ເຈົ້າໜ້າທີ່ຕຳຫລວດປາບປາມຢາເສບຕິດ ຍອມຮັບວ່າ ມີເຈົ້າໜ້າທີ່ຂັ້ນສູງຂອງລາວຈຳນວນບໍ່ນ້ອຍ ທີ່ມີສ່ວນກ່ຽວຂ້ອງກັບຂະບວນການຄ້າ ແລະການຂົນສົ່ງຢາເສບຕິດຂ້າມຊາດໃນລາວ.
ເຈົ້າໜ້າທີ່ຕຳຫລວດຂັ້ນສູງໃນໜ່ວຍປາບປາມຢາເສບຕິດຂອງລາວ ໄດ້ຍອມຮັບວ່າ ມີ
ເຈົ້າໜ້າທີ່ຂັ້ນສູງຈຳນວນບໍ່ນ້ອຍທັງໃນວົງການທະຫານ ຕຳຫລວດ ແລະລັດຖະບານທີ່
ໄດ້ເຂົ້າໄປພົວພັນ ແລະກ່ຽວຂ້ອງກັບການຄ້າຢາເສບຕິດ ໂດຍສະເພາະແມ່ນການເຂົ້າ
ໄປມີຜົນປະໂຫຍດ ໃນການຄ້າຢາບ້ານັ້ນ ຍັງຖືເປັນສາເຫດສຳຄັນທີ່ເຮັດໃຫ້ການລັກ
ລອບຂົນສົ່ງ ແລະການຄ້າຢາບ້າໃນລາວ ໄດ້ມີການຈັດຕັ້ງເປັນຂະບວນທີ່ມີເຄືອຂ່າຍ
ຢ່າງກວ້າງຂວາງທັງໃນລາວ ແລະ ປະເທດເພື່ອນບ້ານອີກດ້ວຍ ດັ່ງທີ່ທ່ານໄດ້ຢືນຢັນວ່າ:
“ລັກສະນະຂອງຢາບ້ານີ້ ມີລັກສະນະຂ້າມຊາດ ມີຄົນພາຍໃນ ແລະ ຕ່າງປະເທດ
ສົມຮູ້ຮ່ວມຄິດກັນເຮັດລັກສະນະຊອກຫາບ່ອນອີງທີ່ໜາແໜ້ນ ເປັນຕົ້ນແມ່ນຊອກ ແມ່ນແຊກຊຶມເຂົ້າພະນັກງານຜູ້ທີ່ມີສິດ ມີອຳນາດ ມີບົດບາດໃນເມື່ອຖືກເຈົ້າໜ້າທີ່ເຮົາດຳເນີນຄະດີ ຈະໄດ້ແອບແຝງເພື່ອຂົ່ມຂູ່ ແລະອື່ນໆ ອັນນີ້ກໍຄືແນວນັ້ນຫັ້ນແຫລະ ຈະແຈ້ງ.”
ທັງນີ້ໂດຍເຂດທີ່ຂະບວນການຄ້າຢາເສບຕິດ ໄດ້ສວຍໃຊ້ເປັນ
ເສັ້ນທາງລັກລອບຂົນສົ່ງຢາເສບຕິດ ຈາກເຂດສາມຫລ່ຽມຄຳ
ໄປຕ່າງປະເທດຫຼາຍຂຶ້ນນັບມື້ ຄືຊາຍແດນລາວກັບຫວຽດນາມ
ໂດຍເສັ້ນທາງທີ່ແກ້ງຄ້າຢາເສບຕິດນຳໃຊ້ຫຼາຍທີ່ສຸດໃນລາວກໍຄື
ຖະໜົນເລກ 13 ຈາກພາກເໜືອຕໍ່ມາຍັງຖະໜົນເລກ 9 ໃນ
ແຂວງສະຫວັນນະເຂດຕໍ່ໄປຍັງຫວຽດນາມ ແລະປະເທດທີ 3
ຕາມລຳດັບ.
ຍິ່ງໄປກວ່ານັ້ນ ການທີ່ຂະບວນການຄ້າຢາເສບຕິດຂ້າມຊາດ
ໄດ້ຫັນມາໃຊ້ລາວ ເປັນເສັ້ນທາງລັກລອບຂົນສົ່ງ ຢາເສບຕິດ
ຫຼາຍຂຶ້ນດັ່ງກ່າວນີ້ ກໍຍັງເປັນປັດໄຈສຳຄັນທີ່ຊຸກຍູ້ໃຫ້ເຍົາວະຊົນລາວພາກັນຫັນໄປຊົມໃຊ້
ຢາເສບຕິດເພີ້ມຂຶ້ນນັບມື້ອີກດ້ວຍ ໂດຍການສຳຫລວດຫຼ້າສຸດພົບວ່າ ມີເຍົາວະຊົນລາວ
ກວ່າ 3 ແສນຄົນ ທີ່ຢູ່ໃນສິ່ງແວດລ້ອມທີ່ມີຄວາມສ່ຽງສູງ ທີ່ຈະເຂົ້າໄປຫຍຸ້ງກ່ຽວກັບຢາ
ເສບຕິດໃນປັດຈຸບັນ.
ພົນຈັດຕະວາສົມແກ້ວ ສີລາວົງ ຮັກສາການລັດຖະມົນຕີວ່າການກະຊວງປ້ອງກັນຄວາມ
ສະຫງົບ ໄດ້ຖະແຫລງຍອມຮັບວ່າ ເປັນການຍາກຢ່າງຍິ່ງທີ່ຈະສາມາດບັນລຸເປົ້າໝາຍ
ໃນການເຮັດໃຫ້ລາວເປັນປະເທດ ທີ່ປອດຈາກບັນຫາຢາເສບຕິດໄດ້ ໃນປີ 2015 ທີ່ຖື
ເປັນເປົ້າໝາຍຮ່ວມກັນຂອງປະເທດສະມາຊິກໃນກຸ່ມອາຊ່ຽນທັງ 10 ປະເທດ.
ທັງນີ້ໂດຍເຖິງແມ່ນວ່າ ທ່າງການລາວຈະໄດ້ດຳເນີນມາດຕະການປາບປາມ ຢ່າງໜັກ
ກໍຕາມ ຫາກແຕ່ວ່າ ກໍບໍ່ສາມາດຈະທຳລາຍເຄືອຂ່າຍການຄ້າຢາເສບຕິດໃຫ້ໝົດໄປໄດ້
ເລີຍ ເນື່ອງຈາກວ່າຜູ້ຕ້ອງຫາໃນຄະດີຢາເສບຕິດ ທີ່ຖືກຈັບກຸມນັ້ນ ຈະບໍ່ຍອມໃຫ້ຂໍ້ມູນ
ທີ່ເຊື່ອມໂຍງໄປເຖິງສະມາຊິກຄົນອື່ນໆ ໃນເຄືອຂ່າຍຂອງພວກເຂົາເຈົ້າເລີຍ ດັ່ງທີ່
ພົນຈັດຕະວາສົມແກ້ວ ໄດ້ໃຫ້ການຢືນຢັນວ່າ:
“ເລື້ອງຊອກຜູ້ຊັດທອດໜາ ຢາກຮູ້ບ່ອນກົກ ມັນເອົາມາ ແລະບ່ອນໄປ ມັນສິໄປໃສ ມັນບໍ່ບອກເດັດຂາດ ມັນເວົ້າແຕ່ເອົາມາແຕ່ທາງເໜືອ ແລະຈະເອົາໄປທາງໃຕ້ ມີແຕ່ເທົ່ານັ້ນ ຄຳຕອບຂອງມັນ ສະນັ້ນກໍສະແດງວ່າ ເຂົາມີຄຳໝັ້ນສັນຍານຳກັນ ຈັບແຕ່ເຈົ້າ ຈະບໍ່ໍບອກເລື້ອງເຮົາ ຈະບໍ່ຊັດທອດ ມີແນວນັ້ນ ໃນຕົວຈິງກໍເປັນແນວນີ້ ຍາກທີ່ສຸດ.”
ທາງດ້ານທ່ານກຸ ຈັນສີນາ ປະທານຄະນະກຳມະການຄວບຄຸມ ແລະກວດກາຢາເສບຕິດແຫ່ງຊາດໄດ້ໃຫ້ການຢືນຢັນວ່າ ທາງການລາວໄດ້ດຳເນີນມາດຕະການສະກັດກັ້ນ ແລະປາບປາມເຄືອຂ່າຍການຄ້າຢາເສບຕິດຢ່າງເຂັ້ມງວດ ທັງຍັງໄດ້ຮ່ວມມືກັບປະເທດເພື່ອບ້ານ ໃນການສ້າງຕັ້ງໜ່ວຍພິເສດ ເພື່ອປະສານງານໃນການປາບປາມຢູ່ຊາຍແດນເປັນການສະເພາະດ້ວຍ.
ແຕ່ຢ່າງໃດກໍຕາມ ກໍຍັງປາກົດວ່າ ມີເຍົາວະຊົນລາວເຂົ້າໄປຫຍຸ້ງກ່ຽວກັບຢາເສບຕິດ
ຫຼາຍຂຶ້ນ ເພາະການສຳຫລວດພົບວ່າ ມີເຍົາວະຊົນລາວເພີ້ມຂຶ້ນຈາກ 245,000 ກວ່າ
ຄົນໃນປີ 2013 ເປັນ 3 ແສນກວ່າຄົນ ທີ່ຢູ່ໃນສິ່ງແວດລ້ອມ ທີ່ມີຄວາມສ່ຽງສູງ ທີ່ຈະເຂົ້າ
ໄປຫຍຸ້ງກ່ຽວກັບຢາເສບຕິດໃນປັດຈຸບັນນີ້.
