ຫຸ່ນຍົນທີ່ກຳລັງຜະລິດຂຶ້ນມາ ຢູ່ທີ່ມະຫາວິທະຍາໄລ Carnegie
Mellon ແມ່ນໄດ້ຮັບການພັດທະນາກາຍມາເປັນ ຊິ້ນສ່ວນ
ກົນຈັກ ທີ່ຕິດຕໍ່ກັນ ຄືກັນກັບງູທີ່ມີຫຼາຍຂາ ສາມາດເຄື່ອນຍ້າຍ
ເທິງບໍລິເວນທີ່ລຸບໂນນ ແລະ ສຳຫລວດໃນບໍລິເວນອ້ອມແອ້ມ
ອີກດ້ວຍ. ບັນດານັກວິທະຍາສາດ ກ່າວວ່າ ພວກເຄື່ອງກົນຈັກ
ດັ່ງກ່າວ ມື້ໃດມື້ນຶ່ງອາດຊ່ອຍເຫຼືອ ໃນການປະຕິບັດພາລະກິດ
ຊອກຄົ້ນຫາ ແລະ ກູ້ໄພຕ່າງໆ. ຜູ້ສື່ຂ່າວວີໂອເອ George
Putic ມີລາຍງານກ່ຽວກັບເລື້ອງນີ້ ຊຶ່ງໄຊຈະເລີນສຸກ ຈະນຳມາ
ສະເໜີທ່ານ ໃນອັນດັບຕໍ່ໄປ.
ຫຼາຍໆປີຜ່ານມາ ບັນດານັກຄົ້ນຄວ້າ ຢູ່ທີ່ມະຫາວິທະຍາໄລ
Carnegie Mellon ໄດ້ທຳການທົດລອງກັບຫຸ່ນຍົນຄ້າຍຄືກັນ
ກັບງູດັ່ງກ່າວ ທີ່ສາມາດເລືອ ເຂົ້າໄປໃນທໍ່ ແລະ ເລືອຂຶ້ນຕົ້ນໄມ້ຕ່າງໆ ນັ້ນໄດ້.
ຫຸ່ນຍົນຂອງພວກເຂົາເຈົ້າ ໄດ້ພັດທະນາມາເລື້ອຍໆ ຈົນກາຍມາເປັນໜ່ວຍກົນຈັກ ແລະ
ແຕ່ລະໜ່ວຍນັ້ນ ມີສູນຄວບຄຸມສັ່ງງານຂອງມັນເອງ ທີ່ສາມາດນຳມາປະກອບເຂົ້າກັນ
ໃຫ້ເປັນຫຼາຍຮູບແບບ ເຊັ່ນວ່າ ເຄື່ອງຈັກຫຼາຍຂາ ຄືກັນກັບແມງໄມ້ອັນນີ້ ທີ່ພວກເຂົາເຈົ້າ
ເອີ້ນວ່າ ງູປະຫລາດ ຫຼື Snake Monster.
ທ່ານ Howie Choset ເປັນອາຈານ ຢູ່ທີ່ ສະຖາບັນຫຸ່ນຍົນ Carnegie Mellon.
ທ່ານ Choset ເວົ້າວ່າ “ພວກເຮົາສາມາດນຳເອົາໜ່ວຍຫຸ່ນຍົນຕ່າງໆ ມາປະກອບ
ເຂົ້າກັນ ຢ່າງງ່າຍດາຍ ຄືກັບ Lego ຊຶ່ງເປັນຂອງຫຼິ້ນສຳຫລັບເດັກນ້ອຍ ແຕ່ວ່າ
ມັນມີຫຼາຍສິ່ງຫຼາຍຢ່າງ ທີ່ເກີດຂຶ້ນຢູ່ພາຍໃນເຄື່ອງຈັກ ທີ່ອະນຸຍາດໃຫ້ສິ່ງເຫຼົ່ານີ້
ເກີດຂຶ້ນໄດ້.”
ອັນທີ່ເກີດຂຶ້ນຕ່າງໆ “ຢູ່ພາຍໃນເຄື່ອງຈັກ” ນັ້ນ ແມ່ນເປັນສ່ວນທີ່ໜ້າສົນໃຈທີ່ສຸດ.
ພວກໜ່ວຍຫຸ່ນຍົນເຫຼົ່ານັ້ນ ມີຄວາມສາມາດຕິດຕໍ່ສື່ສານ ຫາກັນແລະກັນ ເພື່ອທີ່ຈະປະສານ ງານກັນໃນການເຄື່ອນຍ້າຍຕ່າງໆ ຂອງຫຸ່ນຍົນນັ້ນ.
ຢູ່ທາງສົ້ນຂອງໜ່ວຍຫຸ່ນ ແມ່ນມີລໍ້ແທນຕີນ ເພື່ອຈະເຮັດໃຫ້ຫຸ່ນຍົນ ສາມາດເຄື່ອນຍ້າຍ
ໄດ້ໄວ ເທິງພື້ນທີ່ລຽບໆ.
ບາງໜ່ວຍຫຸ່ນຍົນ ຍັງອາດຕິດຕັ້ງດ້ວຍກ້ອງ ທີ່ສາມາດສຳຫລວດ ບໍລິເວນອ້ອມແອ້ມໄດ້ອີກດ້ວຍ.
ຄຸນສົມບັດອີກຢ່າງນຶ່ງ ທີ່ເອີ້ນວ່າ ລະບົບ “ເຈົ້ານາຍ-ແລະ-ທາດ ຫຼື master-and-
slave” ໂດຍຜ່ານລະບົບດັ່ງກ່າວນີ້ ຜູ້ບັງຄັບ ສາມາດ ຄວບຄຸມ ຫຸ່ນຍົນແຝດ ດ້ວຍເຄື່ອງ
ຄວບຄຸມຈາກໄລຍະໄກ ແລະ ແມ່ນກະທັງສາມາດຮູ້ສຶກ ເຖິງຄວາມຕ້ານທານຕ່າງໆ ທີ່ມັນ
ກຳລັງປະສົບຢູ່ ນັ້ນ.
ທ່ານ Choset ກ່າວວ່າ ຫຸ່ນຍົນນີ້ ແມ່ນມີຄວາມພ້ອມແລ້ວ ທີ່ຈະທຳການທົດສອບ ໃນ
ຊີວິດຕົວຈິງ.
ທ່ານ Choset ເວົ້າວ່າ “ຫຸ່ນຍົນອັນນັ້ນ ແມ່ນສາມາດລົງປະຕິບັດງານໄດ້ ຢູ່ສະໜາມ. ເຈົ້າສາມາດເອົາຫຸ່ນຍົນອັນນັ້ນ ມາໂຍນໄປໂຍນມາກໍໄດ້. ມັນມີຄວາມທົນທານ. ເຈົ້າສາມາດເຕະມັນ ແລະ ມັນກໍຍັງຈະທຳງານຢູ່.”
ໜ່ວຍແຂນຫຸ່ນຍົນຕ່າງໆ ສາມາດໂປແກມ ໃຫ້ມັນທຳງານໄດ້ຫຼາຍ ຢ່າງ ລວມທັງ ປ້ອນ
ອາຫານໃຫ້ແກ່ພວກຄົນພິການ.
ບັນດານັກຄົ້ນຄວ້າ ແມ່ນໄດ້ທຳງານໃນສ່ວນຕິດຕໍ່ໜ່ວຍອື່ນໆມາແລ້ວ ເຊັ່ນວ່າ ຕີນທີ່ຮູ້ສຶກ
ຄວາມກົດດັນ ຫຼື ຕີນຂີ້ເຂັບຄືກັນກັບລົດຖັງ ທີ່ຈະເຮັດໃຫ້ສາມາດດັດແປງພວກຫຸ່ນຍົນ
ຕາມຄວາມຕ້ອງການ ສຳຫລັບວຽກງານຕ່າງໆ ທີ່ແຕກຕ່າງກັນ.
