ໃນລາຍການຊີວິດຊາວລາວ ປະຈຳແລງວັນພະຫັດຂອງວີໂອເອ
ມືນີ້ ເຮົາຈະນຳພາທ່ານ ໄປຢ້ຽມຢາມຖາມຂ່າວ ທ່ານຂວັນ
ໄພບູນ ຫົວໜ້າຄອບຄົວ ແລະ ລູກຊາຍຂອງເພິ່ນ ຄື ທ່ານຣຸ່ງອາ
ຣຸນ ໄພບຸນ ຜູ້ພິທັກສັນຕິລາດ ເຊື້ອສາຍລາວ-ອາເມຣິກັນ ທີ່ໄດ້
ເຂົ້າມາຕັ້ງຖິ່ນຖານຢູ່ເມືອງ Clear Lake ເມື່ອ 30 ກວ່່າປີກ່ອນ.
ເມືອງ Clear Lake ເປັນເມືອງນ້ອຍໆ ງຽບສະຫງົບດີ ຕັ້ງຢູ່ໃນ
ລັດ IOWA ພາກກາງຂອງ ສະຫະລັດ ຊຶ່ງ ກິ່ງສະວັນ ຈະນຳເອົາເລື້ອງນີ້ມາສະເນີທ່ານ.
ທ່ານຜູ້ຟັງທີ່ເຄົາລົບ ໃນລາຍການຊີວິດຊາວລາວຂອງເຮົາມື້ນີ້
ເຮົາຈະແນະນຳໃຫ້ທ່ານຮູ້ຈັກກັບ ສະມາຊິກຄອບຄົວ ໄພບູນ
ເຊຶ້ອສາຍລາວ ທີ່ໄດ້ເຂົ້າມາຕັ້ງຖິ່ນຖານຢູ່ໃນ ສະຫະລັດ ກາຍ
ມາເປັນພົນລະເມືອທ້ອງຖິ່ນ ປະກອບວິຊາອາຊີບຢ່າງສຳເລັດ
ແລະເປັນພົນລະເມືອງດີຂອງປະເທດ. ປັດຈຸບັນນີ້ ຄອບຄົວ
ໄພບູນ ຕັ້ງຖິ່ນຖານຢູ່ເມືອງ Clear Lake ຫ່າງຈາກ ນະຄອນ
ຫລວງ Des Moines ໄປທາງທິດຕາເວັນຕົກປະມານ 200
ໄມລ. ເມືອງ Clear Lake ເປັນເມືອງນ້ອຍໆ ງຽບສະຫງົບ ມີ
ທະເລສາບໃຫຍ່ອັນດັບສອງຢູ່ໃນ ສະຫະລັດ. ນອກຈາກນັ້ນ
ແລ້ວ ລັດ IOWA ຍັງເປັນທີ່ຮູ້ກັນດີ ວ່າເປັນແຫລ່ງເຂົ້າແຫລ່ງນ້ຳ ມີໂຮງງານ ອຸດສາຫະກຳຕ່າງໆ ໂດຍສະເພາະຢ່າງຍິ່ງ ແມ່ນເປັນທົ່ງປູກໝາກສາລີ ໃຫຍ່ທີ່ສຸດຂອງປະເທດເພື່ອນຳ
ໄປລ້ຽງສັດ ແລະເຮັດພະລິດຕະພັນຕ່າງໆ. ເພາະສະນັ້ນຢູ່ໃນລັດນີ້ ຈ່ຶງຈະຫລຽວເຫັນແຕ່
ທົ່ງໝາກສາລີ ອັນກວ້າງໃຫຍ່ສຸດຊົ່ວຫູຊົ່ວຕາ. ຖ້າຫາກທ່ານລຶ້ງເຄີຍກັບຊີວິດການຫາຢູ່ຫາກິນຢູ່ໃນເມືອງໃຫຍ່ ທ່ານອາດຈະບໍ່ມັກກັບການໃຊ້ຊີວິດທຳມະຊາດ ຢູ່ແບບມິດໆ
ຊ້າໆ ບໍ່ມີຕຶກສູງ ແລະບໍ່ມີລົດຕິດຢູ່ຕາມຖະໜົນຫົນທາງຢ່າງຄັບຄັ່ງ.
ທ່ານ ຂວັນ ໄພບູນ ແລະຍານາງເຝືອງ ພ້ອມດ້ວຍລູກຫ້າຄົນ ໄດ້ເຂົ້າມາຕັ້ງຖິ່ນຖານຢູ່ໃນ
ດິນແດນອັນກວ້າງໄກແຫ່ງນີ້ ໃນປີ 1984. ບັດນີ້ບັນດາລູກເຕົ້າທັງຫຼາຍແມ່ນໄດ້ໃຫຍ່ກ້າ
ໜ້າບານ ເປັນຄອບເປັນຄົວ ແລະເປັນພົນລະເມືອງດີຂອງປະເທດຊາດໄປໝົດແລ້ວ. ທ່ານຂວັນ ໄພບູນ ໄດ້ກ່າວຄວາມເປັນມາຂອງການຕັ້ງຊີວິດຄອບຄົວໃນເບື້ອງຕົ້ນສູ່
ວີໂອເອ ຟັງດັ່ງນີ້ :
ກ່ຽວກັບການປະກອບວິຊາອາຊີບ ທ່ານຂວັນ ໄດ້ເລົ່າຕໍ່ໄປວ່າ
ທ່ານຂວັນ ໄດ້ຕັ້ງຊີວິດຢູ່ເມືອງ Clear Lake ມາເປັນເວລາ 33 ປິແລ້ວ. ທ່ານມັກໜ້າທີ່ວຽກການ ບັນຍາກາດແລະສິ່ງແວດລ້ອມ ໂດຍສະເພາະແມ່ນການຕຶກເບັດຫາປາ ຊຶ່ງທ່ານໄດ້ເລົ່າມ້ວນທ້າຍດັ່ງນີ້ :
ທ່ານຣຸ່ງອາຣຸ່ນ ໄພບູນ ລູກຊາຍຜູ້ທີສອງ ຂອງທ່ານຂວັນ
ແລະຍານາງເຝືອງ ສຳເລັດການສຶກສາຝ່າຍ Law Enfor-
cement ຫລື ຜູ້ພິທັກສັນຕິລາດ ປັດຈຸບັນເປັນ ເຈົ້າໜ້າທີ່
ຕຳຫລວດ ລາດຕະເວນເມືອງ Mason. ຣຸ່ງອາຣຸນ ໄດ້ຕິດ
ຕາມຄອບຄົວມາ ສະຫະລັດ ເວລາອາຍຸ 12 ປີ ເຕີບໃຫຍ່
ຢູ່ໃນເມືອງ Clear Lake ລັດ IOWA. ທ່ານໄດ້ເລົ່າຊີວິດ
ຄວາມເປັນມາ ແລະປະສົບການຂອງຊີວິດ ຢູ່ໃນເມືອງ
Clear Lake ສູ່ ວີໂອເອ ຟັງ ວ່າ :
ສະບາຍດີ ຂ້ານ້ອຍຊື່ ຣຸ່ງອາຣຸນ ໄພບູນ ມາສະຫະລັດ ອາເມຣິກາ ໃນປີ 1984 ກັບຄອບ ຄົວ ມີອ້າຍສອງຄົນ ແລະນ້ອງສາວສອງຄົນ ຂ້າພະເຈົ້າ ຢູ່ເມືອງ Clear Lake ຮຽນຈົບຈາກ ມັດທະຍົມ New Man Catholic School ຫລັງຈາກຈົບແລ້ວ ຂ້າະພະເຈົ້າກໍໄປ ຮຽນຕໍ່ທີ່ ມະຫາວິທະຍາໄລອີກສອງປີ ແລະໄດ້ເຂົ້າຮັບໃຊ້ເປັນເຈົ້າໜ້າທີ່ຕຳຫລວດ ເມືອງທີ່ຂ້າພະເຂົ້າໃຊ້ຊິວິດຢູ່ປັດຈຸບັນ ເປັນເມືອງນ້ອຍໆ ປະຊາກອນປະມານ 3,500 ຄົນ ຮ່າງຈາກເມືອງ Mason 10 ໄມລ ບ່ອນທີ່ຂ້າພະເຂົ້າເຮັດວຽກ ເປັນເຂດບ້ານນອກ ແລະເຕັມໄປດ້ວຍທົງໝາກສາລີ. ຂ້ານ້ອຍ ແຕ່ງງານແລ້ວ ມີລູກຊາຍສອງຄົນ ອາຍຸ 19 ແລະ 15 ປີ ແລະ ພັນລະຍາຂອງ ຂ້ານ້ອຍ ເປັນນາງພະຍາບານຢູ່ຫ້ອງສຸກເສີນ.
ປັດຈຸບັນນີ້ ຂ້ານ້ອຍ ມີອາຍຸ 41 ປີ ແລະໄດ້ຮັບໃຊ້ເປັນເຈົ້າໜ້າທີ່ຕຳຫລວດ ລາດຕະເວນເມືອງໄດ້ 12 ປີແລ້ວ. ເມືອງທີ່ ຂ້ານ້ອຍ ເຮັດວຽກຢູ່ນີ້ ເປັນເມືອງສະຫງົບ ແຕ່ຫລາຍໆຄັ້ງມີເລື້ອງຜິດຖຽງກັນທຳມະດາ ແລະຕີກັນຢູ່ບາກິນເຫລົ້າ ແລະບາງມື້ ກໍມິດງຽບດີ. ເມືອງນີ້ ມີກຳລັງເຈົ້າໜ້າທີ່ຕຳຫລວດທັງໝົດ 30 ຄົນເທົ່ານັ້ນ ແລະ ຂ້ານ້ອຍ ເປັນຄົນເອເຊຍຄົນດຽວ.
ຢູ່ໃນເມືອງນັ້ນມີ ຄົນເອເຊຍ ມີບັນຫາກັບດ້ານກົດໝາຍບໍ່? ບໍ່ ເທົ່າທີ່ຜ່ານມາ ຂ້ານ້ອຍ ບໍ່ເຫັນມີຄົນເອເຊຍ ມີເລື້ອງພົວພັນກັບບັນຫາໃດໆ.
ທ່ານເຮັດວຽກມື້ເວັນ ຫລືມື້ຄືນ? ຂ້ານ້ອຍ ເຮັດວຽກຍາມມື້ຄືນມາໄດ້ 10 ປີ ແລ້ວ ຈາກ 11 ໂມງກາງຄືນ ຫາ 7 ໂມງເຊົ້າ. ຖ້າເປັນດັ່ງນັ້ນ ທ່ານຕ້ອງນອນກາງເວັນໝົດມື້ແມ່ນບໍ່? ແມ່ນແລ້ວ ເພາະສະນັ້ນແຫລະ ຂ້ານ້ອຍ ຈຶ່ງບໍ່ຮັບໂທລະສັບ ໃນຕອນກາງເວັນ ເວລາຂ້ານ້ອຍ ນອນ ແລະ ປະຕິເສດບໍ່ຮັບໂລະສັບ. ທ່ານມັກວຽກຂອງທ່ານບໍ່? ຂ້ານ້ອຍ ມັກອີ່ຫລີ. ເປັນຫຍັງທ່ານຈຶ່ງມັກເຮັດວຽກຕອນກາງຄືນ? ຂ້ານ້ອຍ ບໍ່ມັກເຮັດວຽກຕອນກາງຄືນ ແຕ່ໄດ້ຖືກມອບໝາຍໃຫ້ ຂ້ານ້ອຍ ຢາກເຮັດວຽກຍາມມື້ເວັນ ແຕ່ຍັງບໍ່ມີສິດທີ່ຈະເລືອກເອົາຍາມມື້ເວັນໄດ້. ການປະຕິບັດໜ້າທີ່ແບ່ງອອກເປັນສາມພາກຄື ຕອນກາງເວັນ ຕອນແລງ ແລະຕອນເດີກ. ໜ້າທີ່ຂອງ ຂ້ານ້ອຍ ກໍຄືຂັບລົດຕຳຫລວດລາດຕະເວນ ໄປຕາມເຂດບ້ານເຮືອນຕ່າງໆ ສັງເກດເບິ່ງບ່ອນທີ່ອາດຈະມີບັນຫາ ໂດຍສະເພາະ ຢູ່ຕາມບາກິນເຫລົ້າ ບ່ອນທີ່ມັກມີການຜິດຖຽງຕີກັນ ກ່ອນບາປີດສອງໂມງເຊົ້າ. ຖ້າເວົ້າດັ່ງນັ້ນ ແລງວັນສຸກເສົາ ມັກຈະມີບັນຫາແມ່ນບໍ່? ຖືກຕ້ອງ. ແຕ່ລະຄືນມີເຈົ້າໜ້າທີ່ຕຳຫລວດ ຫ້າຄົນເຮັດວຽກນຳກັນ ກັບຫົວໜ້າຄົນນຶ່ງ. ຂ້ານ້ອຍ ເປັນຄົນເອເຊຍພຽງຄົນດຽວເຮັດວຽກຢູ່ທີ່ນີ້ ແລະກໍໄດ້ຮັບການດູແລດີ. ຂ້ານ້ອຍ ຈະເຮັດວຽກອີກ 15 ປີກ່ອນຈະອອກກິນເບ້ຍບຳນານ. ມື້ໃດເປັນມື້ພັກການ? ບໍ່ມີມື້ພັກເປັນປົກກະຕິ ຂ້ານ້ອຍ ເຮັດວຽກສັບປ່ຽນກັນແຕ່ລະອາທິດ ທ່ານເຮັດຫຍັງໃນວັນພັກ? ສິ່ງໃດທີ່ ຂ້ານ້ອຍ ເບິ່ງແຍງນຳຄອບຄົວໄດ້ ຂ້ານ້ອຍ ກໍເຮັດ ເຊັ່ນບົວລະບັດອ້ອມແອ້ມເຮືອນຊານ ໄປພັກຜ່ອນແລະອື່ນໆ. ທ່ານມັກໄປຕຶກເບັດ ຫລືໂຮ່ເນື້ອບໍ່? ຂ້ານ້ອຍ ບໍ່ມັກໂຮ່ເນື້ອ ແຕ່ມັກໄປຕຶກເບັດເລື້ອຍໆ ມີປາໃຫ້ຕຶກຫລາຍ ຂ້ານ້ອຍ ຕຶກບໍ່ໄດ້ຫລາຍ ແຕ່ພໍໄດ້ກິນ.
ນັ້ນແມ່ນການສຳພາດ ສະມາຊິກຄອບຄົວ ໄພບຸນ ທີ່ໄດ້ເຂົ້າມາຕັ້ງຖິ່ນຖານ ຢູ່ໃນ ສະຫະ ລັດ ເມື່ອ 30 ກວ່າປີກ່ອນ ທີ່ໄດ້ສ້າງຜົນງານ ປະກອບວິຊາອາຊີບ ແລະເປັນພົນລະເມືອງດີ ຂອງປະເທດ ທີ່ເມືອງ Clear Lake ລັດ IOWA.
