ລິ້ງ ສຳຫລັບເຂົ້າຫາ

ເດັກຍິງປາກິສຖານ ທີ່ຖືກຍິງ ຖືກສົ່ງໄປປິ່ນປົວ ທີ່ອັງກິດ (ສະໄລດ໌)


ບັນດາເດັກນ້ອຍ ປາກິສຖານ ພາກັນສູດມົນ ພາວະນາ ໃຫ້ ນາງ Malala Yousafzai ຫາຍເຊົາ ຈາກບາດແຜ ທີ່ຖືກຍິງໃສ່ຫົວ ແລະກ້ານຄໍ.

ບັນດາເດັກນ້ອຍ ປາກິສຖານ ພາກັນສູດມົນ ພາວະນາ ໃຫ້ ນາງ Malala Yousafzai ຫາຍເຊົາ ຈາກບາດແຜ ທີ່ຖືກຍິງໃສ່ຫົວ ແລະກ້ານຄໍ.

ບັນດາ​ເຈົ້າ​ໜ້າ​ທີ່ ປາ​ກິ​ສຖານ ກ່າວ​ວ່າ ​ເດັກ​ນັກຮຽນຍິງ​ອາຍຸ
14 ປີ ຜູ້​ທີ່​ຖືກ​ຍິງ​ທີ່​ຫົວ​ແລ​ະຄໍ​ ອາທິດ​ແລ້ວ​ນີ້ ​ໃນ​ການ​ໂຈມຕີ​
ຂອງ​ພ​ວກກໍ່​ການ​ຮ້າຍ ​ໄດ້​ຖືກ​ສົ່ງໄປ​ປິ່ນປົວ​ ທີ່ປະ​ເທດ​ອັງກິດ.

ບັນ​ດາ​ນາຍ​ແພດປາ​ກິ​ສຖານ ​ໄດ້​ແນະ​ນໍາ​ໃຫ້ຍ້າຍ ​ນາງ Malala
Yousafzai ໄປປິ່ນປົວ​ຢູ່ໂຮງພະຍາບານ ທີ່ປະ​ເທດອັງກິດ ບ່ອນ​
ທີ່ ນາງ​ຈະ​ສາມາດໄດ້​ຮັບ​ການ​ປິ່ນປົວຮັກສາ​ເປັນ​ເວລາ​ນານ ອັນ​
ເປັນ​ສິ່ງ​ທີ່​ນາງ​ຕ້ອງການ ເພື່ອໃຫ້ຫາ​ຍດີຈາກ​ຄວາມ​ເຈັບ​ປວດ
ທາງ​ດ້ານ​ຮ່າງກາຍ ​ແລະ​ຈິດ​ໃຈ ຈາກ​ການ​ຖືກຍິງນັ້ນ.

ນາງ Yousafzai ​ໄດ້​ຮັບ​ການຮັບ​ຮູ້​ຈາກນາໆ​ຊາດ ​ຍ້ອນ​ໄດ້​ພະ​ຍາ​ຍາມ​ສົ່ງ​ເສີມ​ການ​ສຶກສາ​ແກ່​ບັນດາ​ເດັກນ້ອຍຜູ້ຍິງ ​ແລະ​ບັນທຶກ​ຄວາມໂຫດຮ້າຍ​ຂອງພວກທາ​ລິ​ບານ ຢູ່ໃນ​ເຂດໃກ້ໆ​ກັບ​ບ້ານ​ຂອງ​ນາງ ​ໃນ ເຂດຮ່ອມ​ພູ Swat ທາງພາກ​ຕາ​ເວັນ​ຕົກ​ສຽງ​ເໝືອຂອງ​ປາ​ກິ​ສຖານ. ນາງ​ໄດ້​ຖືກ
ພວກ​ຫົວ​ຮຸນ​ແຮງທາ​ລິ​ບານ​ຍິງ​ ເມື່ອວັນ​ທີ 9 ເດືອນຕຸລານີ້.

​ໃນ​ວັນ​ອາທິດວານ​ນີ້ ຫລາຍ​ພັນ​ຄົນ​ໄດ້​ພາກັນ​ໄປ​ເຕົ້າ​ໂຮມ​ຢູ່ໃນນະຄອນ Karachi ຊຶ່ງ​ເປັນ​ເມືອງໃຫຍ່ສຸດ​ຂອງ ປາ​ກິ​ສຖານ ​ເພື່ອ​ສະ​ແດງ​ການ​ສະໜັບສະໜູນ​ແກ່ ນາງ Yousafzai.

​ໃນ​ວັນ​ອາທິດ​ເຊ່​ນດຽວ​ກັນ ປະທານາທິບໍດີ ອັ​ຟກາ​ນິສຖານ ທ່ານ Hamid Kazai ​ໄດ້​ຮຽກຮ້ອງ​ໃຫ້​ບັນດາ​ນັກ​ການ​ເມືອງ ​ແລະ​ຜູ້​ນໍາ​ທາງ​ສາສະໜາ​ຂອງ ປາ​ກິ​ສຖານ ​ແລະ ປະ​ເທດ​ເພື່ອນ​ບ້ານ ອັຟກາ​ນິສຖານ ຈັດ​ຕັ້ງ​ປະຕິບັດແຜນ​ປະຕິບັດ​ການຕໍ່​ຕ້ານພວກ​ກໍ່​ການ​ຮ້າຍ ແລະພວກ​ຫົວ​ຮຸນ​ແຮງ ຮ່ວມ​ກັນ.

ໃນ​ວັນ​ເສົາຜ່ານ​ມາ ບັນດາ​ເດັກນ້ອຍ​ທົ່ວ ປາ​ກິ​ສຖານ ​ແລະ ອັຟກາ​ນິສຖານ ​ໄດ້ພາກັນ
ສວດ​ມົນ​ພາວະນາ ວິ້ງ​ວອນ​ໃຫ້ນາງ Yousafzai ຈົ່ງ​ຫາຍດີ​ໂດຍ​ໄວ.
XS
SM
MD
LG