ບັນດາເຈົ້າໜ້າທີ່ອັຟການິສຖານກ່າວໃນວັນພະຫັດວານນີ້ວ່າ ພົນລະເຮືອນຢ່າງ ໜ້ອຍ 30 ຄົນ ຮວມທັງພວກເດັກນ້ອຍຫລາຍຄົນ ຢູ່ໃນບັນດາຜູ້ເສຍຊີວິດຈາກການປະທະກັນ ໃນຕອນເຊົ້າມືດລະຫວ່າງ ກຳລັງລັດຖະບານທີ່ໜູນຫລັງໂດຍສະຫະລັດແລະພວກທາລິບານ ທີ່ແຂວງ Kunduz ໃນພາກເໜືອຂອງປະເທດ.
ກອງທັບສະຫະລັດຍັງໄດ້ຢືນຢັນວ່າ ທະຫານຂອງຕົນສອງຄົນກໍໄດ້ເສຍຊີວິດ ຢູ່ໃນການສູ້ລົບ ໃນຂະນະທີ່ອີກສອງຄົນ ໄດ້ຮັບບາດເຈັບ.
ການສູ້ລົບທີ່ຮ້າຍແຮງ ຢູ່ໃນເຂດຊານເມືອງຂອງເມືອງຫລວງແຂວງດັ່ງກ່າວໄດ້ເກີດຂຶ້ນຫລັງຈາກກຳລັງອັຟການິສຖານ ຊຶ່ງໄດ້ຮັບການຊ່ວຍເຫລືອຈາກຄູ່ຮ່ວມງານອາເມຣິກັນ ໄດ້ບຸກເຂົ້າໄປໃນຄຸ້ມບ້ານຂອງພວກກະບົດ.
ຖະແຫຼງການຂອງສະຫະລັດກ່າວວ່າ “ບັນດາສະມາຊິກທະຫານຂອງຕົນໄດ້ຖືກຍິງ ໃນ ລະຫວ່າງການເຝິກແອບ ແນະນຳ ແລະຊ່ວຍຄູ່ຮ່ວມງານອັຟການິສຖານ ເພື່ອກວດລ້າງທີ່ຕັ້ງຂອງພວກທາລິບານ ແລະລົບກວນການປະຕິບັດງານຂອງກຸ່ມດັ່ງກ່າວຢູ່ໃນເຂດເມືອງ Kunduz.”
ໂຄສົກປະຈຳແຂວງທ່ານ Mehmood Danish ກ່າວວ່າ ສະມາຊິກສີ່ຄົນຂອງໜ່ວຍກ້າຕາຍອັຟການິສຖານກໍເສຍຊີວິດ ແຕ່ວ່າ “ບໍ່ເປັນຈັ່ງໂຊກການສູ້ລົບຍັງໄດ້ເຮັດໃຫ້ພົນລະເຮືອນຢ່າງໜ້ອຍ 30 ຄົນເສຍຊີວິດ ຮວມທັງພວກແມ່ຍິງ ແລະເດັກນ້ອຍ. ທ່ານກ່າວເພີ້ມ ວ່າ ອີກຫລາຍໆຄົນໄດ້ຮັບບາດເຈັບ. ທ່ານໄດ້ອ້າງວ່າ ການປະຕິບັດງານຮ່ວມດັ່ງກ່າວ ຍັງໄດ້ສ້າງຄວາມເສຍຫາຍຢ່າງໜັກໃຫ້ແກ່ພວກກະບົດທາລິບານ ໂດຍໄດ້ສັງຫານພວກເຂົາ 26 ຄົນ.
ກ່ອນໜ້ານັ້ນ ປະຊາຊົນໄດ້ພາກັນເດີນຂະບວນຢູ່ຕາມຖະໜົນຫົນທາງໃນເມືອງ Kunduz ເພື່ອປະທ້ວງການສັງຫານພົນລະເຮືອນ ໂດຍພາກັນຫາມສົບພວກຄົນຕາຍ ປະມານ 20 ຄົນ ຮວມທັງເດັກນ້ອຍ.“
ອົງການນິລະໂທດກຳສາກົນ ໄດ້ຮຽກຮ້ອງທຳການສືບສວນໂດຍທັນທີ ຢ່າງລະອຽດ ແລະບໍ່ເຂົ້າຂ້າງອອກຂາ ກ່ຽວກັບການໂຈມຕີທາງອາກາດ ທີ່ມີການ ຖິ້ມໂທດໃສ່ວ່າເປັນເຫດໃຫ້ພົນລະເຮືອນເສຍຊີວິດນັ້ນ.