ອາດຊະຍາກຳທີ່ຮຸນແຮງໄດ້ເພີ້ມຂຶ້ນ 3.9 ເປີເຊັນຢູ່ໃນສະຫະລັດປີແລ້ວນີ້ ແຕ່ວ່າ ບັນດາເຈົ້າໜ້າທີ່ອົງການສັນຕິບານກາງ ຫຼື FBI ກ່າວວ່າ ຈຳນວນຂອງຜູ້ກະທຳຜິດ ແມ່ນຍັງຕໍ່າກວ່າຈຸດທີ່ສູງສຸດ ໃນຊຸມປີ 1990.
ຫລັງຈາກໄດ້ຫລຸດລົງໃນໄລຍະສອງປີທີ່ຜ່ານມາ ໂຕເລກການກໍ່ອາດຊະຍາກຳ ທີ່ຮຸນແຮງກໍໄດ້ເພີ້ມຂື້ນ 1 ລ້ານ 2 ແສນກໍລະນີໃນປີກາຍນີ້ ຮວມທັງໄດ້ໂດດຂຶ້ນເກືອບ 11 ເປີເຊັນ ຂອງໂຕເລກການຄາດຕະກຳເປັນ 15,696 ກໍລະນີອີງ ຕາມອົງການສັນຕິບານກາງ.
ລັດຖະມົນຕີກະຊວງຍຸຕິທຳ ທ່ານນາງ Loretta Lynch ກ່າວໃນວັນຈັນວານນີ້ວ່າ ໂຕເລກດັ່ງກ່າວສະແດງໃຫ້ເຫັນວ່າ “ພວກເຮົາຍັງມີວຽກເຮັດຢູ່ຫລາຍ” ແຕ່ໄດ້ໃຫ້ຂໍ້ສັງເກດວ່າ ໂຕເລກທັງໝົດຂອງການກໍ່ອາດຊະຍາກຳທີ່ຮຸນແຮງ ຢູ່ໃນລະດັບຕໍ່າສຸດອັນດັບສາມ ໃນໄລຍະສອງທົດສະວັດ ທີ່ຜ່ານມາ. ທ່ານນາງກ່າວວ່າ ອາດຊະຍາກຳໄດ້ຫລຸດລົງ ຫລືບໍ່ກໍຢູ່ໃນລະດັບທີ່ບໍ່ມີການປ່ຽນແປງ ຢູ່ໃນຫລາຍໆປະຊາຄົມຂອງສະຫະລັດ.
ກໍລະນີການຂົ່ມຂືນຢູ່ໃນສະຫະລັດ ເພີ້ມຂຶ້ນ 6.3 ເປີເຊັນໃນປີກາຍນີ້ ໃນຂະນະທີ່ການກໍ່ກວນທຳຮ້າຍໄດ້ເພີ້ມຂຶ້ນ 4.6 ເປີເຊັນແລະການປຸ້ນຈີ້ເພີ້ມຂຶ້ນ 1.4 ເປີເຊັນ.
ແຕ່ອົງການ FBI ກ່າວວ່າ ອາດຊະຍາກຳປະເພດລັກຂະໂມຍຊັບສິນໄດ້ຫຼຸດລົງ 2.6 ເປີເຊັນ ເປັນປະມານແປດລ້ານກໍລະນີແລະໄດ້ຫລຸດລົງເປັນປີທີ 13 ລຽນ ຕິດ. ອົງການ FBI ກ່າວວ່າ ການງັດແງະໄດ້ຫລຸດລົງ 7.8 ເປີເຊັນ ແລະລັກ ຂະໂມຍ 1.8 ເປີເຊັນ ໃນຂະນະທີ່ຈຳນວນຄະດີລັກລົດ ໄດ້ເພີ້ມຂຶ້ນ 3.1 ເປີເຊັນ.
