ການປະທະກັນຮອບໃໝ່ໄດ້ເກີດຂຶ້ນໃນເຢເມນລະຫວ່າງກໍາ
ລັງຮັກສາຄວາມປອດໄພຂອງລັດຖະບານ ແລະພວກຈົງຮັກ
ພັກດີຕໍ່ຫົວໜ້າຊົນເຜົ່າທີ່ມີອໍານາດຫລາຍຄົນນຶ່ງ.
ພວກເຫັນເຫດການແຈ້ງໃຫ້ຊາບວ່າ ໄດ້ຍິນສຽງປືນດັງຂຶ້ນ
ໃນນະຄອນຫລວງ Sana’a ໃນວັນພຸດມື້ນີ້ ນຶ່ງມື້ຫລັງຈາກ
ມີການສູ້ລົບກັນລະຫວ່າງສອງຝ່າຍ ຊຶ່ງໄດ້ເຮັດໃຫ້ປະຊາຊົນເສຍຊີວິດໄປ 38ຄົນນັ້ນ. ອົງການຂ່າວ Reuters ອ້າງຄໍາເວົ້າຂອງປະທານາທິບໍດີ Ali Abdullah Saleh ທີ່ກ່າວວ່າ ທ່ານຈະບໍ່ຖືກແກ່ດຶງເຂົ້າໄປສູ່ສົງຄາມກາງເມືອງ ເຖິງແມ່ນໄດ້ມີການປະທະກັນກັບ Sheikh Sadeq al-Ahmar ຫົວໜ້າຊົນເຜົ່າ Hashid ນັ້ນກໍຕາມ.
ໃນວັນອັງຄານວານນີ້ ພວກກໍາລັງທີ່ຈົງຮັກພັກດີຕໍ່ທ່ານ al-Ahmarໄດ້ເຂົ້າຄວບຄຸມຕຶກອາຄານຫລາຍຫລັງໃນນະຄອນຫລວງ Sana’a ໃນຂະນະທີ່ກໍາລັງຂອງປະທານາທິບໍດີ ຊາເລ ຍິງປືນຄົກໃສ່ບ້ານພັກຂອງຫົວໜ້າຊົນເຜົ່າຝ່າຍຄ້ານຄົນນີ້.
ບັນດາເຈົ້າໜ້າທີ່ການແພດກ່າວວ່າ ພວກຈົງຮັກພັກດີຕໍ່ຜູ້ນຳຊົນເຜົ່າ 24 ຄົນເສຍຊີວິດໃນການກໍ່ຄວາມວຸ້ນວາຍຂຶ້ນໃນວັນອັງຄານວານນີ້. ບັນດາເຈົ້າໜ້າທີ່ລັດຖະບານແຈ້ງໃຫ້ຊາບວ່າ ທະຫານ 14 ຄົນເສຍຊີວິດ.
ການຕັດສິນໃຈຂອງຫົວໜ້າຊົນເຜົ່າໃຫ້ພວກສະໜັບສະໜຸນທ່ານເຂົ້າ ພົວພັນໃນການສູ້ລົບ
ກັບກໍາລັງຂອງຝ່າຍລັດຖະບານ ເປັນຂີດໝາຍແຫ່ງການເພີ່ມທະວີຄວາມຮຸນແຮງຂຶ້ນໃນ
ການລຸກຮືຂຶ້ນຕໍ່ຕ້ານລັດຖະບານມາໄດ້ເກືອບ 4 ເດືອນແລ້ວໃນເຢເມນນັ້ນ.
