ທ່ານ David Ensor ຜູ້ອໍານວຍການໃຫຍ່ຂອງ VOA ເດີນທາງໄປຮອດມຽນມາແລ້ວ
ເພື່ອພະຍາຍາມເຈລະຈາກ່ຽວກັບເງື່ອນໄຂ ໃນການອໍານວຍໃຫ້ວີໂອເອ ໄດ້ເປີດສໍານັກງານ
ຂ່າວຂຶ້ນ ໃນປະເທດທີ່ຢູ່ຢ່າງໂດດດ່ຽວມາເປັນເວລານານ ໃນພາກພື້ນເອເຊຍຕາເວັນອອກ
ສຽງໃຕ້ແຫ່ງນັ້ນ.
ທ່ານ Ensor ໄດ້ທໍາການໂອ້ລົມສົນທະນາແບບເປັນການແນະນໍາຕົວເອງ ໃນວັນຈັນວານນີ້
ທີ່ນະຄອນຫຼວງເນປີດໍ ກັບປະທານສະພາແຫ່ງຊາດມຽນມາ ທ່ານ Thura Shwe Mann.
ທ່ານ Ensor ກ່າວວ່າ “ເບິ່ງຄືວ່າ ທ່ານປະທານສະພາເປັນຄົນທີ່ເປີດກ້ວາງແລະສົນໃຈ
ນໍາຄໍາແນະນໍາກ່ຽວກັບວ່າ ຄວນຈະດໍາເນີນການໄປແບບໃດ ຄວນຈະເຮັດວິທີໃດຈຶ່ງຈະດີ
ທີ່ສຸດ ເພື່ອນໍາເອົາປະຊາທິປະໄຕມາສູ່ມຽນມາຫລາຍຂຶ້ນນັ້ນ. ມັນເປັນການພົບປະກັນທີ່
ດີ ແລະຄວາມສົນໃຈຂອງພວກເຮົານັ້ນ ກໍແມ່ນຢາກໃຫ້ VOA ພາກພາສາມຽນມາ ມີ
ຄວາມສາມາດລາຍງານຂ່າວຢູ່ກັບບ່ອນ ໃນມຽນມານີ້ ໄດ້ໂດຍກົງຫລາຍຂຶ້ນ.”
ການຢ້ຽມຢາມຄັ້ງນີ້ແມ່ນສ່ວນນຶ່ງຂອງການລິເລີ້ມທາງການທູດໃນຫລາຍແບບຕ່າງກັນ ທີ່
ແນໃສ່ເພື່ອເປີດກ້ວາງມຽນມາ ສູ່ຝ່າຍຕາເວັນຕົກ ຫຼັງຈາກທີ່ຢູ່ໃຕ້ການປົກຄອງໂດຍຝ່າຍ
ທະຫານຢ່າງເຄ່ງຄັດ ມາເປັນເວລາຫຼາຍທົດສະຫວັດແລ້ວນັ້ນ.
ການປົກຄອງຂອງທະຫານ ບວກກັບການລົງໂທດທາງດ້ານເສດຖະກິດຈາກບັນດາປະເທດ
ຕາເວັນຕົກ ໄດ້ເຮັດໃຫ້ມຽນມາລ້າຫຼັງ ບັນດາປະເທດເພື່ອນບ້ານ ຢ່າງຫລວງຫລາຍ ໃນດ້ານ
ການຄ້າ ການພານິດ ສິດທິມະນຸດ ແລະຮ່ອງຮອຍດ້ານອື່ນໆຂອງການດໍາລົງຊີວິດຢ່າງມີເສລີ
ປະຊາທິປະໄຕນັ້ນ.
ທ່ານ Ensor ກ່າວວ່າ ທ່ານຈະໃຊ້ເວລາ 4 ມື້ຂອງການຢ້ຽມຢາມຄັ້ງນີ້ ພົບປະກັບບຸກຄົນ
ສໍາຄັນຫຼາຍໆທ່ານ ໃນວົງການລັດຖະບານພົນລະເຮືອນແຕ່ໃນນາມ ຊຸດໃໝ່ ທີ່ໄດ້ຂຶ້ນມາກໍາ
ອໍານາດໃນປີກາຍນັ້ນ.