໃນບັນດາວິທີແກ້ໄຂທີ່ດີທີ່ສຸດ ຕໍ່ພວກ
ອຸດົມການທີ່ເຕັມໄປດ້ວຍຄວາມກຽດຊັງກັນ ທີ່ພະຍາຍາມຈະເກນເອົາຜູ້ຄົນ
ແລະຫັນປ່ຽນຜູ້ຄົນໃຫ້ເປັນພວກຫົວຮຸນແຮງຈັດ ທີ່ນິຍົມການກໍ່ຄວາມຮຸນແຮງ
ນັ້ນ ກໍຄືຕົວຢ່າງຂອງສັງຄົມທີ່ມີຄວາມຫລາກຫລາຍຊົນຊາດ ແລະຍອມຮັບ
ຊຶ່ງກັນແລະກັນ ຂອງພວກເຮົາເອງ ທີ່ຍິນດີຮັບເອົາການປະກອບສ່ວນຂອງ
ຜູ້ຄົນທັງໝົດ ໂຮມທັງປະຊາຊົນ ຈາກທຸກໆສາສະໜາ.”
ບາງເທື່ອ ມັນກໍແມ່ນຢູ່ໃນບັນດາຄຸ້ມຕ່າງໆ ທີ່ທຸກຍາກແລະເຕັມໄປດ້ວຍພວກແກ໊ງອັນທະ
ພານຂອງອາເມຣິກາເອງ ທີ່ວິໄສທັດອັນນີ້ ຕົກຢູ່ໃນອັນຕະລາຍ.
ຮູບເງົາວີດີໂອເລື້ອງໜຶ່ງ ທີ່ຫ້ອງການສືບສວນກາງສະຫະລັດ ຫລື FBI ນຳອອກເຜີຍແຜ່
ທາງ YouTube ທີ່ສະແດງໃຫ້ເຫັນນັກລົບຄົນໜຶ່ງຂອງກຸ່ມລັດອິສລາມ ປາກພາສາອັງກິດ
ສຳນຽງອາເມຣິກັນ ໄດ້ພາໃຫ້ບັນດາເຈົ້າໜ້າທີ່ສະຫະລັດ ມີຄວາມເປັນຫ່ວງເພີ້ມຂຶ້ນວ່າ
ພວກຊາວໜຸ່ມອາເມຣິກັນທີ່ມີຊີວິດລຳບາກນັ້ນ ອາດສາມາດຖືກເກນໄປໄດ້ ໂດຍງ່າຍ.
ການດຳເນີນຄວາມພະຍາຍາມເພື່ອປາບພວກແກ໊ງ ແລະຍື່ນມືໄປຊ່ວຍເຫລືອປະຊາຊົນ
ໃນທ້ອງຖິ່ນ ໂດຍໜ່ວຍງານຕ່າງໆ ເຊັ່ນກົມຕຳຫລວດນະຄອນ ລອສ ແອນຈີແລສ ແມ່ນ
ເປັນໂຕແບບຫລືແບບຢ່າງ ຂອງວິທີຢຸດຢັ້ງພວກຊາວໜຸ່ມອາເມຣິກັນ ບໍ່ໃຫ້ຫັນໄປນິຍົມ
ລັດທິຫົວຮຸນແຮງ ແລະຕຳຫລວດຈາກນະຄອນ ລອສ ແອນຈີແລສ ພ້ອມທັງຈາກເຂດຫົວ
ເມືອງອື່ນໆນຳ ກໍຈະເຂົ້າຮ່ວມກອງປະຊຸມສົນທະນາຫາລືໃນຄັ້ງນີ້ນຳ.
ທ່ານ Josh Earnest ໂຄສົກທຳນຽບຂາວ ເວົ້າວ່າ “ມີຫລາຍໆຊຸມຊົນໃນປະເທດນີ້
ບ່ອນທີ່ບັນດາເຈົ້າໜ້າທີ່ປະຕິບັດກົດໝາຍ ໄດ້ທຳງານຢ່າງສຳເລັດຜົນ ຮ່ວມກັບ
ບັນດາຜູ້ນຳຊຸມຊົນ ຊຶ່ງຫລາຍໆຄົນກໍມາຈາກຊຸມຊົນຊາວມຸສລິມນຳນັ້ນ ເພື່ອຕ້ານ
ຢັນຄວາມພະຍາຍາມທີ່ຈະຫັນປ່ຽນພວກຊາວໜຸ່ມທີ່ທຸກຈົນ ໃຫ້ຫັນໄປນິຍົມລັດທິ
ຫົວຮຸນແຮງ. ສະນັ້ນ ກອງປະຊຸມຄັ້ງນີ້ກໍແມ່ນຈະເປັນໂອກາດ ເປັນເວທີ ບ່ອນທີ່
ທ່ານປະທານາທິບໍດີຈະສາມາດສົນທະນາ ເລື້ອງການດຳເນີນຄວາມພະຍາຍາມ
ເຫລົ່ານັ້ນ ກັບພວກຜູ້ນຳຊຸມຊົນ ແລະພວກເຈົ້າໜ້າທີ່ຮັກສາກົດໝາຍຈາກທົ່ວປະ
ເທດ ເພື່ອໃຫ້ເຂົາເຈົ້າແບ່ງປັນວິທີການປະຕິບັດທີ່ດີທີ່ສຸດຂອງເຂົາເຈົ້າ ກັບບັນດາ
ຜູ້ນຳຈາກຊຸມຊົນອື່ນໆ.”
ແຕ່ພວກວິຈານກ່າວວ່າ ຫົວຂໍ້ຂອງກອງປະຊຸມແມ່ນກວມກ້ວາງໂພດ ແລະບັນຫາກໍແມ່ນ
ສະລັບຊັບຊ້ອນຫລາຍ ຈົນມັນຄົງຈະເປັນການຍາກ ທີ່ຈະຄິດຫາໂຄງການໃດໆທີ່ໄດ້ຜົນ
ຂຶ້ນມາໄດ້ ເພື່ອຮັບມືກັບສາເຫດຕົ້ນຕໍຂອງລັດທິຫົວຮຸນແຮງຈັດນັ້ນ.
ທ່ານ Philip Lohaus ນັກວິເຄາະເລື້ອງຄວາມໝັ້ນຄົງຂອງສະຖາບັນ ວິສາຫະກິດອາເມ
ຣິກັນ ຫລື American Enterprise Institute ກ່າວວ່າ ການສົນທະນາຫາລືກ່ຽວກັບລັດທິ
ຫົວຮຸນແຮງຈັດຂອງສາສະໜາອິສລາມນັ້ນ ໃນບັ້ນສຸດທ້າຍແລ້ວ ກໍແມ່ນມີຄວາມຈຳເປັນ.
ທ່ານ Lohaus ກ່າວວ່າ “ມັນເປັນສິ່ງສຳຄັນທີ່ຈະຕ້ອງເພ່ງເລັງໃສ່ຈຸດໃດຈຸດໜຶ່ງ
ເປັນການສະເພາະໃນກອງປະຊຸມນີ້. ຂ້າພະເຈົ້າເຫັນພ້ອມນຳ ທີ່ວ່າເຂົາເຈົ້າຈຳ
ເປັນຕ້ອງເຮັດໃຫ້ແນ່ໃຈວ່າ ເຂົາເຈົ້າຈະເພ່ງເລັງໂດຍສະເພາະ ໃສ່ພວກກົນໃກ
ແລະເຫດຜົນທີ່ວ່າ ເປັນຫຍັງຜູ້ຄົນຈຶ່ງເຂົ້າໄປພົວພັນນຳລັດທິຫົວຮຸນແຮງຈັດຂອງ
ສາສະໜາອິສລາມ ແທນທີ່ຈະເປັນລັດທິຫົວຮຸນແຮງຈັດໂດຍທົ່ວໄປ ແຕ່ຂ້າພະ
ເຈົ້າກໍຄິດວ່າ ມັນເປັນບາດກ້າວທຳອິດທີ່ດີ ແລະບາງທີ່ໃນເວລາຕໍ່ໄປ ກໍອາດສາ
ມາດມີການສົນທະນາຫາລືກັນ ຕິດຕາມມາອີກ ທີ່ແນໃສ່ຫລາຍຂຶ້ນ ບັນຫາລັດທິ
ຫົວຮຸນແຮງຈັດຂອງສາສະໜາອິສລາມນັ້ນ ໂດຍສະເພາະ.”
ກອງປະຊຸມສຸດຍອດທີ່ວ່ານີ້ ຈະເປັນກອງປະຊຸມທຳນອງນີ້ເທື່ອທຳອິດ ແລະບາງທີ ກໍອາດ
ຈະເປັນຈຸດເລີ້ມຕົ້ນຂອງການສົນທະນາທີ່ສຳຄັນບັ້ນໜຶ່ງ.
