ໃນລາຍການຊີວິດຊາວລາວຂອງ ວີໂອເອ ມື້ນີ້ ເຮົາຈະສະເໜີການສຳພາດ ກັບທ່ານ Michael ສົມສານ ຄົນອາເມຣິກັນເຊື້ອສາຍລາວ ອະດີດນາຍຮ້ອຍໂທທະຫານກອງທັບບົກສະຫະລັດ. ທ່ານ Michael ໄດ້ຮັບບາດເຈັບ ຈຶ່ງໄດ້ກາຍມາເປັນຄົນຕາບອດທັງສອງເບື້ອງ. ແຕ່ວ່າຂອບເຂດໃນຊິວິດຂອງທ່ານ Michael ບໍ່ໄດ້ຈຳກັດຄວາມກ້າຫານຂອງ ທ່ານ ຕໍ່ສິ່ງທ້າທາຍຕ່າງໆທີ່ເຫັນວ່າເປັນໄປບໍ່ໄດ້. ທ່ານ Michael ໄດ້ຖືກເລືອກໃຫ້ເຂົ້າແຂ່ງຂັນກິລາ triathlon ທີ່ເປັນກິລາສາມຂະແໜງຄື ແລ່ນ ລອຍນໍ້າ ແລະຂີ່ລົດຖີບ. ການ ແຂ່ງຂັນກິລາແຊມປ້ຽນມະນຸດເຫລັກ ຫລື Iron man ລະດັບໂລກ ຊຶ່ງຈະຈັດຂຶ້ນຢູ່ເມືອງ Kona ລັດ Hawaii ໃນວັນທີ 8 ເດືອນຕຸລາຈະມາເຖິງນີ້. ເຊີນທ່ານພົບກັບ ກິ່ງສະຫວັນ ໄດ້.
ສະບາຍດີທ່ານຜູ້ຟັງທີ່ເຄົາລົບ ທີ່ທ່ານໄດ້ຟັງຜ່ານໄປນັ້ນແມ່ນພາກສ່ວນນຶ່ງຂອງເພງ the sound of silent ເປັນເພງອາເມຣິກັນທີ່ມີຊື່ສຽງໃນຊຸມປີ 1960 ແລະຍັງເປັນທີ່ນິຍົມຢູ່ເທົ່າທຸກວັນນີ້ ທີ່ເວົ້າເຖິງຄົນພິການຕາບອດ. ເພງນີ້ເປັນຜົນງານຂອງນັກສິນລະປີນ Paul Simon c]t Gar Funkle. ການທີ່ນຳເພງນີ້ມາສະເໜີກໍເພື່ອເປັນກຽດແກ່ ທ່ານສົມເດດ ມີຊື່ເປັນພາສາອັງກິດວ່າ Michael ທ່ານເປັນບຸລຸດເຫລັກອາເມຣິກັນເຊື້ອສາຍລາວ ທ່ານເປັນຄົນຕາບອດ ແລະເປັນ ອະດີດຮ້ອຍໂທທະຫານກອງທັບບົກ ສະຫະລັດ ປັດຈຸບັນນີ້ ຕັ້ງຖິ່ນຖານຢູ່ລັດ Arizona ທາງພາກຕາເວັນຕົກສຽງໃຕ້ຂອງສະຫະລັດ.
ຊີວິດຄວາມເປັນມາຂອງ ທ່ານ Michael ເປັນທີ່ໜ້າສັນລະເສີນ. ປັດຈຸບັນ ອາຍຸ 44 ປີ ຕາບອດມາໄດ້ 13 ປີແລ້ວຈາກການຖືກຍິງໃສ່ໜ້າ ທ່ານໄດ້ລາອອກຈາກທະຫານ ແລ້ວ ມາບັດນີ້ ປະກອບວິຊາອາຊີບເປັນທະນາຍຄວາມ. ສະພາບຄວາມພິການຂອງທ່ານ Michael ພາໃຫ້ຫລາຍໆຄົນເຫັນວ່າ ຈະບໍ່ສຳເລັດໃນອາຊີບທະນາຍຄວາມ ແຕ່ໃນທີ່ສຸດ ທ່ານ Michael ກໍໄດ້ພິສູດໃຫ້ເຫັນວ່າ ທ່ານໄດ້ກາຍມາເປັນທະນາຍຄວາມທີ່ໄດ້ປະສົບ ກັບຜົນສຳເລັດ. ນອກນັ້ນ ທ່ານ Michael ຍັງຈະທ້າທາຍ ແລະພິສູດໃຫ້ເຫັນຫຼາຍຢ່າງ ທີ່ຫລາຍໆຄົນເຫັນວ່າ ເປັນໄປບໍ່ໄດ້. ນັ້ນກໍຄື ທ່ານ Michael ຈະເຂົ້າແຂ່ງຂັນກິລາມະນຸດເຫລັກ ຫລື Iron man ມັນເປັນການແຂ່ງຂັນກິລາທີ່ ໜັກໜ່ວງ ຕ້ອງລອຍນໍ້າ 2.4 ໄມລ ຂີ່ລົດຖີບ 112 ໄມລ ແລະແລ່ນທົນ 26.2 ໄມລ ຊຶ່ງກິລາດັ່ງກ່າວນີ້ ໄດ້ດຶງດູດເອົາບັນດານັກກິລາອາຊີບ ມາຈາກທົ່ວໂລກ ຊຶ່ງຈະຈັດຂຶ້ນຢູ່ເມືອງ Kona ລັດ Hawaii ໃນເດືອນຕຸລາ ຈະມາເຖິງນີ້.
ການແຂ່ງຂັນກິລາມະນຸດເຫລັກ ເປັນເຫດການພິເສດສຳລັບ ທ່ານ Michael. ໃນນາມເປັນຊາວເກາະຮາວາຍ ທີ່ໄດ້ເຕີບໃຫຍ່ຢູ່ທີ່ນັ້ນ Michael ມີຄວາມໄຝ່ຝັນຢາກຈະເຂົ້າແຂ່ງຂັນກິລາດັ່ງກ່າວມາຕະຫລອດ. ເຖິງແມ່ນວ່າຜູ້ກ່ຽວໄດ້ກາຍມາເປັນຄົນເສຍອົງຄະກໍຕາມ ກິລາມະນຸດເຫລັກໄດ້ສິດສອນໃຫ້ Michael ຮູ້ສຶກເຖິງຄວາມໝາຍໃນຄຳວ່າ ທ່ານບໍ່ໄດ້ພິການທາງດ້ານສະໝອງ ແລະຈິດໃຈ. ບັດນີ້ເຮົາມາຟັງການໂອ້ລົມກ່ຽວກັບຄວາມເປັນມາຂອງ ທ່ານ Michael ເໜາະວ່າຜູ້ກ່ຽວແມ່ນໃຜມາຈາກໃສ ຊຶ່ງຜູ້ກ່ຽວໄດ້ເລົ່າເປັນບັ້ນເປັນຕອນສູ່ ວີໂອເອ ຟັງດັ່ງນີ້.
“ສະບາຍດີ ຂ້ານ້ອຍຊື່ Michael ສົມສານ ຂ້ານ້ອຍໄດ້ເຂົ້າມາຕັ້ງຖິ່ນຖານຢູ່ໃນສະຫະ ລັດອາເມຣິກາກັບຄອບຄົວ ໃນປີ 1975 ເວລານັ້ນຂ້ານ້ອຍມີອາຍຸ ຫ້າປີ ແລະມາຕົກ ຢູ່ເມືອງ Champagne ລັດ Illinois. ຫລັງຈາກຮຽນຈົບ ມັດທະຍົມແລ້ວ ຂ້ານ້ອຍໄດ້ ໄປຮຽນຕໍ່ຢູ່ ມະຫາວິທະຍາໄລ Hawaii ສຳເລັດ ປະລິນຍາຕີຝ່າຍທຸລະກິດ ແລະໄດ້ຕໍ່ ເອົາປະລິນຍາໂທຝ່າຍທຸລະກິດເຊັ່ນກັນ ແລະໃນຕອນທ້າຍສຸດໄດ້ກາຍມາເປັນທະ ນາຍຄວາມ. ທ່ານຕ້ອງເຂົ້າໃຈວ່າ ຊີວິດຂ້ານ້ອຍຈາກເບື້ອງຕົ້ນມາຈົນເທົ່າເຖິງປັດຈຸ ບັນ ໄດ້ຖືກຍົກຍ້າຍໄປຢູ່ຫລາຍໆບ່ອນ ບໍ່ໄດ້ຢູ່ແຕ່ບ່ອນດຽວ ເຄີຍໄດ້ຢູ່ລັດ Illinois, Texas, Virginia, ປະເທດ Germany, New York, Hawaii, ປະເທດ Iraq ແລະ Arizona.”
Michael ແມ່ນອະດີດນາຍທະຫານກອງທັບສະຫະລັດ ແລະໄດ້ຮັບໃຊ້ປະເທດຊາດ ເປັນ ເວລາແປດປີ ກ່ອນທີ່ທ່ານຕ້ອງໄດ້ລາອອກຈາກໜ້າທີ່ ເນື່ອງຈາກອຸປະຕິເຫດໃນປີ 1995 ຖືກຍິງຢູ່ໜ້າ ເຮັດໃຫ້ທ່ານຕາບອດເສຍອົງຄະມາຈົນເທົ່າເຖິງ ປັດຈຸບັນນີ້ ຊຶ່ງ ທ່ານ Michael ໄດ້ອະທິບາຍວ່າ :
“ໃນເວລາຂ້ານ້ອຍໃຊ້ຊີວິດເປັນນັກສຶກສາຢູ່ລັດ Hawaii ນັ້ນ ຂ້ານ້ອຍໄດ້ ເຂົ້າຮັບ ໃຊ້ເປັນທະຫານສຳລອງເປັນເວລາສີ່ປີ ຕໍ່ມາໄດ້ຮັບໃຊ້ຢູ່ໃນກອງທັບ ສະຫະລັດເຕັມ ເວລາເປັນເວລາອີກສີ່ປີ ໄດ້ຮັບຊັ້ນຮ້ອຍໂທ ແລະໄດ້ໄປປະຈຳການຢູ່ຫລາຍແຫ່ງ. ຂ້ານ້ອຍ ເກີດມາມີສຸຂະພາບດີຄົບຖ້ວນ ສາມາດເຫັນໂລກອັນງົດງາມ ຈາກການເດີນ ທາງໄປຫລາຍໆແຫ່ງ. ໃນປີ 1995 ຂ້ານ້ອຍໄດ້ຖືກຍິງຢູ່ໃນລັດ Texas ຈາກການເຂົ້າໄປຫ້າມຄົນຕີກັນ ແລະໄດ້ຖືກຍິງໃສ່ໜ້າ ແລະກໍໄດ້ເສຍສາຍຕາຕັ້ງແຕ່ນັ້ນມາ.
Michael ໄດ້ເລົ່າເຫດການ ທີ່ໄດ້ປ່ຽນແປງຊີວິດຜູ້ກ່ຽວມາຈົນເຖິງເທົ້າທຸກມື້ນີ້ວ່າ :
“ຂ້ານ້ອຍຖືກຍິງໃນປີ 1995 ທີ່ບໍ່ພົວພັນກັບວຽກການທະຫານ ແຕ່ເກີດຈາກການກໍ່ຄວາມວຸ້ນວາຍຢູ່ໃນຄຸ້ມບ້ານ ຂ້ານ້ອຍເກີດມາມີຕາດີ ເຄີຍໄດ້ເຫັນທຸກສິ່ງທຸກຢ່່າງທີ່ ມີຢູ່ໃນໂລກ ເຊັ່ນດຽວກັບຄົນອື່ນໆ. ມາບັດນີ້ ຂ້ານ້ອຍບໍ່ສາມາດເບ່ິງເຫັນຫຍັງໝົດ ແລະແນ່ນອນມັນເປັນເລື້ອງໂສກເສົ້າ ໃນເວລາທີ່ພາກສ່ວນໃດສ່ວນນ່ຶງຂອງຮ່າງ ກາຍເສຍໄປ ແລະແນ່ນອນ ຂ້ານ້ອຍຄິດຮອດຫາສິ່ງທີ່ເຄີຍມີ ເຄີຍໄດ້ເຫັນ ແລະມີ ຄວາມຜິດຫວັງ. ໃນເວລາເກີດເຫດໃນປີ 1995 ນັ້ນ ຂ້ານ້ອຍມີຄວາມຫງອຍເຫງົາ ແລະໃຈຮ້າຍ ແລະນັ້ນເປັນເວລາ 20 ປີຜ່ານມາແລ້ວ. ບັດນີ້ຫລາຍສິ່ງຫຼາຍຢ່າງໄດ້ ມີການປ່ຽນແປງ. ຂ້ານ້ອຍທັງເຄີຍໄດ້ເຫັນ ແລະໄດ້ຍິນ. ແຕ່ມາບັດນີ້ໄດ້ຍິນແຕ່ສຽງ ບາງຄັ້ງມັນເຮັດໃຫ້ຂ້ານ້ອຍຢາກເຫັນຮູບພາບທີ່ເຄີຍໄດ້ເຫັນມາ ແຕ່ດຽວນີ້ລື້ງແລ້ວ ແລະຂ້ານ້ອຍມີວຽກຫລາຍ ບໍ່ມີເວລາຈະໄປຄິດນຳແຕ່ເລ້ື້ອງນີ້. ຂ້ານ້ອຍເປັນທະນາຍ ຄວາມເຕັມເວລາ ເປັນພໍ່ລ້ຽງລູກສາວສອງຄົນບໍ່ມີແມ່ ມີໝາໂຕນຶ່ງ ແລະແມວໂຕນຶ່ງ ເພາະສະນັ້ນຈຶ່ງບໍ່ມີເວລາມານັ່ງຄຶດ. ກ່ຽວກັບການໄປໆມາໆ ຂ້ານ້ອຍມີເລຂານຳພາຂັບລົດໄປມາ. ແຕ່ເວລາຢູ່ໃນບ້ານເຮືອນ ຂ້ານ້ອຍສາມາດຊ່ວຍຕົນເອງໄດ້ ຂ້ານ້ອຍ ມີລູກສາວສອງຄົນ ອາຍຸ 15 ປີ ແລະ 22 ປີ.
ກ່ຽວກັບວິຊາອາຊີບການເປັນທະນາຍຄວາມທ່ານ Michael ໄດ້ເລົ່າເຖິງຄວາມຮັບຜິດ ຊອບໃນຕອນນີ້ວ່າ :
“ຂ້ານ້ອຍເປັນທະນາຍຄວາມຕາງໜ້າປ້ອງກັນໃຫ້ແກ່ຄະດີຕ່າງໆ ເຊັ່ນວ່າ ຄະດີຢ່າຮ້າງ ຄະດີຄົນຂັບລົດມຶນເມົາ ຄະດີການທຳຮ້າຍ ປ້ອງກັນຜູ້ອະວຸໂສກ່ຽວກັບການໂອນຊັບສົມບັດໄປໃຫ້ສະມາຊິກຄອບຄົວ ແລະອີກຫລາຍໆຢ່າງມາເປັນເວລາ 15 ປີແລ້ວ ຂ້ານ້ອຍມີວຽກຫລາຍແທ້ໆ ແລະຕ້ອງເຮັດໃຫ້ມີເວລາໃນການເຝິກຊ້ອມກິລາ. ນອກ ຈາກນັ້ນແລ້ວ ຂ້ານ້ອຍພະຍາຍາມທີ່ຈະຊອກຫາທຶນມາສົມທົບໃນການເຂົ້າແຂ່ງຂັນຄັ້ງນີ້ ເພາະຕ້ອງໄດ້ໃຊ້ເງິນຫລາຍ. ນີ້ແມ່ນການແຂ່ງຂັນທີ່ຍິງໃຫຍ່ສຸດຄືກັບຊຸບເປີໂບລ ຂອງສະຫະລັດ.
ບັດນີ້ຫັນມາຟັງເລື້ອງການແຂ່ງຂັນກິລາ Iron man ຫລື ກິລາມະນຸດເຫລັກ ຈັກບາດ ເໜາະທ່ານ. ກິລານີ້ ຈັດຂຶ້ນທຸກໆປີ ມີນັກກິລາຊັ້ນອາຊີບເຂົ້າມາຮ່ວມຈາກທົ່ວໂລກ ຊຶ່ງທຸກຄົນຕ້ອງຜ່ານຂັ້ນຕອນຄຸນນະວຸດທິ ແລະຄວາມສາມາດມາຫຼາຍຢ່າງ. ແຕ່ສຳລັບ Michael ແລ້ວ ຜູ້ກ່ຽວເຄີຍເປັນທະຫານ ໄດ້ຜ່ານການເຝິກແອບດ້ານຮ່າງກາຍ ແລະມີຄວາມອົດທົນມາແລ້ວ. ບັດນີ້ Michael ເປັນນັກກິລາມະນຸດເຫລັກ ອາເມຣິກັນເຊື້ອສາຍລາວ ຄົນທຳອິດ ແລະກໍເປັນນັກກິລາຕາບອດຄົນດຽວ ທີ່ໄດ້ຖືກຮັບຮູ້ ໃຫ້ເຂົ້າແຂ່ງຂັນ ຊຶ່ງ Michael ໄດ້ກ່າວຕໍ່ໄປວ່າ :
“ການແຂ່ງຂັນກິລາຢູ່ເມືອງ Kona ມີລອຍນໍ້າ ແລ້ວປ່ຽນມາຂີ່ລົດຖີບ ແລະຕໍ່ມາກໍແມ່ນແລ່ນທົນ. ກິລາ Iron man ນີ້ເປັນກິລາທີ່ໃຊ້ເວລາ ແລະໄລຍະໄກທີ່ ຕ້ອງລອຍນໍ້າ 2.4 ໄມລ໌ຢູ່ໃນທະເລ ຫລັງຈາກນັ້ນຂີ່ລົດຖີບ 112 ໄມລ໌ ແລະແລ່ນທົນອີກ 26.2 ໄມລ໌. ໃນການແຂ່ງຂັນດັ່ງກ່າວນີ້ ຂະນ້ອຍຕ້ອງໄດ້ມີເພື່ອນນັກກິລາອີກຄົນນຶ່ງ ເອົາເຊືອກມາມັດຕໍ່ກັນກັບຂະນ້ອຍ. ລາວເປັນຜູ້ນຳພາ ຖ້າວ່າລາວບໍ່ໄປ ຂ້າພະເຈົ້າກໍໄປບໍ່ໄດ້. ເພາະສະນັ້ນ ຂ້ານ້ອຍຕ້ອງໄດ້ເຝິກຫັດເປັນປະຈຳເພື່ອໃຫ້ຢູ່ໃນຄວາມໄວທີ່ໄດ້ຕັ້ງໄວ້.”
ສົມເດດ ຫລື Michael ສົມສານ ຈະເຂົ້າຮ່ວມແຂ່ງຂັນກິລາ Iron man ຫລືກິລາມະນຸດເຫລັກ ຍິ່ງໃຫຍ່ປະຈຳປີ ຄັ້ງທີ 38 ຢູ່ເມືອງ Kona ລັດ Hawaii ໃນເດືອນຕຸລາ ຈະມາເຖິງນີ້. ທ່ານຈະສາມາດຕິດຕາມເບິ່ງລາຍລະອຽດ ກ່ຽວກັບທ່ານ Michael ສົມສານ ໄດ້ທີ່ໜ໊າແວັບໄຊຕ໌ www.michaelsomsan .
