ບັນດາບໍລິສັດເອກະຊົນລາວ ແລະຕ່າງຊາດເກືອບເຖິງ 200 ລາຍໄດ້ລົງທຶນໃນເຂດເສດຖະກິດພິເສດ ແລະເຂດເສດຖະກິດ
ສະເພາະໃນລາວທັງ 10 ເຂດ ຄິດເປັນມູນຄ່າການລົງທຶນລວມ
ຫຼາຍກວ່າ 6 ພັນລ້ານດອນລາແລ້ວ.
ກະຊວງແຜນການ ແລະການລົງທຶນ ລາຍງານວ່າ ມີບັນດາບໍລິສັດເອກະຊົນຈຳນວນເຖິງ
198 ລາຍທີ່ໄດ້ລົງທຶນຢູ່ໃນເຂດເສດຖະກິດພິເສດ ແລະເຂດເສດຖະກິດສະເພາະ ທີ່ມີຢູ່
10 ແຫ່ງໃນລາວໃນປະຈຸບັນ ແລະຄິດເປັນມູນຄ່າການລົງທຶນລວມຫຼາຍກວ່າ 6,000 ລ້ານ
ດອນລາ ໂດຍເຂດເສດຖະກິດພິເສດ ສາມຫຼ່ຽມຄຳທີ່ເມືອງຕົ້ນເຜິ້ງ ແຂວງບໍ່ແກ້ວເປັນເຂດ
ທີ່ໄດ້ລົງທຶນໄປແລ້ວຫຼາຍທີ່ສຸດ ກໍຄື 500 ລ້ານດອນລາ ຈາກແຜນການລົງທຶນລວມ 2,250 ລ້ານດອນລາ ທີ່ເປັນການລົງທຶນ100 ເປີເຊັນ ຂອງບໍລິສັດເອກະຊົນຈາກປະເທດຈີນ.
ສ່ວນເຂດເສດຖະກິດສະເພາະບໍ່ແຕນແດນງາມ ຊຶ່ງຕັ້ງຢູ່ຊາຍແດນ ລະຫວ່າງລາວກັບຈີນ
ໃນເຂດແຂວງຫລວງນ້ຳທານັ້ນ ກໍເປັນອີກເຂດໜຶ່ງ ທີ່ເປັນການລົງທຶນຂອງກຸ່ມບໍລິສັດ
ຈາກປະເທດຈີນເຊັ່ນດຽວກັນ ໂດຍໃນປະຈຸບັນ ກຸ່ມຜູ້ລົງທຶນກຳລັງກໍ່ສ້າງສາງສິນຄ້າ ແລະ
ສູນກັກກັນພືດອັນເປັນສ່ວນໜຶ່ງ ຂອງແຜນການພັດທະນາໃຫ້ເປັນເຂດການຄ້າ ແລະ
ບໍລິການຄົບວົງຈອນ ທີ່ຈະໃຊ້ເງິນລົງທຶນລວມເຖິງ 500 ລ້ານດອນລາ.
ໂດຍກ່ອນໜ້ານີ້ທາງການລາວໄດ້ມີຄຳສັ່ງໃຫ້ປິດບ່ອນກາຊີໂນ
ຢູໃນເຂດເສດຖະກິດສະເພາະບໍ່ແຕນແດນງາມໄປແລ້ວ ຊຶ່ງມີ
ສາເຫດມາຈາກບັນຫາຫຍໍ້ຖໍ້ ທີ່ເກີດຂຶ້ນພາຍໃນບ່ອນກາຊີໂນ
ດັ່ງກ່າວທັງຍັງໄດ້ເປັນສາເຫດ ເຮັດໃຫ້ທາງການລາວຕ້ອງ
ທົບທວນແຜນການສ້າງຕັ້ງ ເຂດເສດຖະກິດພິເສດ ແລະເຂດ
ສະເພາະອີກເທື່ອໃໝ່ ຢ່າງຮອບຄອບໃນທົ່ວປະເທດອີກດ້ວຍ.
ທັງນີ້ໂດຍທ່ານ ສົມສະຫວາດ ເລັ່ງສະຫວັດ ຮອງນາຍົກ
ລັດຖະມົນຕີຜູ້ຊີ້ນຳວຽກງານເສດຖະກິດການຜະລິດ ແລະ
ຈະລາຈອນໃນຖານະປະທານຂອງຄະນະກຳມະການຄຸ້ມຄອງເຂດເສດຖະກິດພິເສດ ແລະ ເຂດເສດຖະກິດສະເພາະແຫ່ງຊາດ ໄດ້ໃຫ້ການຊີ້ແຈງວ່າ ການຄຸ້ມຄອງເຂດເສດຖະກິດ ທັງ 10 ແຫ່ງ ໃນປະຈຸບັນໄດ້ດຳເນີນໄປພາຍໃຕ້ສະພາວະ ທີ່ຍັງບໍ່ມີຄວາມຊັດເຈນໃນບາງດ້ານ ຕົວຢ່າງກໍຄືການທີ່ອະນຸຍາດໃຫ້ມີບ່ອນກາຊີໂນ ຢູ່ໃນເຂດເສດຖະກິດສະເພາະ ບໍ່ແຕນ
ແດນງາມນັ້ນ ໄດ້ເກີດບັນຫາອາຊະຍາກຳຫຼາຍຂຶ້ນນັບມື້ ຊຶ່ງກໍເຮັດໃຫ້ທາງການລາວ
ຕ້ອງສັ່ງປິດບ່ອນກາຊີໂນດັ່ງກ່ວ ນັບເປັນເວລາກວ່າ 2 ປີມາແລ້ວ.
ຍິ່ງໄປກວ່ານັ້ນ ຈາກບັນຫາດັ່ງກ່າວຍັງເຮັດໃຫ້ທາງການລາວ
ໄດ້ຕັດສິນໃຈ ທີ່ຈະບໍ່ອະນຸຍາດໃຫ້ມີບ່ອນກາຊີໂນຢູ່ໃນເຂດ
ເສດທະກິດພິເສດ ທີ່ຈະສ້າງຕັ້ງຂຶ້ນໃໝ່ ໃນໄລຍະຕໍ່ໄປອີກດ້ວຍ
ໂດຍຈະອະນຸຍາດໃຫ້ມີບ່ອນກາຊີໂນໄດ້ສະເພາະເຂດທີ່ມີຢູ່ແລ້ວ.
ແຕ່ຢ່າງໃດກໍຕາມ ທາງການລາວກໍໄດ້ວາງແຜນການ ທີ່ຈະສ້າງ
ຕັ້ງເຂດເສດຖະກິດ ໃຫ້ໄດ້ບໍ່ນ້ອຍກວ່າ 20 ແຫ່ງ ພາຍໃນປີ 2015
ໂດຍເຂດທຳອິດ ກໍແມ່ນເຂດເສດຖະກິດພິເສດສະຫວັນ-ເຊໂນ
ໃນແຂວງສະຫວັນນະເຂດ ທີ່ສ້າງຕັ້ງຂຶ້ນໃນປີ 2003 ຕິດຕາມດ້ວຍເຂດເສດຖະກິດສະເພາະ ບໍ່ແຕນແດນງາມ ຢູ່ແຂວງ
ຫຼວງນ້ຳທາ ທີ່ສ້າງຕັ້ງຂຶ້ນໃນປີດຽວກັນ ແຕ່ທີ່ຖືວ່າໄດ້ມີການພັດທະນາຢ່າງໄວວາທີ່ສຸດ
ກໍແມ່ນເຂດເສດຖະກິດພິເສດສາມຫລ່ຽມຄຳທີ່ເມືອງຕົ້ນເຜິ້ງໃນແຂວງບໍ່ແກ້ວດັ່ງກ່າວ.
ສ່ວນນະຄອນວຽງຈັນ ກໍມີຢູ່ເຖິງ 5 ເຂດ ຄືນິຄົມອຸດສາຫະກຳ
ແລະການຄ້າວຽງຈັນ-ໂນນທອງ ເຂດເສດຖະກິດສະເພາະ
ດົງໂພສີ ເຂດເສດຖະກິດສະເພາະລ່ອງແກ່ງ-ວຽງຈັນ ເຂດພັດ
ທະນາກວມລວມ ຢູ່ທີ່ເມືອງໄຊເສດຖາ ແລະເຂດເສດຖະກິດ
ສະເພາະ ບຶງທາດຫຼວງທີ່ລົງທຶນໂດຍບໍລິສັດຈາກຈີນອີກເຂດໜຶ່ງ
ຊຶ່ງການພັດທະນາໃນທັງ 5 ເຂດ ດັ່ງກ່າວກໍຄືບໜ້າໄປຫຼາຍແລ້ວ
ໃນປະຈຸບັນດັ່ງທີ່ ທ່ານອານຸພາບ ຕຸນາລົມ ຮອງເຈົ້າຄອງເຂດ
ນະຄອນຫຼວງວຽງຈັນ ໄດ້ໃຫ້ການຢືນຢັນວ່າ:
“ເຂດເສດຖະກິດພິເສດ ໄດ້ກຳນົດແລ້ວ ມາເຖິງປະຈຸບັນນີ້ ໄດ້ມີຫ້າເຂດແລ້ວ ເຂດດັ່ງກ່າວນີ້ ຈະເປັນເຂດອຸດສາຫະກຳ ແລະເຂດບໍລິການເລື່ອງທີ່ຢູ່ອາໄສ ແລະຊຸມຊົນ ແຕ່ສ່ວນຫຼາຍເຂດດັ່ງກ່າວ ຈະຂ້ອນໄປຫາເຂດຊາຍແດນ ທີ່ມີບ່ອນຄົມມະນາຄົມສະດວກໝາຍຄວາມວ່າ ໄປທາງແຄມແມ່ນ້ຳຂອງ.”
ນອກຈາກນີ້ ລັດຖະບານລາວກໍຍັງໄດ້ວາງເປົ້າໝາຍ ທີ່ຈະສ້າງຕັ້ງເຂດເສດຖະກິດພິເສດໃຫ້ໄດ້ເຖິງ 41 ເຂດ ໃນທົ່ວປະເທດຫາກແຕ່ກໍຍັງບໍ່ມີຄວາມຊັດເຈນວ່າ ຈະດຳເນີນການໃຫ້ບັນລຸເປົ້າໝາຍດັ່ງກ່າວ ໄດ້ຢ່າງແທ້ຈິງ ເມື່ອໃດແທ້ ແຕ່ສຳຫລັບເຂດເສດຖະກິດ ທັງ 10 ເຂດ ທີ່ໄດ້ສ້າງຕັ້ງຂຶ້ນແລ້ວນັ້ນ ລັດຖະບານລາວ ໄດ້ອະນຸຍາດໃຫ້ສຳປະທານທີ່ດິນ ໄປແລ້ວຄິດເປັນພື້ນທີ່ລວມກັນກວ້າງກວ່າ 13,000 ເຮັກຕາ.