ນາຍົກລັດຖະມົນຕີລາວ ຢືນຢັນວ່າ ລັດຖະບານຈະດຳເນີນ
ທຸກມາດຕະການ ເພື່ອລົບລ້າງຄວາມຮຸນແຮງທີ່ກະທຳຕໍ່ແມ່
ຍິງ ແລະຈະເສີມສ້າງຄວາມສະເໝີພາບລະຫວ່າງຍິງຊາຍ
ຢ່າງແທ້ຈິງໃນລາວ.
ທ່ານທອງສິງ ທຳມະວົງ ນາຍົກລັດຖະມົນຕີ ໄດ້ຖະແຫລງຢືນຢັນ ໃນໂອກາດວັນຕ້ານຄວາມຮຸນແຮງ ທີ່ກະທຳຕໍ່ແມ່ຍິງສາກົນ ທີ່ກົງກັບວັນທີ 25 ພະຈິກຂອງທຸກປີ ແລະໄດ້ເລີ້ມການລົນນະລົງ ນັບຈາກປີ 2000 ເປັນຕົ້ນມາຈົນເຖິງປັດຈຸບັນນີ້ ວ່າ ລັດຖະບານລາວ ໄດ້ໃຫ້ຄວາມສຳຄັນຢ່າງຍິ່ງ ຕໍ່ການປົກປ້ອງສິດທິຂອງແມ່ຍິງ ໂດຍມີເປົ້າໝາຍທີ່ຈະເສີມສ້າງຄວາມສະເໝີພາບ ລະຫວ່າງຍິງ-ຊາຍ ໃຫ້ເກີດຂຶ້ນໃນລາວໃຫ້ໄດ້ຢ່າງແທ້ຈິງ.
ຍິ່ງໄປກວ່ານັ້ນ ພາຍໃຕ້ເປົ້າໝາຍດັ່ງກ່າວນີ້ ລັດຖະບານລາວກໍຍັງໄດ້ໃຫ້ຄວາມສຳຄັນ ເປັນພິເສດຕໍ່ການດຳເນີນທຸກມາດຕະການ ເພື່ອຕ້ານທຸກໆຄວາມຮຸນແຮງ ທີ່ກະທຳຕໍ່ແມ່ຍິງ ແລະເດັກນ້ອຍໃນລາວ ອີກດ້ວຍ ດັ່ງທີ່ທ່ານທອງສິງ ໄດ້ຖະແຫລງຢືນຢັນວ່າ:
“ລັດຖະບານ ຍາມໃດກໍໃຫ້ຄວາມສຳຄັນ ຕໍ່ວັນດັ່ງກ່າວຢ່າງບໍ່ລົດລະ ດ້ວຍການປົກປ້ອງສິດທິ ແລະຜົນປະໂຫຍດອັນຊອບທຳ ຂອງແມ່ຍິງ ແລະເດັກນ້ອຍ ເປັນຕົ້ນແມ່ນສິດທິ ໃນການດຳລົງຊີວິດໃຫ້ມີກຽດສັກສີຢູ່ໃນສັງຄົມທີ່ດີ ແລະໄດ້ຮັບການພັດທະນາຢ່າງຮອບດ້ານ ພິເສດແມ່ນເອົາໃຈໃສ່ໃຫ້ເດັກຍິງໄດ້ມີໂອກາດເທົ່າທຽມກັບ ເດັກຊາຍສາມາດເຂົ້າເຖິງການສຶກສາ ຢ່າງທົ່ວເຖິງໃນທຸກລະດັບ.”
ແຕ່ຢ່າງໃດກໍຕາມ ເຈົ້າໜ້າທີ່ຂັ້ນສູນກາງສະຫະພັນແມ່ຍິງລາວ ຍອມຮັບວ່າ ການຈັດຕັ້ງ
ປະຕິບັດແຜນການ ເພື່ອເສີມສ້າງຄວາມສະເໝີພາບ ລະຫວ່າງຍິງ-ຊາຍໃນລາວ ທີ່ໄດ້ເລີ້ມ
ການຈັດຕັ້ງປະຕິບັດດ້ວຍການສ້າງຕັ້ງຄະນະກຳມະການລະດັບຊາດ ເພື່ອການພັດທະນາ
ຄວາມກ້າວໜ້າຂອງແມ່ຍິງລາວ ນັບຕັ້ງແຕ່ປີ 2003 ເປັນຕົ້ນມາຈົນເຖິງປັດຈຸບັນນີ້ ຍັງຖືວ່າ
ມີຄວາມຄືບໜ້າໃນລະດັບທີ່ຕ່ຳຫຼາຍ ເມື່ອທຽບກັບເປົ້າໝາຍທີ່ວາງໄວ້.
ທັງນີ້ໂດຍມີສາເຫດມາຈາກການປະຕິບັດງານໃນຊ່ວງກວ່າ
10 ປີມານີ້ ສ່ວນໃຫຍ່ຈະເປັນການປະຕິບັດງານ ໃນດ້ານ
ເອກະສານ ແລະພິທີການຕ່າງໆຫຼາຍກວ່າການຈັດຕັ້ງປະຕິບັດ
ໃນພາກຕົວຈິງ ຊຶ່ງຈະເຫັນໄດ້ ຈາກການດັດແກ້ ລັດຖະທຳ
ມະນູນ ເພື່ອຢັ້ງຢືນເຖິງການເຄົາລົບ ຕໍ່ຫຼັກການສາກົນວ່າດ້ວຍ
ຄວາມສະເໝີພາບ ລະຫວ່າງຍິງ-ຊາຍ ໃນປີ 2003 ທີ່ຕາມດ້ວຍ
ການບັງຄັບໃຊ້ກົດໝາຍວ່າດ້ວຍການພັດທະນາ ແລະ ການປົກ
ປ້ອງແມ່ຍິງໃນປີ 2004 ແລະ ການປະກາດເປົ້າໝາຍ ສະຫັດ
ສະຫວັດ ທີ່ຈະເພີ້ມສັດສ່ວນຂອງແມ່ຍິງລາວ ໃຫ້ມີຖານະຕຳແໜ່ງ
ໃນທາງການເມືອງໃຫ້ໄດ້ເຖິງ 30 ເປີເຊັນ ຂອງຕຳແໜ່ງທັງໝົດ
ໃນປີ 2015.
ຫາກແຕ່ວ່າຜົນຂອງການຈັດຕັ້ງປະຕິບັດໃນພາກຕົວຈິງນັ້ນ ກັບ
ຍັງດຳເນີນໄປຢ່າງຊັກຊ້າ ແລະການທີ່ຈະສາມາດ ບັນລຸເປົ້າ
ໝາຍທີ່ວາງໄວ້ດັ່ງກ່າວຢ່າງແທ້ຈິງນັ້ນ ກໍຄົງຈະເປັນໄປໄດ້ຍາກ
ຢ່າງຍິ່ງເຊັ່ນດຽວກັນດັ່ງທີ່ ເຈົ້າໜ້າທີ່ຂັ້ນສູງຂອງລາວ ໄດ້ໃຫ້ການ
ຊີ້ແຈງວ່າ:
“ການປະຕິບັດສິດສະເໝີພາບຍິງ-ຊາຍນີ້ ກໍຄືການສົ່ງເສີມຄວາມກ້າວໜ້າ ຂອງ
ແມ່ຍິງກໍໄດ້ອິງໃສ່ ແຜນພັດທະນາຂອງລັດຖະບານຫັ້ນ ໃນການສ້າງພະນັກງານ
ເພດຍິງເຂົ້າໃນອົງການຈັດຕັ້ງພັກລັດ ອົງການຈັດຕັ້ງມະຫາຊົນ ຄາດໝາຍສູ້ຊົນ
20 ເປີເຊັນ ຂຶ້ນໄປ ກ່ຽວກັບສະມາຊິກສະພາຫັ້ນໃຫ້ໄດ້ 30 ເປີເຊັນ ເຫັນວ່າ
ການຈັດຕັ້ງປະຕິບັດນີ້ ພວກຂ້າພະເຈົ້າແມ່ນປະຕິບັດໄດ້ 15 ເປີເຊັນ.”
ໂດຍຈາກການສຳຫລວດ ຂອງສະຫະພັນແມ່ຍິງລາວພົບວ່າ ແຂວງເຊກອງ ເປັນເຂດທີ່ຍັງ
ຫລ້າຫລັງທີ່ສຸດ ໃນການພັດທະນາຄວາມສະເໝີພາບ ລະຫວ່າງຍິງ-ຊາຍ ເພາະມີແມ່ຍິງ
ບໍ່ເຖິງ 3 ເປີເຊັນ ທີ່ຢູ່ໃນຕຳແໜ່ງລະດັບຜູ້ບໍລິຫານຂັ້ນສູງ ຂອງແຂວງເຊກອງນັ້ນເອງ.
ນອກຈາກນີ້ ກໍຍັງເປັນການຍາກຢ່າງຍິ່ງ ທີ່ລັດຖະບານລາວ ຈະບັນລຸເປົ້າໝາຍ ສະຫັດ
ສະຫວັດ ການພັດທະນາ ດ້ານສຸຂະພາບອະນາໄມ ແລະໂພຊະນາການຂອງແມ່ ແລະເດັກ
ໄດ້ໃນປີ 2015 ເພາະການຂາດສານອາຫານຂອງເດັກນ້ອຍອາຍຸຕ່ຳກວ່າ 5 ປີ ຍັງເຮັດໃຫ້
ມີເດັກນ້ອຍຕົວເຕ້ຍເຖິງ 38 ເປີເຊັນ ແລະ 32 ເປີເຊັນ ກໍມີນ້ຳໜັກຕ່ຳກວ່າເກນໃນຂະນະທີ່
ເປົ້າໝາຍສະຫັດສະຫວັດໄດ້ວາງໄວ້ ທີ່ລະດັບ 22 ເປີເຊັນ ສ່ວນການເສຍຊີວິດຂອງແມ່ຍິງ
ລາວໃນຂະນະຖືພາ ກໍຍັງສູງເຖິງ 339 ຄົນ ຫາກແຕ່ວ່າເປົ້າໝາຍສະຫັດສະຫວັດນັ້ນ ກໍຈະ
ຕ້ອງບໍ່ເກີນ 260 ຄົນຕໍ່ແສນຄົນ ຈຶ່ງເປັນການຍາກຢ່າງຍິ່ງ ທີ່ຈະປະຕິບັດ ໄດ້ພາຍໃນປີ
2015 ນັ້ນເອງ.
