ລິ້ງ ສຳຫລັບເຂົ້າຫາ

ສະມາຄົມ ສະຕີລາວ ອາເມຣິກັນ ໃນຂົງເຂດ ນະຄອນຫຼວງ ວໍຊິງຕັນ ສະເຫຼີມສະຫລອງວັນແມ່


ນາງສາວ katie ພົມມະຈັນ

ນາງສາວ katie ພົມມະຈັນ

​ເດືອນພຶດສະພາ ແມ່ນ​ເດືອນ​ສະຫລອງ​ວັນ​ແມ່ ​ແລະ​ສະຫລອງ​ວັນ​ມູນ​ມໍລະດົກ​ຊາວ​ເອ ເຊຍ​ປາຊິ​ຟິກ ຢູ່​ໃນ​ສະຫະລັດ. ​ເພາະ​ສະ​ນັ້ນ ​ໃນລາຍການ​ຊີວິດ​ຊາວ​ລາວມື້​ນີ້ ​ວີໂອເອ ຈຶ່ງຈະ​ນຳ​ສະ​ເໜີ​ການສຳພາດ ​ແລະ​ຟັງ​ການ​ຮ້ອງ​ເພງ ​ແລະ​ເສບ​ດົນຕີ​ພື້ນ​ເມືອງ​ລາວ ຂອງ ບັນດາລູກ​ຫລານ​ອາ​ເມຣິກັນ​ເຊື້ອສາຍລາວ ຜູ້ທີ່ເກີດ​ໃຫຍ່​ຢູ່​ໃນ ສະຫະລັດ ວ່າ​ເຂົາເຈົ້າ​ມີ ​ຄວາ​ມບາກ​ບັ່ນ ພາກັນ​ຮັກສາ​ຮີດ ຄອງ​ປະ​ເພນີ ​ແລະຄະ​ນົບ​ທຳນຽມ​ ອັນ​ເປັນການ​ນຳພາ ​ຂອງ ສະມາຄົມ​ສະຕີ​ລາວ​ອາ​ເມຣິກັນ ​ແລະ​ບັນດາ​ພໍ່ແມ່​ຜູ້​ປົກຄອງ​ຢ່າງ​ໃດ ຊຶ່ງ​ ກິ່ງ​ສະຫວັນ ຈະ​ນຳ​ມາ​ສະ​ເໜີ​ທ່ານ​ໃນ​ອັນ​ດັບຕໍ່​ໄປ.​

ສະບາຍດີ​ທ່ານ​ຜູ້​ຟັງ​ທີ່​ເຄົາລົບ ​ໃນ​ຕອນແລງວັນ​ສຸກ ທີ 20 ພຶດສະພາ ອາທິດແລ້ວ​ນີ້ ຢູ່ ​ຮ້ານ​ອາຫານ​ແຫ່ງ​ນຶ່ງ​ໃນ​ເຂດນະຄອນຫລວງ ວໍຊິ​ງຕັນ ​ສະມາຄົມ​ສະຕີ​ລາວ​ອາ​ເມຣິກັນ ໂດຍ​ການ​ນຳພາຂອງ ຂອງ​ຍານາງ​ແກ້ວມະນີ​ວັນ ສີ​ຫາ​ລາດ ​ຊ່ຶງເປັນປະທານ​ມາ​ໄດ້​ສາມ​ ປີ​ແລ້ວ ​ແລະ​ກໍ​ເປັນປີ​ສຸດທ້າຍ​ຂອງ​ການ​ຮັບ​ໃຊ້ ສະມາ​ຄົມດັ່ງກ່າວ ໄດ້ຈັດສະຫຼອງບຸນ ວັນແມ່ຂຶ້ນ. ເຂົ້າ​ຮ່ວມພິທີໃນ​ຄໍ່າ​ຄືນ​ນັ້ນ ກໍມີບັນດາ​ພໍ່​ແມ່​ຜູ້​ປົກຄອງ ​ພ້ອມ​ດ້ວຍ​ລູກ​ຫລານ ທັງ​ຍິງ ​ແລະ​ຊາຍ​ ​ແລະ​ບັນດາ​ແຂກ​ຜູ້​ມີ​ກຽດ​ທັງ​ໝົດ 200 ຄົນ ພາ​ກັນ ນຸ່ງ​ເຄື່ອງ​ພື້ນ​ເມືອງ ​ລາວຢ່າງ​ງົດ​ງາມ ເຕົ້າ​ໂຮມ​ກັນສະຫລອງ​ວັນ​ດັ່ງກ່າວ ​ແລະ​ຊົມຝີ​ມືທີ່ມີພ​ອນສະຫວັນ ໃນ ​ການ​ເສບ​ດົນຕີ​ພື້ນ​ເມືອງ ການ​ຟ້ອນ ​ແລະ​ການ​ຮ້ອງ​ເພງ​ ຂອງ​ພວກ​ລູກ​ຫລານ​ອາ​ເມຣິກັນ ຜູ້ເກີດ​ໃໝ່​ໃຫຍ່​ລຸນ​ຢູ່ໃນສະຫະລັດ​. ປີ​ນີ້​ເປັນ​ປີ​ທີ 21 ແລ້ວ ນັບແຕ່ມື້​ສະມາຄົມ​ຍິງ​ລາວ ປະ​ຈຳ​ເຂດ​ນະຄອນຫລວງ ວໍຊິງ​ຕັນ ​ໄດ້ຖືກກໍ່​ຕັ້ງ​ຂຶ້ນ​ມາ. ນອກຈາກ​ ເດືອນ​ພຶດສະພາ ຈະ ເປັນເດືອນວັນແມ່ແລ້ວ ​ເດືອນດັ່ງກ່າວຍັງ​ເປັນວັນຄົບຮອບປີເພື່ອສະຫລອງ​ບຸນວັນ​ມໍລ​ະ ດົກ ຂອງ​ຊາວ​ເອ​ເຊຍປາຊິ​ຟິກຢູ່​ທົ່ວ​ປະ​ເທດນຳດ້ວຍ.

ພົນລະເມືອງນັບບໍ່ຖ້ວນຢູ່ໃນອາເມຣິກາ ​ໄດ້ພາກັນນຳເອົາ​ເຄົ້າມູນ​ມໍລະດົກ ​ແລະ ວັດທະ ນາ​ທໍາ​ ມາເພີ້​ມພູນຢູ່ໃນ​ແຜ່ນດິນ​ໃໝ່ ຊຶ່ງ​ເປັນ​ປະ​ເທດທີ່ໃຫ້​ຄວາມ​ອຸ​ປາ​ລະ ​ໃນການ​ຕັ້ງຕົ້ນ​ຊີວິດ​ໃໝ່ຂອງເຂົາເຈົ້າ ທັງໃຫ້ການ​ສຶກສາ​ ຕັ້ງແຕ່ຊັ້ນຕໍ່າຂຶ້ນໄປຫາສູງ ​ແລະ​ໃຫ້ຜົນສຳ​ ເລັດຕ່າງໆນາໆນຳ.

ວັນ​ແ​ມ່​ສາກົນຈະສະຫລອງ​ກັນ​ຢູ່​ທົ່ວ​ໂລກ. ຕາມປົກກະຕິ​ແລ້ວຢູ່​ໃນ​ສະຫະລັດ ວັນ​ແມ່ ແມ່ນຕົກ​ຖືກວັນ​ອາທິດ​ທີ​ສອງ​ຂອງ​ເດືອນ​ພຶດພາ ແລະໄດ້​ສະຫລອງ​ກັນ​ມາ​ເປັນ​ເວລາ ​ຮ້ອຍ​ກວ່າ​ປີ​ແລ້ວ. ​ເພາະສະ​ນັ້ນ ​ເນື່ອງ​ໃນ​ໂອກາດ​ອັນ​ສຳຄັນ​ດັ່ງກ່າວ​ນີ້ ສະມາ​ຄົມສະຕີ​ ລາວ​ອາ​ເມຣິກັນ ຈຶ່ງໄດ້​ນຳພາ​ຈັດ​ງານ​ກິນລ້ຽງສັງ​ສັນປະຈຳ​ປີກັນ. ສະມາຄົມ​ສະຕີ​ລາວ​ ອາ​ເມຣິກັນ ເປັນ​ອົງການ​ຈັດ​ຕັ້ງ​ອາສາ​ສະໝັກ ທີ່​ບໍ່​ສ້າງ​ຜົນ​ກຳ​ໄລ ​ເນັ້ນ​ໜັກໃສ່​ການ​ສິດ​ ສອນ​ພາສາ​ລາວ ​ແລະ​ວັດທະ​ນາ​ທຳ​ລາວ ​ໃຫ້ແກ່ພວກ​ລູກ​ຫລານ​ຜູ້​ເກີດ​ໃໝ່​ໃຫຍ່​ລຸ່ນ ຮຽນ​ຮູ້​ເຖິງ​ຮາກ​ເຫງົ້າຄວາມ​ເປັນ​ມາ​ຂອງ​ສັງຄົມ​ຊີວິດ​ລາວ. ໃນຄໍ່າ​ຄືນ​ກິນ​ລ້ຽງ​ສັງ​ສັນ​ວັນ​ແມ່​ນີ້ ພວກ​ລູກ​ຫລານຍິງ ​ແລະ​ຊາຍໄດ້ພາກັນ​ມາ ສ​ະ​ແດງ​ເຖິງ​ຄວາ​ມສາ​ມາດ ​ແລະ​ຜົນງານທີ່ ​ເຂົາ​ເຈົ້າຮໍ່າຮຽນ​ມາ ໃຫ້​ປະຊາ​ຄົມ​ໄດ້​ຊົມ ​ແລະ​ປື້​ມປິ​ຕິ​ຍິນ​ດີ​ນຳ.

ບັດ​ນີ້​ເຮົາ​ມາ​ຟັງ​ການ​ສຳພາດ​ກັບ​ບັນດາ​ລູກ​ຫລານ ​ອາ​ເມຣິກັນ​ເຊື້ອສາຍ​ລາວ​ເບິ່ງ​ເໜາະ ວ່າ ​ເຂົາ​ເຈົ້າຈະ​ພາກັນຄິດ​ຢ່າງ​ໃດ:

ທ້າວ Ryan ພູແກ້ວ ພັມມະຈັນ ອາຍຸ 16 ປີ ກຳລັງ​ຮຽນ​ຢູ່​ມັດທະຍົມ​ກາງ ມັກ ​ຫລິ້ນດົນຕີ​ພື້ນ​ເມືອງ​ລາວ ​ແລະ​ມີ​ຄວາມ​ຫວັງ​ທີ່​ຈະ​ຍຶດຖື​ເອົາ​ວິຊາ sound engineer ຫລື ​ນັກວິ​ຊະ ວະ​ກອນ​ດ້ານຄວບ​ຄຸມສຽງ. Ryan ​ໄດ້​ກ່າວ​ຕໍ່ ວີ​ໂອ​ເອ ​ແລະ​ຫລິ້ນ​ຊໍ​ອີ້ສູ່​ຟັງ​ດັ່ງ​ນີ້ :

ທ້າວ Ryan ພູແກ້ວ ພົມມະຈັນ

ທ້າວ Ryan ພູແກ້ວ ພົມມະຈັນ

ລູກ​ຫລານ​ລາ​ວຄົນ​ຕໍ່​ໄປ​ໄດ້​ແກ່ ທ້າວ Sky ແກ້ວພັນບົວ ອາຍຸ 14 ປີ ກຳລັງ​ຮຽນ​ຢູ່ ​ມັດທະຍົມ​ກາງ​ ລາວ​ມັກ​ເປົ່າ​ແຄນ ​ແລະ​ມີ​ຄວາມ​ໄຝ່ຝັນ​ວ່າ​ຈະ​ເປັນ​ນາຍ​ທະຫານ​ ຂອງ​ ກອງທັບ​ເຮືອ​ສະຫະລັດ ​ໃນ​ອະນາຄົດ​. ທ້າວ Sky ​ໄດ້​ກ່າວ​ຕໍ່ ວີ​ໂອ​ເອ ດັ່ງນີ້ :

ທ້າວ Sky ແກ້ວພັນບົວ

ທ້າວ Sky ແກ້ວພັນບົວ

ລູກ​ຫລານ​ທີ່​ໜ້າ​ຮັກອີກຜູ້ນ່ຶງກໍຄື ນາງແອ​ມມາ ກິ່ງ​ແກ້ວ ອາຍຸ 10 ປີ ມີ​ພອນ​ສະຫວັນ​ດ້ານ ​ຮ້ອງ​ເພງ ​ຢາກ​ຈະ​ເປັນ​ນັກ​ອອກ​ແບບ ​ແລະນັກ​ຮ້ອງ​ໃນ​ອະນາຄົດ. ​ແອ​ມມາ ​ໄດ້​ຮ້ອງ​ເພງ​ທີ່​ ແມ່​ໄດ້​ແຕ່ງ​ໃຫ້ ກ່ຽວ​ກັບ​ຊີວິດ​ເວລາ​ທີ່​ຍັງ​ຢູ່​ໃນ​ສູນ​ອົບ​ພະຍົບ ຊຶ່ງແອມມາໄດ້​ມາ​ຮ້ອງ​ສະ ​ແດງ​ໃຫ້​ບັນດາ​ແຂກ​ຜູ້​ມີ​ກຽດ​ຟັງ​ໃນ​ຕອນ​ນຶ່ງ​ດັ່ງ​ນີ້ :

ນາງ Emma ແລະແມ່ ຍານາງ ສົມເກັນ ກິ່ງແກ້ວ

ນາງ Emma ແລະແມ່ ຍານາງ ສົມເກັນ ກິ່ງແກ້ວ

ຍານາງສົມ​ເກັນ ກິ່ງ​ແກ້ວ ​ແມ່ຂອງ​ນາງ​ແອ​ມມາ ຜູ້​ທີ່​ໄດ້​ກຳກັບກັບ​ລູກ​ສາວ​ຢ່າງ​ໃກ້ຊິດ​ໃນ ການ​ຮໍ່າຮຽນ ​ແລະໄດ້​ກ່າວຕໍ່ ​ວີ​ໂອ​ເອວ່າ :

ຍານາງສົມເກັນ ກິ່ງແກ້ວ

ຍານາງສົມເກັນ ກິ່ງແກ້ວ

ສະຫະລັດເປັນ​ປະ​ເທດ​ທີ່​ກວ້າງໃຫຍ່ໄພສານ ​ບໍ່​ວ່າ​ຊົນ​ຊາດໃດກໍ​ຕາມ ທີ່​ໄດ້​ເຂົ້າ​ມາ​ຕັ້ງ​ຖິ່ນ​ຖານຊີວິດ​ໃໝ່ ການ​ຮັກສາ​ວັດທະນາ​ທຳຂອງ​ເຂົາ​ເຈົ້າ​ ບໍ່​ວ່າ​ຈະ​ເປັນ ດ້ານ​ພາສາ ປະ​ເພນີ ສາສະໜາ ການ​ນຸ່ງ​ຖື ​ແລະ​ການ​ດຳລົງ​ຊີວິດ​ທົ່ວ​ໄປກໍຕາມ ​ກໍແມ່ນຈະເປັນ​ການ​ທ້າ​ທາຍ ຢ່າງໃຫຍ່​. ​ເພາະວ່າ​ສິ່ງເຫຼົ່ານີ້ຈະຖືກ​ປົກ​ຄຸມ​ໄປ​ດ້ວຍ ສັງຄົມ​ໃຫຍ່ ດ້ວຍ​ເຫດ​ນີ້ບັນດາ​ພໍ່​ແມ່​ຜູ້​ປົກຄອງ ​ແລະ​ຊະມາ​ຊິກສັງຄົມ ຈຶ່ງຕ້ອງໄດ້ພາກັນເອົາ​ໃຈໃສ່​ປະກອບສ່ວນ​ຊ່ວຍ​ກັນ​ ຢ່າງ​ແຂງ​ຂັນ ສິດສອນ​ໃຫ້​ພວກ​ລູກ​ເຕົ້າ​ໄດ້ຮູ້​ເຖິງ​ທີ່​ມາ​ຂອງ​ຕົນ​ເອງ ອັນ​ເປັນ​ຄວາມຮັບ ຜິດຊອບ​ເຮັດ​ໃຫ້ ສະຫະລັດ ​ເປັນ​ປະ​ເທດ​ທີ່ຈະ​ເລີ​ນຮຸ່ງເຮື່ອ​ງ ​ແລະ​ອຸດົມ​ຮັ່ງມີ​ໄປດ້ວຍ​ວັດທະນາ​ທຳ​ຕ່າງໆຢ່າງຫຼາກຫຼາຍ.

XS
SM
MD
LG