ປະທານາທິບໍດີ ເທີກີ ທ່ານ Recep Tayyip Erdogan ໄດ້ໃຫ້
ຄຳໜັ້ນສັນຍາທີ່ຈະດຳເນີນການຕໍ່ໄປ ກັບການໂຈມຕີທາງທະ
ຫານ ຕໍ່ພວກຫົວຮຸນແຮງລັດອິສລາມ ແລະພວກກະບົດຊາວ
ເຄີດ ໃນຊີເຣຍ ແລະອີຣັກ ໃນຂະນະທີ່ບັນດາເຈົ້າໜ້າທີ່ອົງການ
NATO ຕຽມການສົນທະນາຫາລືກ່ຽວກັບບັນຫາດັ່ງກ່າວໃນວັນ
ອັງຄານມື້ນີ້.
ທ່ານ Erdogan ໄດ້ກ່າວຢູ່ກອງປະຊຸມນັກຂ່າວ ທີ່ເດີ່ນເຮືອບິນ
ໃນນະຄອນ Ankara ກ່ອນເດີນທາງໄປຢ້ຽມຢາມຈີນ ຢ່າງເປັນ
ທາງການວ່າ “ບໍ່ມີການເອົາ ບາດກ້າວກັບຄືນຫຼັງ ໃນການຕໍ່ສູ້
ຕ້ານການກໍ່ການຮ້າຍ ຂອງພວກເຮົາ. ນີ້ເປັນຂັ້ນຕອນ ແລະຈະ
ດຳເນີນຕໍ່ໄປ ດ້ວຍການຕັດສິນໃຈແບບດຽວກັນ.”
ທ່ານຍັງໄດ້ສະແດງຄວາມໝັ້ນໃຈເຖິງ “ບາດກ້າວຈຳເປັນ” ທີ່ຈະປະຕິບັດໂດຍ ບັນດາ
ຜູ້ນຳອົງການ NATO ທີ່ໄດ້ພົບກັນໃນວັນອັງຄານມື້ນີ້ ຕາມການຮ້ອງຂໍຂອງເທີກີ ເພື່ອ
ຫາລືກ່ຽວກັບບັນຫາຂັດແຍ້ງໃນຊີເຣຍ ແລະອີຣັກ.
Ankara ໄດ້ທຳການຮ້ອງຂໍພາຍໃຕ້ມາດຕາ 4 ໃນສົນທິສັນຍາການກໍ່ຕັ້ງອົງການ NATO
ທີ່ອະນຸຍາດໃຫ້ບັນດາປະເທດຕ່າງໆ ຮ້ອງຂໍໃຫ້ເປີດການປຶກສາຫາລື ເວລາໃດທີ່ເຂົາເຈົ້າ
ເຊື່ອວ່າ ຜືນແຜ່ນດິນອັນຄົບຖ້ວນ ຄວາມເປັນເອກກະລາດທາງດ້ານການເມືອງ ແລະ
ຄວາມປອດໄພຂອງເຂົາເຈົ້າ ຖືກຂົ່ມຂູ່.
ການເຈລະຈາຫາລືດັ່ງກ່າວ ຈະມີຂື້ນ ໃນຂະນະທີ່ເທີກີ ປະເຊີນໜ້າກັບຄວາມ ຮຸນແຮງ
ທີ່ເພີ້ມທະວີຂຶ້ນ ໃນພາກໃຕ້ຂອງປະເທດໃກ້ກັບຊາຍຊີເຣຍ ແລະກຳລັງເພີ້ມການດຳ
ເນີນຄວາມພະຍາຍາມເພື່ອຕໍ່ສູ້ກັບພວກກໍ່ການຮ້າຍນັ້ນ.
ໃນວັນຈັນວານນີ້ ສະຫະລັດ ກ່າວວ່າ ຕົນກຳລັງດຳເນີນງານຮ່ວມກັບເທີກີກ່ຽວກັບແຜນ
ໂຈມຕີ ເພື່ອກວດລ້າງພວກກະບົດລັດອິສລາມ ອອກຈາກພາກເໜືອຊີ ເຣຍ ຊຶ່ງການໂຈມ
ຕີທາງທະຫານດັ່ງກ່າວ ອາດຈະເພີ້ມການພົວພັນຂອງ Ankara ໃນການຕໍ່ສູ້ ຕ້ານພວກ
ຫົວຮຸນແຮງຢູ່ໃນຂົງເຂດ.