ທະນາຄານຂອງລັດຖະບານລາວ ມີໜີ້ເສຍໃນລະບົບສິນເຊື່ອ
ຫຼາຍຂຶ້ນ ໂດຍມີສາເຫດສຳຄັນມາຈາກການປ່ອຍເງິນກູ້ໃຫ້ກັບ
ໂຄງການພັດທະນາຕ່າງໆ ຂອງລັດຖະບານທີ່ພາກເອກະຊົນ
ເປັນຝ່າຍລົງທຶນໃຫ້ກ່ອນ.
ທ່ານສົມພາວ ໄຟສິດ ຜູ້ວ່າການທະນາຄານແຫ່ງຊາດ ຖະແຫລງ
ຍອມຮັບວ່າທະນາຄານຂອງລັດຖະບານລາວມີມູນຄ່າສິນເຊື່ອ
ທີ່ບໍ່ກໍ່ໃຫ້ເກີດຜົນປະໂຫຍດ ຫຼືໜີເສຍ (NPL) ໃນລະບົບທະນາຄານເພີ້ມຂຶ້ນຢ່າງຕໍ່ເນື່ອງ
ໂດຍຈົນເຖິງທ້າຍເດືອນພະຈິກ 2014 ທີ່ຜ່ານມານີ້ ກໍປາກົດວ່າ NPL ມີມູນຄ່າລວມເກີນ
ກວ່າ 1,055 ຕື້ກີບ ຫຼືຄິດເປັນ 2.16 ເປີເຊັນ ຂອງສິນເຊື່ອທັງໝົດ ໃນລະບົບທະນາຄານ
ທີ່ມີມູນຄ່າຫຼາຍກວ່າ 48,855 ຕື້ກີບໃນທົ່ວປະເທດ.
ໂດຍສາເຫດສຳຄັນທີ່ເຮັດໃຫ້ NPL ໃນລະບົບທະນາຄານເພີ້ມຂຶ້ນດັ່ງກ່າວ ກໍຍ້ອນວ່າ
ທະນາຄານຂອງລັດຖະບານຕ້ອງແບກຮັບພາລະ ຈາກການຂາດທຶນຂອງບັນດາວິສາ
ຫະກິດຕ່າງໆ ຂອງລັດຖະບານ ທັງຍັງຕ້ອງໃຫ້ການຊ່ວຍເຫຼືອກະເສດຕະກອນລາວ
ທີ່ປະສົບໄພທຳມະຊາດ ດ້ວຍການຂະຫຍາຍລະຍະເວລາ ໃນການຊຳລະໜີ້ຄືນໃຫ້
ທະນາຄານ ແລະຍັງຕ້ອງເພີ້ມວົງເງິນກູ້ໃຫ້ກັບກະເສດຕະກອນ ເປັນກໍລະນີພິເສດ
ອີກດ້ວຍ.
ນອກຈາກນີ້ການໃຫ້ສິນເຊື່ອແກ່ບັນດາບໍລິສັດເອກະຊົນ ທີ່ໄດ້ຮັບສຳປະທານໂຄງການພັດທະນາຕ່າງໆ ທີ່ລັດຖະບານລາວຂໍໃຫ້ບັນດາບໍລິສັດເອກະຊົນເປັນຝ່າຍລົງທຶນໃຫ້ກ່ອນ ໂດຍທີ່ລັດຖະບານລາວຈະຊຳລະຄືນໃຫ້ໃນພາຍຫຼັງນັ້ນ ກໍຖືເປັນອີກພາກສ່ວນໜຶ່ງທີ່ເຮັດໃຫ້ NPL ໃນລະບົບທະນາຄານເພີ້ມຂຶ້ນ ຊຶ່ງເຮັດໃຫ້ທະນາຄານຂອງລັດຖະບານຕ້ອງໂຈະການໃຫ້ສິນເຊື່ອແກ່ບໍລິສັດເອກະຊົນເຫຼົ່ານັ້ນແລ້ວ ໃນຂະນະນີ້.
ໂດຍມາດຕະການດັ່ງກ່າວນີ້ ຈະດຳເນີນໄປຈົນກວ່າວ່າ ຈະໄດ້
ທຳການກວດສອບ ເພື່ອປະເມີນບັນດາໂຄງການພັດທະນາ
ທັງໝົດໄດ້ ຢ່າງຄົບຖ້ວນໃນທົ່ວປະເທດແລ້ວ ຊຶ່ງຄາດວ່າ ຈະ
ຕ້ອງໃຊ້ລະຍະເວລາໃນການກວດສອບດັ່ງກ່າວນີ້ເກີນກວ່າ
1 ປີຢ່າງແນ່ນອນ.
ໂດຍສາເຫດທີ່ທະນາຄານຂອງລັດຖະບານລາວ ຕ້ອງໂຈະ
ການໃຫ້ສິນເຊື່ອແກ່ບັນດາບໍລິສັດເອກະຊົນທີ່ໄດ້ລົງທຶນໃນ
ໂຄງການພັດທະນາຕ່າງໆ ຂອງລັດຖະບານລາວນັ້ນ ກໍເພາະ
ຢ້ານວ່າຈະມີໜີ້ທີ່ບໍ່ສາມາດເກັບຄືນໄດ້ (NPL) ໃນລະບົບ
ທະນາຄານເພີ້ມຂຶ້ນ ຊຶ່ງກໍມີສາເຫດມາຈາກການ ທີ່ລັດຖະບານລາວມີໜີ້ສິນ ທີ່ເກີດຈາກໂຄງການເຫຼົ່ານີ້ ຫຼາຍຂຶ້ນນັບມື້ ແລະຍັງປາກົດວ່າ ມີຫຼາຍໆໂຄງການທັງໃນຂັ້ນສູນກາງ ແລະທ້ອງຖິ່ນທີ່ຂາດການຄວບຄຸມ ທີ່ມີປະສິດທິພາບ ແລະບໍ່ໂປ່ງໃສ ໃນການອະນຸມັດໂຄງການ.
ເພາະສະນັ້ນ ເພື່ອເປັນການປ້ອງກັນບໍ່ໃຫ້ເກີດບັນຫາໜີ້ເສຍໃນລະບົບ ທະນາຄານຂອງ
ລາວ ຈຶ່ງມີຄວາມຈຳເປັນ ທີ່ຈະຕ້ອງໂຈະການໃຫ້ສິນເຊື່ອ ແກ່ບັນດາບໍລິສັດເອກະຊົນ
ດັ່ງກ່າວ ດັ່ງທີ່ທ່ານສົມພາວ ໄດ້ໃຫ້ການຊີ້ແຈງວ່າ:
“ຖືວ່າມາຮອດປັດຈຸບັນນີ້ ໂຄງການໃໝ່ໆ ຫຼືວ່າໂຄງການທີ່ວ່າຫາກໍເລີ້ມກໍ່ສ້າງນີ້
ນະ ຖືວ່າທະນາຄານທຸລະກິດຫຼືວ່າທະນາຄານກາງ ແມ່ນຂາດຕົວເລີຍຄືບໍ່ປ່ອຍ
ໃນເມື່ອພວກເຮົາຢຸດພາກສ່ວນດັ່ງກ່າວນີ້ ພວກເຮົາກະເອົາເງິນດັ່ງກ່າວນັ້ນ ໄປ
ໃຫ້ພາກສ່ວນທີ່ທຳການຜະລິດ ແລະການບໍລິການຍ້ອນວ່າ ທະນາຄານນີ້ຕ້ອງ
ໄດ້ນຳໃຊ້ທຶນເດ້ ເພື່ອໄປປ້ອຍກູ້ເພື່ອການກກຸ້ມຕົວຂອງຕົນເອງ ແລະປ່ອຍກູ້
ຢ່າງມີປະສິທິຜົນ.”
ທາງດ້ານກະຊວງແຜນການ ແລະການລົງທຶນ ລາຍງານວ່າໜ່ວຍງານຂອງລັດຖະບານ
ລາວໃນລະດັບສູນກາງ ແລະທ້ອງຖິ່ນໃນທົ່ວປະເທດມີພັນທະ ທີ່ຈະຕ້ອງຊຳລະຄືນໜີ້
ພາຍໃນປະເທດ ທີ່ເກີດຈາກໂຄງການພັດທະນາ ທີ່ບັນດາບໍລິສັດເອກະຊົນ ໄດ້ລົງທຶນ
ໃຫ້ກ່ອນຄິດເປັນມູນຄ່າລວມຫຼາຍກວ່າ 18,000 ຕື້ກີບຫຼືເກີນກວ່າ 2,250 ລ້ານດອນລາ
ໂດຍໜີ້ສິນທີ່ເກີດຈາກການທີ່ໜ່ວຍງານຂອງລັດຖະບານ ໄດ້ອະນຸມັດໃຫ້ບໍລິສັດເອກະຊົນ
ລົງທຶນໃຫ້ກ່ອນໃນ 6,600 ກວ່າໂຄງການ ແລະໃນນີ້ກໍມີຢູ່ເຖິງ 2,600 ໂຄງການທີ່ເປັນ
ການອະນຸມັດ ຫຼັງຈາກນາຍົກລັດຖະມົນຕີລາວ ໄດ້ມີຄຳສັ່ງໃຫ້ໂຈະການອະນຸມັດໂຄງການ
ໃໝ່ນັບແຕ່ທ້າຍປີ 2013 ເປັນຕົ້ນມາແລ້ວ.
