ລັດຖະບານລາວວາງເປົ້າໝາຍ ຈະສົ່ງເສີມການລົງທຶນ ຂອງພາກ
ເອກະຊົນພາຍໃນ ແລະຕ່າງປະເທດ ໃຫ້ໄດ້ໃນມູນຄ່າລວມຫຼາຍ
ກວ່າ 18,200 ຕື້ກີບ ຫຼື 2,275 ລ້ານດອນລາ ໃນຕະຫລອດແຜນ
ການປີ 2014-2015 ນີ້.
ທ່ານສົມດີ ດວງດີ ລັດຖະມົນຕີວ່າການກະຊວງແຜນການ
ແລະການລົງທຶນ ໄດ້ຖະແຫລງ ຢືນຢັນວ່າ ລັດຖະບານລາວ
ໄດ້ວາງເປົ້າໝາຍ ທີ່ຈະສົ່ງເສີມການລົງທຶນ ຂອງພາກເອກະຊົນ ທັງພາຍໃນ ແລະຈາກ
ຕ່າງປະເທດ ໃຫ້ໄດ້ໃນມູນຄ່າລວມກັນຫຼາຍກວ່າ 18,200 ຕື້ກີບ ຫຼື 2,275 ລ້ານດອນລາ ໃນແຜນການປະຈຳປີ 2014-2015 ນີ້ ແລະເຊື່ອໝັ້ນວ່າ ຈະສາມາດຊຸກຍູ້ ໃຫ້ບັນລຸເປົ້າ
ໝາຍດັ່ງກ່າວ ໄດ້ຢ່າງແນ່ນອນ.
ທັງນີ້ກໍເນື່ອງຈາກວ່າ ສະພາວະການລົງທຶນ ຂອງພາກເອກະຊົນໃນລາວ ໄດ້ຂະຫຍາຍ
ເພີ້ມຂຶ້ນ ຢ່າງຕໍ່ເນື່ອງ ດັ່ງຈະເຫັນໄດ້ຈາກໃນລະຍະ 9 ເດືອນທີ່ຜ່ານມາຂອງປີ 2014 ນີ້
ກໍປາກົດວ່າ ພາກເອກະຊົນທັງພາຍໃນ ແລະ ຈາກຕ່າງປະເທດ ໄດ້ເຂົ້າມາລົງທຶນ ໃນ
ລາວແລ້ວ ຄິດເປັນມູນຄ່າລວມເຖິງ 3,060 ລ້ານດອນລາ ໃນ 713 ໂຄງການ ທີ່ສ່ວນ
ໃຫຍ່ກໍເປັນການລົງທຶນ ໃນພາກທຸລະກິດທົ່ວໄປ ແລະ ພາກພະລັງງານ ດັ່ງທີ່ທ່ານສົມດີ
ໄດ້ຢືນຢັນວ່າ:
“ຂະແໜງການທີ່ມີການລົງທຶນຫຼາຍ ກໍແມ່ນຂະແໜງການລົງທຶນທົ່ວໄປ ທີ່ມີ 686
ໂຄງການ ມູນຄ່າ 2,600 ລ້ານດອນລາ ຕໍ່ລົງມາ ແມ່ນຂະແໜງການພະລັງງານ
ໄຟຟ້າ ຂະແໜງບໍ່ແຮ່ ໂຄງການທີ່ພົ້ນເດັ່ນ ກໍມີຫຼາຍໂຄງການ ເປັນຕົ້ນໂຄງການ
ເຂື່ອນໄຟຟ້ານ້ຳໄຜ່ ມີມູນຄ່າ 218 ລ້ານດອນລາ.”
ກ່ອນໜ້ານີ້ ທ່ານບຸນທະວີ ສີສຸພັນທອງ ລັດຖະມົນຕີຊ່ວຍວ່າການ ກະຊວງແຜນການ ແລະການລົງທຶນ ໄດ້ຖະແຫລງຕໍ່ກອງປະຊຸມສຸດຍອດທາງທຸລະກິດ ແລະ ການລົງທຶນຄັ້ງທີ 11 ລະຫວ່າງຈີນກັບອາຊ່ຽນ ທີ່ຈັດຂຶ້ນຢູ່ທີ່ເມືອງໜັນໜິງ ມົນທົນກວາງສີຂອງຈີນວ່າ ນັບແຕ່ປີ 1988 ເປັນຕົ້ນມາຈົນເຖິງປັດຈຸບັນ ມີການລົງທຶນຂອງພາກເອກະຊົນ ທັງພາຍໃນ ແລະ
ຈາກຕ່າງປະເທດຄິດເປັນມູນຄ່າລວມເກີນກວ່າ 25,200 ກວ່າໂຄງການລົງທຶນ.
ທັງນີ້ໂດຍກຸ່ມທຸລະກິດຈີນຍັງຄອງອັນດັບທີ 1 ໃນຖານະຜູ້ລົງທຶນ
ຫຼາຍທີ່ສຸດໃນລາວ ຊຶ່ງນັບເປັນປີທີ 8 ຕິດຕໍ່ກັນ ດ້ວຍມູນຄ່າການ
ລົງທຶນລວມເກີນກວ່າ 6,500 ລ້ານດອນລາ ໃນຈຳນວນ 755
ໂຄງການທີ່ນອນຢູ່ໃນ 14 ພາກການລົງທຶນ ໂດຍສ່ວນໃຫຍ່ ເປັນ
ການລົງທຶນໃນພາກພະລັງງານ ກະສິກຳ ອຸດສາຫະກຳຂຸດຄົ້ນ
ແຮ່ທາດ ຫັດຖະກຳ ແລະ ພາກບໍລິການຕາມລຳດັບ.
ສຳຫລັບພາກທຸລະກິດ ທີ່ບັນດາບໍລິສັດເອກະຊົນຕ່າງຊາດໄດ້
ພາກກັນລົງທຶນຫຼາຍທີ່ສຸດຄືພາກພະລັງງານໄຟຟ້າ ຕິດຕາມດ້ວຍ
ການສຳຫລວດແລະຂຸດຄົ້ນແຮ່ທາດ ພາກກະສິກຳ ພາກອຸດສາ
ຫະກຳ ໂຮງແຮມ ແລະພາກບໍລິການ ແລະກໍໄດ້ປະກອບສ່ວນ
ເຮັດໃຫ້ເສດຖະກິດລາວຂະຫຍາຍຕົວເພີ້ມຂຶ້ນໃນອັດຕາສະເລ່ຍເຖິງ 7.5 ເປີເຊັນຕໍ່ປີ
ໃນຕະຫລອດລະຍະກວ່າ 10 ປີມານີ້.
ນອກຈາກບັນດາບໍລິສັດຈີນດັ່ງກ່າວແລ້ວ ບັນດາບໍລິສັດຍີ່ປຸ່ນ ກໍເປັນພາກສ່ວນໜຶ່ງທີ່ມີ
ການເພີ້ມມູນຄ່າລົງທຶນ ໃນລາວຫຼາຍຂຶ້ນຢ່າງຕໍ່ເນື່ອງ ໂດຍຜູ້ຊ່ຽວຊານທາງເສດຖະກິດ
ຊາວຍີ່ປຸ່ນປະເມີນວ່າ ການລົງທຶນຂອງບັນດາບໍລິສັດຍີ່ປຸ່ນ ໃນລາວຈະເພີ້ມຂຶ້ນຢ່າງວ່ອງໄວ ໃນລະຍະ 2 ປີຕໍ່ໄປນີ້ ຊຶ່ງຈະເຮັດໃຫ້ຍີ່ປຸ່ນກາຍເປັນຜູ້ລົງທຶນລາຍໃຫຍ່ອັນດັບ 4 ຮອງຈາກ ຈີນ ຫວຽດນາມ ແລະ ໄທ ພາຍໃນປີ 2015.
ຍິ່ງໄປກວ່ານັ້ນ ຜູ້ຊ່ຽວຊານຍີ່ປຸ່ນ ຍັງຢືນຢັນດ້ວຍວ່າ ການລົງທຶນຂອງຍີ່ປຸ່ນໃນລາວ
ຈະເໜັ້ນໜັກ ໃນພາກອຸດສາຫະກຳແປຮູບສິນຄ້າກະສິກຳ ແລະ ພາກບໍລິການ ທີ່ສາ
ມາດຈະສ້າງວຽກເຮັດງານທຳ ໃຫ້ແກ່ຄົນລາວໄດ້ຫຼາຍກວ່າການລົງທຶນໃນດ້ານອື່ນໆ
ທີ່ເໜັ້ນໜັກການພັດທະນາທີ່ດິນ ເຊັ່ນການກໍ່ສ້າງເດີ່ນກອລ໌ຟ ທີ່ສ້າງວຽກເຮັດງານທຳ
ໃຫ້ແກ່ຄົນລາວໄດ້ຢ່າງຈຳກັດ.
ປັດຈຸບັນ ຍີ່ປຸ່ນລົງທຶນໃນລາວທັງໝົດ 548 ລ້ານດອນລາ ໃນ 104 ໂຄງການ ແລະ ຈັດ
ເປັນອັນດັບທີ 7 ຂອງການລົງທຶນຈາກຕ່າງປະເທດ ແຕ່ກໍຄາດວ່າ ຈະເພີ້ມຂຶ້ນເປັນເກີນ
ກວ່າ 3,000 ລ້ານດອນລາພາຍໃນປີ 2015.
