ລິ້ງ ສຳຫລັບເຂົ້າຫາ

ລມຕ ການເງິນ ສະຫະລັດ ຮຽກຮ້ອງໃຫ້ ຢູເຄຣນ ຈັດແຈງ​ໜີ້ສິນ ຂອງ​ຕົນໃໝ່


ລັດຖະມົນຕີ​ການ​ເງິນສະຫະລັດ ທ່ານ Jack Lew

ລັດຖະມົນຕີ​ການ​ເງິນສະຫະລັດ ທ່ານ Jack Lew

ໃນ​ວັນ​ອັງຄານ​ວານ​ນີ້ ລັດຖະມົນຕີ​ການ​ເງິນສະຫະລັດ ທ່ານ Jack
Lew ​ໄດ້​ຊຸກຍູ້ໃຫ້ ບັນດາ​ຜູ້ນຳ​ຢູ​ເຄຣນ ​ສືບ​ຕໍ່​ດຳເນີນງານໃນ​ການ
​ຈັດແຈງ​ໜີ້ສິນຂອງ​ຕົນໃໝ່ ​ໂດຍ​ກ່າວ​ວ່າ ​ເງິນ​ກູ້​ຢືມ​ຂອງອົງການ
​ກອງ​ທຶນ​ສາກົນ ຫຼື IMF ແມ່ນບັງຄັບໃຫ້ທຸກໆຄົນ​ຈະ​ຕ້ອງ​
“​ເສຍ​ສະລະຮ່ວມກັນ.”

ທ່ານ Lew ​ໄດ້​ພົບ​ປະ​ກັບ​ນາຍົກລັດຖະມົນຕີຢູ​ເຄຣນ ທ່ານ
Arseniy Yatsenyuk ​ແລະລັດຖະມົນຕີ​ການ​ເງິນ ທ່າ​ນນາງ
Natalie Jaresko ທີ່​ນະຄອນຫຼວງ​ວໍ​ຊີງ​ຕັນ ​ໃນ​ວັນ​ອັງຄານ
​ວານ​ນີ້. ທັງ​ສອງ​ທ່ານ​ໄດ້​ມາວໍ​ຊີງ​ຕັນ ​ເພື່ອ​ກົດດັນໃຫ້ IMF
ປ່ອຍ​ເງິນ​ກູ້​ງວດທີ 2 ​ໃນ​ຈຳນວນ​ເງິນ 17 ພັນ 5 ຮ້ອຍລ້ານໂດ​ລ່າ ​ໃຫ້​ແກ່​ຕົນ ​ເພື່ອ​ຊຸກຍູ້​ເສດຖະກິດ​ທີ່ກຳລັງ ດີ້ນຮົນ.

ອົງການ IMFຕະຫຼອດ​ມາ​ແມ່ນ​ຮຽກຮ້ອງ​ໃຫ້ຜູ້​ທີ່​ໄດ້​ຮັບ​ເງິນ​ກູ້​ຢືມ​ນີ້ ​ປະຕິ​ຮູບທາງ​ດ້ານ​ເສດຖະກິດ​ທີ່​ບາງ​ຄັ້ງ​ມັນ​ອາດ​ຈະ​ຂົມ​ຂື່ນ ກ່ອນ​ທີ່​ຈະ​ຈ່າຍ​ເງິນ​ກູ້​ໃຫ້.

ທ່ານ Yatsenyuk ​ໄດ້​ບອກ​ກັບ ສະພາ Atlantic ​ທີ່​ວໍ​ຊີງ​ຕັນ​ ໃນວັນ​ອັງຄານ​ວານ​ນີ້​ວ່າ ລັດຖະບານ​ຂອງ​ທ່ານ​ນັ້ນ​ໄດ້​ກະທຳ​ທຸກ​ສິ່ງ​ຢ່າງ ເພື່ອ​ປິດ​ຊ່ອງ​ຫວ່າງ​ຂອງງົບປະມານຮວມ ທັງ​ໂຈະ​ການ​ໃຊ້​ຈ່າຍ​ທາງ​ດ້ານສັງຄົມ ​ແລະ​ຕັດ​ຮອນ​ໂຄງການບຳ​ເນັດບຳນານລົງ. ທ່ານ​ໄດ້​ກ່າວ​ອີກ​ວ່າ ຢູ​ເຄຣນຍັງຈຳ​ເປັນ​ທີ່ຈະຕ້ອງໄດ້ຮັບການສະໜັບສະໜຸນທາງດ້ານການ​ເງິນ​ຢ່າງ​ຫຼວງ​ຫຼາຍ ໂດຍຮຽກຮ້ອງ ເພື່ອ​ໃຫ້​ມີ​ສະຖຽນ​ລະ​ພາບ​ທາງ​ດ້ານ​ເສດ​ຖະກິດນັ້ນວ່າ ເປັນ “​ໂຄງການ​ຂອງ​ໂລກ​ເສລີ.”

ທ່ານ Yatsenyuk ​ໄດ້​ເອີ້ນຄວາມເຂັ້ມແຂງຂອງ​ຢູ​ເຄຣນ ເປັນຄຳ​ຕອຍທີ່​ດີທີ່​ສຸດ ຕໍ່ຣັດ​ເຊຍ ​ແລະ​ປະທານາທິບໍດີ Vladimir Putin.

ສົງຄາມ​ຕໍ່ຕ້ານ​ພວກ​ຫົວ​ແບ່ງ​ແຍກ​ດິນ​ແດນ​ທີ່​ໜຸນ​ຫຼັງ​ໂດຍຣັດ​ເຊຍ ​ໃນ​ພາກ​ຕາ​ເວັນ​ອອກ​ຂອງ​ຢູ​ເຄຣນ​ໄດ້​ເຮັດໃຫ້​ປະ​ເທດດັ່ງກ່າວ ​ເກືອບ​ວ່າ​ຈະ​ລົ້ມ​ລະລາຍ.

ວໍຊີງ​ຕັນ​ວາງ​ແຜນ​ທີ່​ຈະ​ເປັນ​ເຈົ້າພາບ​ຈັດ​ກອງ​ປະຊຸມການລົງທຶນ​ຢູເຄຣນ-ອາເມຣິກັນ ໃນ​ເດືອນ​ໜ້າ​ນີ້ ເພື່ອຊອກຫາແລະ​ດຶງ​ດູ​ງ​ເອົາ​ເງິນ​ໂດ​ລາ​ທີ່​ມີຄວາມຈຳ​ເປັນ​ເຂົ້າ​ໄປໃນ​ຢູ​ເຄຣນ.

XS
SM
MD
LG